Ọbe ri Pọl si rhe Ihwo ri Rom 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Arho vwẹ evun rẹ Erhi

¹ Asakiephana o rhe vwo obruhwe kẹ ayen otu re herọ vwẹ evun ri Jesu Kristi-i.

² Kidie urhi rẹ Erhi rẹ arhọ vwi Kristi Jesu rhe rhan vwẹ nẹ obọ rẹ urhi rẹ umwemwu vẹ ughwu.

³ Kidie obo rẹ urhi na se ru-u, rọ vwọ hẹ ọvwiẹrẹ fiki rẹ ugboma na, Ọghẹnẹ de ji Ọmọ rọye rhe vwẹ oma rẹ ohwo rẹ akpọ rọ vọnre vẹ umwemwu, o de vwo ze kẹ umwemwu, rere o vwo bruhwe umwemwu vwẹ ugboma,

⁴ rere obo rẹ urhi na guọnọre vwọ mrasan gba vwẹ oma rẹ avwanre, ri nene iruo rẹ ugboma na-a ẹkẹvuọvo ri nene Erhi na.

⁵ Kidie otu ri nenesi rẹ ugboma na vwenẹ, iruo rẹ ugboma na ayen ruẹ, ẹkẹvuọvo otu ri nenesi rẹ Erhi na iruo rẹ Erhi na kọye ayen ruẹ rhe.

⁶ Ra vwẹ iroro kpahe ugboma kẹ ughwu, ẹkẹvuọvo ra vwẹ iroro kpahe Erhi hẹ arhọ vẹ ufuoma.

⁷ Kidie iroro ra vwọ kpahe ugboma vẹ Ọghẹnẹ ọvweghrẹ; ọ vwẹ oma kpotọ kẹ urhi rẹ Ọghẹnẹ-ẹ, eriyin dẹn o se ruo-o;

⁸ otu re herọ vwẹ ọ rẹ ugboma na se ru obo ri je Ọghẹnẹ-ẹ.

⁹ Ẹkẹvuọvo ovwan gbe hẹ evun rẹ ugboma-a, evun rẹ Erhi kọye ovwan epha, ọ da dianẹ Erhi rẹ Ọghẹnẹ vẹ ovwan herọ. Ohwo ro rhe vwo Erhi ri Kristi na-a, ọ rha sa dia ohwo rọye-e.

¹⁰ Ẹkẹvuọvo ọ da dianẹ Kristi hẹ evun wẹ, owenẹ ugboma rẹ ovwan ghwu fiki rẹ umwemwu dede, yẹ erhi rẹ ovwan je rhọ fiki rẹ ọvwata rọye.

¹¹ Ọ dianẹ Erhi rẹ ohwo rọ kpare Kristi vrẹn nẹ ughwu na da hẹ evun rẹ ovwan, ohwo rọ kpare Kristi vrẹn nẹ ughwu na kọ je vwẹ arhọ kẹ ugboma rẹ ovwan ro ghwẹ na fiki rẹ Erhi rọye rọ hẹ evun rẹ ovwan.

¹² Vwẹ ọtiọye na, imoni mẹ, avwanre kẹ eriesa, ọ dia osa rẹ ugboma-a, re de yere eyere rẹ ugboma-a–

¹³ Kidie ovwan de nenesi rẹ ugboma ku we ghwu, ẹkẹvuọvo ọ da dia ọ rẹ Erhi rẹ ovwan da fọ kẹ ugboma re o ghwu ovwan ke rhọ.

¹⁴ Kidie ayen ejobi rẹ Erhi rẹ Ọghẹnẹ na suru ayen hẹ emọ rẹ Ọghẹnẹ.

¹⁵ Ọ gbe dia erhi rẹ ọviẹn rọ djẹ oshọ mu ohwo na a vwọ kẹ ovwa-an, ẹkẹvuọvo kẹ erhi rẹ ọmọ a vwọ kẹ ovwan. Kọye ovwan vwo kperẹ nẹ, Baba! Ọsẹ!

¹⁶ Erhi na ọvo ri se oseri kẹ erhi rẹ avwanre nẹ avwanre emọ rẹ Ọghẹnẹ,

¹⁷ avwanre da dia emọ, kẹ ereuku, ereuku rẹ Ọghẹnẹ kugbe ihwo ri vi Kristi gbe ko ko reuku, kirobo rẹ avwanre vẹ ọye re oja na eriyin avwanre vẹ ọye je ghọghọ kugbe te.

Urinrin rọ Cha Dia Vwẹ Obọ

¹⁸ Mi rori nẹ a sa vwẹ oja rẹ ọke nana dje urinrin ra cha vwọ phia vwẹ oma rẹ avwanre-e.

¹⁹ Kidie emama na ra hẹrhẹ i ro rhẹro gangan vwọ kpahe ọke rẹ ẹvwọphia rẹ emọ rẹ Ọghẹnẹ;

²⁰ kidie a ma emama na kẹ egbo vẹ ẹghwọrọ, ọ dianẹ kẹ ọ rẹ ọhọrobọ rọye-e ẹkẹvuọvo vwẹ ọ rẹ ọhọre rẹ ohwo rọ vwẹ emu na hwaotọ vwẹ iphiẹrohọ;

²¹ fikiridie a cha rhan emama na nẹ ọviẹn vẹ egbo ko che vwo urinrin rẹ egbemọphẹ rẹ emọ rẹ Ọghẹnẹ.

²² Kidie avwanre riẹnre nẹ emama na ejobi herọ guan e rọ kianro kugbe rhi te asakiephana;

²³ ọ je dia emama na ọvo-o, ẹkẹvuọvo ekpuyovwi rẹ avwanre, ri vwo emamọ rẹ Erhi rẹsosuọ na, ra guan vwẹ obo evun hẹrhẹ ọke ra cha vwọ vwẹ avwanre ru emọ, kọye hẹ etanhirhe rẹ ugboma rẹ avwanre.

²⁴ Kidie iphiẹrohọ nana avwanre wan rhọ. Asakiephana iphiẹrohọ rẹ obo re rhiẹ ẹro mrẹ rha dia iphiẹrohọ-ọ. Kidie kono rha rhoma phiẹrohọ obo rọ mrẹ nure?

²⁵ Ẹkẹvuọvo avwanre de phiẹrohọ obo rẹ avwanre mrẹre-e, kẹ erhiori avwanre vwọ hẹrhẹ.

²⁶ Eriyin Erhi na je chọ avwanre uko vwẹ ovwiẹre rẹ avwanre; kidie avwanre riẹn obo ra nẹ erhovwo kirobo rẹ avwanre e ru-u, ẹkẹvuọvo ekpuyovwi rẹ Erhi na ra rẹ kẹ avwanre vẹ irhivwẹ ro kodo nọ eta.

²⁷ Ohwo rọ guọnọ otọ rẹ udu rẹ ihwo riẹn obo rẹ iroro rẹ Erhi epha, fikiridie Erhi na rẹ kẹ ihwo efuanfon kirobo rẹ ọhọre rẹ Ọghẹnẹ epha.

²⁸ Avwanre riẹnre nẹ emu kemu ejobi rẹ ohwo rọ guọnọ Ọghẹnẹ ruru ọ phiọn kẹ, ihwo re seri kirobo rẹ ẹguọnọ rọye epha.

²⁹ Kidie otu rọ riẹnre jovwo na ọ da kẹ ayen atarhe re ayen vwọ họhọ uhoho rẹ Ọmọ rọye, rere ọ sa dia ọmọkpako vwẹ ohri rẹ imoni buebu.

³⁰ Ihwo rọ kẹ atarhe jovwo na ọye o ji se; ihwo ro seri eye o brorhiẹ kẹ; ayen otu ro brorhiẹ kẹ eye ọ je vwẹ urinrin kẹ rhe.

Eguọnọ rẹ Ọghẹnẹ vwẹ Evun ri Kristi Jesu

³¹ Kidie a mre ta kpahe ọnana? Ọ da dianẹ Ọghẹnẹ vẹ avwanre obọ, kono se mukpahe avwanre?

³² Ohwo rọ vwẹ Ọmọ rọye ọvuọvo jahwa-a ẹkẹvuọvo o de siobọ no kẹ avwanre ejobi, o gbi rhe siobọ nẹ emu na ejobi vwọ ba?

³³ Kono se kere oruchọ ba ihwo rẹ Ọghẹnẹ sanọre obọ? Ọghẹnẹ ri se brorhiẹ.

³⁴ Kono e bruhwe? Ki Kristi Jesu, ro ghwuru, e, ra kpare nẹ ughwu rhe, rọ hẹ obọrhe rẹ Ọghẹnẹ, rọ ghene rẹ kẹ avwanre na?

³⁵ Kono sa hẹriẹ avwanre nẹ ẹguọnọ ri Kristi? Kẹ ukpokpoghọ, gbinẹ emiavwe, gbinẹ imu, gbinẹ omẹvwe, gbinẹ ẹban, gbinẹ okpetu, gbinẹ ọlọkọ?

³⁶ kirobo re siro, Fiki wẹ e vwo hwe avwanre ghwẹ vwẹ ẹdẹ na ejobi; ka vwẹ avwanre roro igodẹ re che hwe.

³⁷ Ejo, vwẹ evun rẹ imu na ejobi avwanre rhonọ ihwo re kpare obọ fiki rẹ ohwo rọ guọnọ avwanre.

³⁸ Kidie o mu uvwe ẹro nẹ eyẹ ughwu, eyẹ arhọ, eyẹ emakashe, eyẹ ivie, eyẹ emu rẹ ọke nana, eyẹ ọke rọ cha, eyẹ ogangan,

³⁹ eyẹ enuẹra, eyẹ ukokodo, eyẹrẹ emu ọfa vwẹ evun rẹ emama na ejobi, sa hẹriẹ avwanre nẹ ẹguọnọ rẹ Ọghẹnẹ vwi Kristi Jesu Ọrovwavwanre-e.