Solomon 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọshare rẹ Ọpha na jiri Ọpha na

¹ Nighe, wo yovwiriọ, ọnse mẹ, Nighe, wọ pha yoyovwi Ẹro wẹn kerẹ ẹro rẹ ilekuku vwẹ obuko rẹ oga wẹn. Ẹton wẹn epha kerẹ ẹton rẹ otu rẹ ẹvwe, re djẹ nene ọghwrọrọ ri Gilead cha.

² Ibiako wẹn fuan tototo kerẹ ekru rẹ igegede ri tue nẹ ẹho cha, Ayen ejobi na agbava ayen vwiẹri, ọmọ ọvuọvo ghwu nẹ usun raye-en.

³ Ẹbẹrunu rẹ ovwan vware kerẹ isene, ugbunu wẹn epha yoyovwi Egban wẹn epha kerẹ ẹbẹre ri pomegranate Vwẹ obuko rẹ oga wẹn

⁴ Ohọre wẹn epha poroko kerẹ ohẹrhẹ ri Devid, ra bọnre kẹ ọrhẹrotọ, ra ghwẹ ekpọfia vẹ ishuẹ phihọ, ayen ejobi ekuakua rẹ ọgba ofovwi.

⁵ Ivie wẹn na ivẹ na epha gọgọgọ, agbava rẹ orhua ivẹ, re ria odi vwẹ ohri rẹ idodo.

⁶ Bẹsiẹ rẹ ọke che vwo she re de je uhoho ẹmrẹ, ke me djẹ kpo enu rẹ ugbenu rẹ adjija epha vẹ ugbenu rẹ egẹn.

⁷ Wo yovwi re, ọnse mẹ; A sa mrẹ ekan vwẹ oma wẹ-ẹn.

⁸ Mọ re vrẹn nẹ Lebanọn, ọpha mẹ: mọ re vrẹn nẹ Lebanọn. Vrẹn nẹ obo ineneghe rẹ Amana rhe, nẹ obo ineneghe ri senir vi Hermọn rhe, nẹ igbenu rẹ ibido rhe.

⁹ Wọ hra ẹnwẹn mẹ, oniọvo mẹ, ọpha mẹ, wọ vwẹ inieni rẹ ẹro wẹn na hra udu mẹ, ọ vẹ ufi rẹ evwarha rọ hẹ ohọre wẹn.

¹⁰ Mavọ ẹguọnọ wẹn vwerhe te, oniọvo mẹ, ọpha mẹ! Ẹguọnọ wẹn ọ vrẹn avwerhe rẹ udi, ọnrhe ororo rẹ ori wẹn gbo nọ egẹn.

¹¹ Ẹbẹrunu wẹn ọpha mẹ, o gbo vwerhe nọ ọnrhe rẹ ipho; Ọnyọn vẹ ame rẹ ivie e hẹ otọ rẹ ẹrenvwe wẹn; ọnrhe ororo rẹ iwun wẹn e họhọ ọnrhe ri Lebanọn.

¹² Ogba ra kanre ọye oniọvo mẹ, ọpha mẹ ruẹ, ogba ra kanre, ogbugbu re diri.

¹³ Aghọn wẹn da họhọ ọgbọ ri pọmẹgranate e vọnre vẹ emamọ ri me yovwi ejobi, re pha rhọghọ rọghọ vẹ ivwri,

¹⁴ Oka rẹ emamọ ejobi, te ra fuan te i re mwo te irhe ejobi ri gbo ọnrhe rẹ egẹn, egẹn kugbe adjija, te ishasha te irierie

¹⁵ Ogba vẹ ogbugbu, orhare ra tọn fi oku, kugbe ito re djẹ nẹ Lebanọn cha.

¹⁶ Vrẹn, E odju rẹ obọrhẹ ọnre! yanrhe, E odju rẹ obuko ọnre! Gbe dju phihọ ogba mẹ, gbe jẹn ọnrhe rọye gbo ro asan ejobi. Gbe jẹn ọnse ro je vwe na rhe ogba rọye, rọ re emamọ ro jere ejobi.