Taitọs 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eyono rẹ Omamọ rẹ Uyono

¹ Ẹkẹvuọvo gbe je uyono wẹn dia ọsoso, rọ nabọ shehọ.

² Gbe jẹ ekpako na ru dẹndẹn re ayen se gbe emu, rẹ udu rẹ ayen djiro, re esegbuyota rayen gan, re ayen vwo ẹguọnọ ro jerhẹriẹ, kugbe odiri.

³ Rere eya re ghworo vwo mu oma rẹ ayen phihọ ọghọ, e dia ihwo re ta avwravwra-a eyẹ ri ji si ọgba rẹ udi-i, je dia iyono ri yono emu esiri;

⁴ rere ayen yono eya rẹ itete na ri vwo ẹguọnọ kpahe eshare rayen, kugbe emọ rayen.

⁵ Jẹ ayen dia dẹndẹn vẹ uruemu rọ gbare, rere ayen nabọ wian owian vwẹ uwevwi rayen, ri ji ni aruẹdọn, re vwẹ oma kpotọ kẹ eshare rayen rere e vwo jẹ ota rẹ Ọghẹnẹ e gbe kuẹ.

⁶ Wo ji bru imighene na uche rere ayen vwẹ udu te otọ.

⁷ Wọ vwẹ oma wẹn ru oniru rẹ iruo esiri vwi kemu kemu ejobi, wọ vwẹ uyono wẹn jọdẹ-ẹ, se uyono wẹn gbe oja.

⁸ Nabọ jẹ ephẹrẹ wẹn gba yoyovwi, rere ihwo vwo jẹ uyono wẹn ẹharhọ; rere ihwo re rhẹrẹ ota wẹn jovwo oma vwọ vo ayen, rere ayen jẹ ota ọbrabra ẹta kpahe avwanre.

⁹ Ta kẹ idibo na re vwe oma kpotọ kẹ inini rayen, rere ayen ru obo ri je ayen vwi kemu kemu ejobi; ọ dia fiki rẹ ejiro rẹ ihwo-o.

¹⁰ Ayen gbe ota phihọ ayen unu-u, ayen tọrọ obọ-ọ, ẹkẹvuọvo ayen nabọ vwẹ uruemu esiri phia, rere ihwo vwo mu ọghọ kẹ uyono rẹ Ọghẹnẹ Osivwi rẹ avwanre, vwi kemu kemu.

¹¹ Kidie ẹserọphẹ rẹ Ọghẹnẹ rhe vwẹ oma phiare, ọ da vwẹ esivwo vwọ kẹ ihwo ejobi.

¹² Ọ ro yono avwanre ne siobọ nẹ egagọ rẹ ofian kugbe ẹguọnọ rẹ akpọ ofefe na, rere avwanre yere akpọ rẹ avwanre dẹndẹn yoyovwi vwẹ evun rẹ akpọ na.

¹³ Avwanre ra hẹrhẹ ebruphihọ rẹ iphiẹrohọ rẹ ẹdẹ rẹ ẹcha rọye, ẹvwọphia rẹ urinrin rẹ Ọghẹnẹ Ọsivwi rẹ avwanre rode na Jesu Kristi.

¹⁴ Ohwo rọ vwẹ oma rọye kẹ avwanre rọ vwọ tan avwanre nẹ orukuruku ejobi kugbe ro vwo ru avwanre fon kẹ oma rọye ihwo rẹ obọ rọye ri vwo oruru kẹ iruo esiri.

¹⁵ Dje emu nana ejobi gba; bruche re wọ ghwọ vẹ ogangan. Wo jẹ ohwo ọvuọvo ni we saka-a.