Ọbe ri Pọl si rhe Ihwo ri Rom 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A vwẹ Orẹvwe dje Idjedje

¹ Ovwan riẹnre, imoni mẹ–kidie me ta ota kẹ ovwan otu re riẹn urhi na–nẹ urhi vwo ogangan vwẹ enu rẹ ohwo uche ọke rọ dia akpọ na kri te?

² Ọke rẹ ọshare da hẹ akpọ na otọ rẹ urhi rọye aye rọye epha; ẹkẹvuọvo ọke rẹ ọshare de ghwu nure aye na gbe hẹ otọ rẹ urhi rọye ọfa-a.

³ Ọke rẹ ọshare na da hẹ akpọ, aye na de bru ọshare ọfa ra ke se igberadja. Ẹkẹvuọvo ọshare na de rhe ghwu nure, owẹne aye na reyọ oshare ọfa dede e gbi rhe se igberadja-a, kidie yọ gbe hẹ otọ rẹ urhi rọye ọfa-a.

⁴ Eriyin ọ epha, imoni mẹ, rẹ oma rẹ ovwan rẹ awanre vi Kristi vwo ghwu vwẹ agbagba nure na, urhi kọ rhabọ nẹ ovwan, kọye ovwan vwo se vwo ogangan vwo nene, ovwan vẹ ọye ki se kuoma gbe vwo ru iruo kẹ Ọghẹnẹ.

⁵ Ọke rẹ avwanre vwọ dia vwẹ ugboma na, ọmeme rẹ umwemwu ọbrabra na, rẹ urhi na kpare na, yo ru iruo vwẹ oma rẹ avwanre rọ mọ emamo kẹ ughwu.

⁶ Ẹkẹvuọvo asakiephana a rhan avwanre nẹ abọ rẹ urhi na, ri ghwu kẹ obo re gba avwanre phihọ ọviẹn, ọtiọye na ọ gbe dia otọ rẹ urhi rẹ awanre re siri na avwanre da ga-a ẹkẹvuọvo kẹ otọ rẹ arhọ ọkpokpọ re Erhi na.

Oghwa rẹ Umwemwu hẹ Obo evun

⁷ Kidie avwanre rha ta? Nẹ urhi na kẹ umwemwu? Kaka vwo! Dede na, ọ dianẹ kẹ urhi na vwo-o, me a gbe riẹn umwemwu-u. Ọ dianẹ urhi na re tare nẹ wo vwo urhuru-u me a gbe riẹn obo re se nẹ urhuru evwo-o.

⁸ Ẹkẹvuọvo umwemwu, rọ guọnọ asan vwẹ evun rẹ urhi na, o de ru oka koka rẹ urhuru evwo vwẹ evun mẹ. Urhi herọ-ọ yẹ umwemwu ghwuru.

⁹ Ọke rẹ urhi herọ-ọ me da rhọ, ẹkẹvuọvo ọke rẹ urhi vwọ rhe nu, umwemwu da rhọvwọ mi de ghwu;

¹⁰ urhi na dẹn rọ vwẹ arhọ kẹ vwẹ na da rha rhe so ughwu kẹ vwẹ.

¹¹ Kidie umwemwu, rọ guọnọ asan vwẹ evun rẹ urhi na, da phiẹn vwẹ oma rọye kọye me wan ghwu.

¹² Ọtiọye na urhi na kẹ ọfuanfon, iji na ke je hẹ ọfuanfon ọsoso yoyovwi.

¹³ Kẹ obo ri yoma na, kọye rha so ughwu kẹ vwẹ? Kaka vwo! Umwemwu, ro ru Iruo rẹ ughwu vwẹ evun mẹ na vwẹ oma rẹ obo ri yoma rere a vwọ sa mrẹ umwemwu vughe, rere vwẹ oma rẹ urhi na me rhe vwọ dia oruimwemwu rode na.

¹⁴ Avwanre riẹnre nẹ urhi na ọ rẹ erhi; ẹkẹvuọvo mẹvwẹ ugboma, ra shẹ kẹ umwemwu.

¹⁵ Mi vwo ẹruọ rẹ uruemu robọ mẹ-ẹ. Kidie mi ru obo re me guọnọ ru-u, ẹkẹvuọvo obo ri tu vwe oma kọye mi ruẹ.

¹⁶ Asakiephana ọ da dianẹ obo re me guọnọre-e kọye me rhoma ruẹ, kọye me rhọvwere nẹ urhi na oyoyovwi.

¹⁷ Ọ gbe dia omẹvwẹ ri ruo ọfa-a, ẹkẹvuọvo umwemwu rọ hẹ evun mẹ, kọye hẹ, evun rẹ ugbọma mẹ.

¹⁸ Me riẹnre nẹ emu ọvuọvo ro yovwiri hẹ evun mẹ-ẹ, kọye hẹ ugboma mẹ. Mi vughe obo ri yovwiri, ẹkẹvuọvo yi mi se ruo-o.

¹⁹ Kidie emu esiri ra guọnọ ru mi se ruo-o, ẹkẹvuọvo umiomiovwi re me guọnọ ru-n kọye mi ruru.

²⁰ Asakiephana ọ da dianẹ mi ru obo re me guọnọ ru-u, ọ gbe dia omẹvwẹ ri ruo ọfa-a, ẹkẹvuọvo kẹ umwemwu rọ hẹ evun mẹ.

²¹ Ọtiọye na kọ rhe dia urhi kẹ vwẹ nẹ ọke me vwọ guọnọ emu esiri ru, umwemwu kọye ro ovwẹ obọ.

²² Kidie oma rẹ urhi rẹ Ọghẹnẹ vwerha ovwẹ, vwẹ obo otọ rẹ evun mẹ,

²³ ẹkẹvuọvo me rhe mrẹ urhi ọfa vwẹ ekuakua rẹ oma mẹ ro nene urhi rẹ udu mẹ họnra ro vwẹ ovwẹ ru ọviẹn kẹ urhi rẹ umwemwu rọ hẹ evun rẹ ekuakua rẹ oma mẹ.

²⁴ Orharhe rẹ ohwo re me epha! Kono che sivwi uvwe nẹ oma rẹ ughwu nana?

²⁵ Me kpẹvwẹ Ọghẹnẹ fiki ri Jesu Kristi Ọrovwavwanre. Vwẹ ọtiọye na, me vwẹ oma mẹ ga urhi rẹ Ọghẹnẹ vẹ udu mẹ ejobi, ẹkẹvuọvo ugboma mẹ ke me vwọ ga urhi rẹ umwemwu.