Ọbe ri Pọl si rhe Ihwo ri Rom 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ughwu kẹ Imwemwu ẹkẹvuọvo Arho vwi Kristi

¹ Kidie avwanre rha ta? Kẹ avwanre djẹ umwemwu eruoruo rere ẹserọphẹ vwo bu phihọ?

² Kaka vwo! Komavọ avwanre ri ghwu kẹ umwemwu obọvo nure na rhe vwo ru imwemwu ọfa?

³ Ovwan rha riẹn nẹ avwanre ejobi re reyọ ame vwẹ odẹ ri Jesu Kristi na je reyọ ame vwọ kẹ ughwu rọye?

⁴ Vwẹ oma rẹ ame-ẹreyọ rọye e vwo shi avwanre kugbe vwẹ evun rẹ ughwu rọye, kọye re kirobo rẹ vwẹ obọ rẹ urinrin vẹ ogangan rẹ Ọsẹ na vwọ kpare Kristi vrẹn na, eriyin na avwanre ki ji vwo arhọ ọkpokpọ fiki rọye.

⁵ Avwanre vẹ ọye de kuoma gbe vwẹ evun rẹ ughwu rọye, avwanre vẹ ọye ki ji kuoma gbe vwẹ evun rẹ evrẹnushi rọye.

⁶ Avwanre riẹnre nẹ a kanre oma rẹ avwanre rẹ awanre na mu agbagba vẹ ọye rere oma rẹ umwemwu rẹ avwanre vwọ mrasan ghwọrọ, rere avwanre vwo jẹ ọviẹn rẹ umwemwu ẹdia.

⁷ Kidie ohwo ro ghwu nure ya rharọ nẹ abe rẹ umwemwu.

⁸ Ẹkẹvuọvo avwanrẹ vi Kristi de ghwu, o ji mu avwanre ẹro nẹ avwanre vẹ ọye je rhọ kugbe.

⁹ Kidie avwanre riẹnre nẹ. Kristi vwo vrẹn nẹ ughwu na o gbi che ghwu ọfa-a; ughwu rhe vwo ogangan vwẹ enu rọye ọfa-a.

¹⁰ Ughwu ro ghwuru na o ghwu kẹ umwemwu obọvo nure, ẹkẹvuọvo akpọ rọ rhoma yerẹ na ko yere vwọ kẹ Ọghẹnẹ.

¹¹ Ọtiọye na we gbe ji roro oma rẹ ovwan nẹ we ji ghwu kẹ umwemwu jovwo, ẹkẹvuọvo ovwan da rha rhọ fiki ri Kristi Jesu vwọ kẹ Ọghẹnẹ.

¹² We rhe je umwemwu dia ugboma rẹ ovwan ọfa-a, rere ojevwe rẹ ugboma na vwo jẹ ovwan esio ghwro.

¹³ Ovwan rha vwẹ oma rẹ ovwan ru iruo rẹ umwemwu-u, ẹkẹvuọvo ovwan ru oma rẹ ovwan fuanfon kẹ Ọghẹnẹ kerẹ ihwo ri vrẹn nẹ ughwu kpo arhọ nure, re ovwan rha vwẹ ekuakua rẹ oma rẹ ovwan ru iruo rẹ ọvwata kẹ Ọghẹnẹ.

¹⁴ Kidie umwemwu gbi che vwẹ ogangan vwẹ enu rẹ ovwan ọfa-a, kidie ovwan gbe hẹ otọ rẹ urhi-i ẹkẹvuọvo kẹ otọ rẹ ẹserọphẹ ovwan epha.

Eviẹn rẹ Ọvwata

¹⁵ Kidie ọfa? Avwanre gbe rhoma ru umwemwu fikiridie avwanre gbe hẹ otọ rẹ urhi-i ẹkẹvuọvo otọ rẹ ẹserọphẹ? Kaka vwo!

¹⁶ Ovwan rha riẹn nẹ ovwan ọviẹn rẹ ohwo rẹ ovwan reyọ oma rẹ ovwan vwo mu ọghọ kẹ, eyẹ ọ rẹ umwemwu, ro suẹ ohwo kpo ughwu, eyẹ ọ rẹ ọghọ, ro nẹrhẹ ohwo dia ọvwata?

¹⁷ Ẹkẹvuọvo ẹkpẹvwẹ kẹ Ọghẹnẹ, nẹ ovwan re dia eviẹn rẹ umwemwu jovwo na rhoma rhe vwẹ udu rẹ ovwan mu ọghọ kẹ oka rẹ uyono re yono ovwan jovwo,

¹⁸ re vwo si ovwan nẹ obọ rẹ umwemwu nure na, ovwan gba vwẹ oma ru ọviẹn kẹ ọvwata.

¹⁹ Ọnana ephẹrẹ okokodo me jẹ kẹ ovwan na. Kidie kirobo rẹ ovwan vwọ reyọ oma rẹ ovwan vwo ru obo ri je ovwan, rẹ ovwan vwọ dia eviẹn rẹ umwemwu jovwo na, ọtiọye vwẹ asakiephana ovwan gba vwẹ oma rẹ ovwan kẹ ọvwata vẹ ẹfuọn.

²⁰ Ọke rẹ ovwan vwọ hẹ eviẹn rẹ umwemwu jovwo na, ovwan rha davwerhọn rẹ ọvwata-a.

²¹ Ki didi erere ri te ovwan vwẹ uruemu rẹ omaẹvuọ yena? Ughwu ọye hẹ oba rẹ oghẹre rẹ emu ọtiọye na.

²² Asakiephana re vwo si ovwan nẹ ọviẹn rẹ umwemwu nu na rẹ ovwan rha rhe vwọ dia ọviẹn rẹ Ọghẹnẹ na, osa rẹ ovwan kẹ orufuọn, oba rọye kẹ arhọ ri bẹdẹ.

²³ Kidie osa rẹ umwemwu hẹ ughwu, ẹkẹvuọvo ẹserọphẹ rẹ Ọghẹnẹ na ọye hẹ arhọ ri bẹdẹ vwẹ evun ri Jesu Kristi Ọrovwavwanre.