Ọbe ri Pọl si rhe Ihwo ri Rom 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oniru rẹ Ebraham

¹ Kidie avwanre ta kpahe Ebraham, ọsẹ rẹ avwanre rode vwẹ ọ rẹ ugboma?

² Kidie ọ da dianẹ Ebraham rease vwi fiki rẹ iruo, yo vwo obo rọ vwọ yan eyan, yẹ ẹkẹvuọvo yọ dia obaro rẹ Ọghẹnẹ-ẹ.

³ Kidie ọbe ọfuanfon na tare? Ebraham se Ọghẹnẹ gbuyota, e de kere phihọ ọvwata kẹ.

⁴ Vwọ kẹ ohwo ro ru iruo, e rhe se nẹ ẹse-e ẹkẹvuọvo kẹ osa.

⁵ Ẹkẹvuọvo vwọ kẹ ohwo ro ru iruo-o ẹkẹvuọvo rọ da vwẹ ẹro so ohwo rọ vwẹ ase kẹ ohwo umwemwu, esegbuyota rọye ke kere phihọ ọvwata.

⁶ Ọtiọye Devid je nẹ ẹrhovwo kẹ ohwo rẹ Ọghẹnẹ kere phihọ ọvwata yọ dia fiki rẹ iruo-o:

⁷ Ebruba kẹ ayen otu ra vwẹ orukuruku ghovwo, re rhurhu imwemwu rayen kẹ;

⁸ ebruba kẹ ohwo rẹ Ọrovwohwo kere umwemwu ba obọ-ọ.

⁹ Ka nẹ ẹrhovwo nana kẹ ihwo re yanvwere ọvo eyẹ ji te ijẹyanvwọ rhe? Avwanre tare nẹ esegbuyota ọye e vwo kere Ebraham phihọ ọvwata.

¹⁰ Komavọ e kere kẹ? Ọke rọ vwọ yanvwe nu gbinẹ ọke rọ je yanvwe-e? Ọ dia ọke rọ vwọ yanvwe nu-u, ẹkẹvuọvo ọke rọ je yanvwe-e.

¹¹ Ọ da reyọ oyanvwe na kerẹ oka kọye iseri rẹ ọvwata rọye ro vwori vwi fiki rẹ esegbuyota vwẹ ọke rọ je yanvwe-e. Rere ọ vwọ sa dia ọsẹ rẹ ayen ejobi ri segbuyota jẹ eyanvwere-e re kere phihọ ọvwata kẹ ayen.

¹² Ọsẹ rẹ ihwo re yanvwere ọ dia oyanvwe ghevweghe-e ẹkẹvuọvo ri nene oniru rẹ esegbuyota rẹ ọsẹ rẹ avwanre Ebraham vwori tavwe ra ke yanvwọ.

A mrẹ Ive na Vughe vwẹ Oma rẹ Esegbuyota

¹³ Ive re ve kẹ Ebraham vẹ uvwiẹ rọye, nẹ ayen reuku rẹ akpọ na, wan oma rẹ urhi rhe-e ẹkẹvuọvo vwẹ oma rẹ ọvwata rẹ esegbuyota.

¹⁴ Ọ da dianẹ ihwo re yọnrọn urhi na ọvo re cha dia ireuku na, yẹ esegbuyota kẹ emu diodi yẹ a pha urhi na.

¹⁵ Kidie urhi na ghwa ophu cha, ẹkẹvuọvo asan rẹ urhi epha-a urhiẹchọ sa dia-a.

¹⁶ Kọye sorọ rẹ emu na vwọ hẹ obọ rẹ esegbuyota, rere ive na vwọ sa vwẹ oma da ẹserọphẹ rọ dia kri kẹ uvwiẹ rọye ejobi– ọ dianẹ kẹ ihwo re yọnrọn urhi na ọvo-o ẹkẹvuọvo je kẹ ayen otu ri vwo esegbuyota rẹ Ebraham, kidie ọye hẹ ọsẹ rẹ avwanre ejobi,

¹⁷ kirobo re siro, Me vwẹ owẹ ru ọsẹ rẹ ẹghorho buebu–vwẹ obaro rẹ Ọghẹnẹ ru wo segbuyota, rọ vwẹ arhọ kẹ orivwi ro ma emu ra mama jovwo-o phihọ akpọ na.

¹⁸ Vwẹ iphiẹrohọ o de segbuyota jo rhẹro, rere ọ rhe vwọ dia ọsẹ rẹ ẹgborho buebu; kirobo ra ta kẹ jovwo, Ọtiọye uvwiẹ wẹn cha dia.

¹⁹ Oma gbe rha rhọ esegbuyota rọye-e vwẹ ọke ro vwo roro oma rọye, rọ ghworo yẹyẹghẹ djẹ itu fikiridie ọ joma te ikpe ujori, eyẹ ọke ro vwo roro Sera ro ji vwiẹ ọmọ-ọ.

²⁰ Udu rọye rhe yeghe kpahe ive rẹ Ọghẹnẹ vẹ kẹ-ẹ, ẹkẹvuọvo esegbuyota rọye da rhe gan phihọ ọ da vwẹ urinrin kẹ Ọghẹnẹ.

²¹ O de muẹro gbae nẹ Ọghẹnẹ se ru obo ro veri na kẹ gba.

²² Kọye sorọ re vwo kere esegbuyota rọye phihọ ọvwata kẹ.

²³ Ẹkẹvuọvo eta na, e kere kẹ na, ọ dia fiki rọye ọvo e vwo sio-o,

²⁴ ẹkẹvuọvo je vwi fiki rẹ avwanre rhe. E ji kere kẹ avwanre ri se ọ rọ kpare Jesu Ọrovwavwanre nẹ ughwu gbuyota,

²⁵ re hwe ghwu fiki rẹ oruchọ rẹ avwanre ra kpare vrẹn fiki rẹ ase-ẹriọ rẹ avwanre.