Rutu 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Rutu kugbe Naomi

¹ Vwẹ ọke rẹ iguẹdjọ vwo suẹn, owẹvwe de fi vwo otọ na, Ọshare ọvo ri Bẹtlẹhẹm vwi Juda de kpo otọ ri Moab ra dia, ọ vẹ aye rọye kugbe emọ rọye ivẹ.

² Odẹ rẹ ọshare na Elimẹlẹk, ode re aye rọye Naomi, odẹ rẹ emọ rọye ivẹ na kẹ Malọn vi Chiliọn; ayen ihwo rẹ Ifrẹm vwi Bẹtlẹhẹm Juda Ayen da yanran kpo otọ ri Moab ra dia.

³ Elimẹlẹk ọshare ri Naomi de ghwu, ọye ọvo kọye chekọ vẹ emọ rọye ivẹ.

⁴ Ayen da reyọ eya ri Moab vwọ rọvwọ; odẹ rẹ ọvo Ọrpa, odẹ rẹ ọrivẹ ki Rutu ayen da dia oboyi kerẹ ẹgbukpe ihwe.

⁵ Te Malọn te Chiliọn de ghwu, ọtiọye ọshare rẹ aye na vẹ emọ rọye ivẹ na de ghwu.

⁶ Etiyin aye na vẹ eya rẹ emọ rọye na vrẹnri kẹ ayen rhivwi nẹ otọ ri Moab kpo, kidie o nyori vwẹ otọ ri Moab obo rẹ Ọrovwohwo ra mrẹ ihwo rọye ọ da vwẹ emuọre kẹ ayen. Etiyin o de vrẹn nẹ asan rọ hẹ epha jovwo.

⁷ Ọ da ruafe nasan rọ hẹ epha, ọ vẹ eya rẹ emọ rọye ivẹ na, ayen de rhivwi kpo otọ ri Juda.

⁸ Ẹkẹvuọvo Naomi da ta kẹ eya rẹ emọ rọye ivẹ na, ovwan rhivwi kpo, dohwo duwevwi rẹ oni rọye ra. Ọrovwohwo ruẹse kẹ ovwan, kirobo we ru kẹ ọ ro ghwuru na vẹ ovwẹ.

⁹ Ọrovwohwo kẹ ovwan rere wa sa mrẹ uwere, dohwo duwevwi rẹ ọshare rọye. Ọ da fiọnfiọn ayen unu, ayen da teye ugo rẹ oviẹ, ayen da viẹ,

¹⁰ Ayen da ta kẹ, Ẹjo, avwanre nene uwe bru ihwo wẹn.

¹¹ Ẹkẹvuọvo Naomi da ta, Rhivwi kpo, eya rẹ emọ mẹ: kidie ovwan vwo nene uvwe kpo? Mi ji vwo emọ vwẹ evun mẹ re cha dia eshare kẹ ovwan?

¹² Rhivwi, eya rẹ emọ mẹ, we kpo, kidie me ghwo nọ kẹ ọshare ẹrọvwọ. Ọ da dianẹ me tare nẹ mi vwo ẹruẹphihọ, mi de fiki vwo ọshare vwẹ ason nana, mi de ji vwiẹ emọ;

¹³ Ovwan sa hẹrẹ bẹsiẹ rẹ ayen vwọ rho? We se jẹ orọvwe vwo? Ẹjo, emetẹ mẹ, ẹjo emetẹ mẹ; ọ da vwẹ gangan fiki rẹ ovwan rẹ obo rẹ Ọrovwohwo vwo gbe kpahe ovwẹ.

¹⁴ Etiyin ayen da teye ugo rẹ oviẹ ayen da rhoma viẹ. Ọrpa da fiọnfiọn unu rẹ oniorọvwe rọye, ẹkẹvuọvo Rutu de churu muo.

¹⁵ Ọ da ta, Nighe, ophrophro wẹn rhivwi bru ihwo rọye re, vẹ ẹdjọ rọye: rhivwi kerẹ ophrophro wẹn.

¹⁶ Ẹkẹvuọvo Rutu da ta wọ rẹ vwẹ re mi ju we vwo-o, eyẹrẹ vwo rhivwi vwo ju we enene-e, kidie asan wọ ra, ọye me ra; asan wo wo phihọ mi ji wo phihọ; ihwo wẹn cha dia ihwo mẹ, Ọghẹnẹ wẹn Ọghẹnẹ mẹ;

¹⁷ asan wo de ghwu mi de ghwu, etiyin e shi vwe phihọ: E jẹn Ọrovwohwo ru ọtiọye kẹ vwẹ ọ rọ vrẹn ọtiọye, ọ da tobọ dianẹ ughwu hẹriẹ ovwẹ nẹ uwe.

¹⁸ Ọke ri Naomi vwọ mrẹ nẹ ọ choma ro vwo nene ọye ra, ọ gbe ta ota ọfa-a.

¹⁹ Ọtiọye ayen ivẹ na da yan bẹsiẹ rẹ ayen vwo te Betlehem. Ọke rẹ ayen vwo te Bẹtlẹhẹm, orere ejobi de kpogho fiki rẹ ayen; Eya na da ta, Ọna dia Naomi?

²⁰ Ọ da ta kẹ ayen, E se vwe Naomi-i, se vwe Mara: kidie Ọrovwoẹgba na ru obo re yara kẹ vwẹ

²¹ Me yanran vọnvọn, Ọrovwohwo da vwe ovwẹ rhivwi rhe ofefe: kidie e vwo se vwe Naomi, jẹ Ọrovwohwo kpokpo uvwe rẹ Ọrovwoẹgba de kru okpetu nyẹ vwe.

²² Ọtiọye Naomi de rhivwi, vi Rutu rẹ ohwo ri Moab aye rẹ ọmọ rọye vẹ ọye, o de rhivwi nẹ otọ ri Moab rhe. Ayen da rhe Bẹtlẹhẹm vwẹ ẹtuọphihọ rẹ orhọ ri barli