Ọbe ri Pọl si rhe Ihwo ri Rom 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Kidie hẹ erere rẹ ihwo rẹ Ju vwori? Eyẹ ki didi erhuvwu rhọ hẹ oyanvwe?

² Obuebu vwi kabọ kabọ. Ọ rẹsosuọ, ihwo ri Ju a ka vwẹ aroẹmrẹ rẹ Ọghẹnẹ na kẹ.

³ Kidie rha phia ọ da dianẹ evo vwẹ usun rẹ ayen rhe vwo esegbuyota-a? Ki jesegbuyota evwo rayen se miovwo esegbuyota rẹ Ọghẹnẹ?

⁴ Kaka vwo! Gbe jẹn Ọghẹnẹ dia uyota re kohwo kohwo dia ọvwọnrọn ofian, kirobo re siro, Rere wọ vwọ sa rease vwẹ eta wẹn, vwo phi kparobọ vwẹ ọke ra da vwẹ owẹ guẹdjẹ.

⁵ Ẹkẹvuọvo ọ da dianẹ orukuruku rẹ avwanre de dje ase rẹ Ọghẹnẹ phia, kidie avwanre ta? Kẹ Ọghẹnẹ ruchọ ọ da dianẹ ophu rẹ avwanre muro? (Me ta ọnana kerẹ ohwo rẹ akpọ.)

⁶ Kaka vwo! Komavọ Ọghẹnẹ tobọ brorhiẹ rẹ akpọ na vwo?

⁷ Ẹkẹvuọvo kẹ ọvọ ovwan ta na ọ da dianẹ ofian re me vwọnre sa vwẹ uyota rẹ Ọghẹnẹ vẹ urinrin rọye phia, kidie e rhe vwo brẹ hwe vwe kerẹ oruimwemwu?

⁸ Kidie sorọ e gbi ruẹ imwemwu rere erhuvwu rhe-e?–kirobo rẹ ihwo evo barẹ avwanre ota nẹ avwanre tare. Obruhwe rayen gbare.

O vwo Ohwo Ọvuọvo ro ruẹ obo re Gbare-e

⁹ Kidie oyena firi? Avwanre ihwo ri Ju ri me yovwi? Ẹjo, kaka vwo; kidie me ta nure nẹ ihwo ejobi, te ihwo ri Ju kugbe ihwo ri Grik, hẹ otọ rẹ ogangan rẹ umwemwu,

¹⁰ kirobo re siro: O vwo ohwo ọvuọvo rọ dia ovwata-a, ẹjo, kaka ohwo;

¹¹ o vwo ohwo ọvuọvo ro vwo ẹruọ-ọ, o vwo ohwo ọvuọvo ro guọnọ Ọghẹnẹ-ẹ.

¹² Ayen ejobi bioma hẹ akakọ, ayen ejobi yan chọ; o vwo ohwo ọvuọvo ro ru ọ re esiri-i, kaka ohwo ọvo.

¹³ Upho rayen rhie phihọ ghwroro, ayen vwẹ ẹrenvwe rayen vwọ phiẹn ihwo. Obi rẹ ọrobiebi hẹ otọ rẹ ẹbẹrunu rayen

¹⁴ Unu rayen vọnre vẹ ekan kugbe eta ebrabra.

¹⁵ Ayen broma re hwe ihwo,

¹⁶ Ẹghwọrọ vẹ ẹnsọn hẹ idjerhe rayen,

¹⁷ ayen riẹn idjerhe rẹ ufuoma-a.

¹⁸ Oshọẹdjẹ rẹ Ọghẹnẹ hẹ ibiẹro raye-en.

¹⁹ Asakiephana avwanre riẹnre nẹ kemu kemu rẹ urhi tare ọ tarọ kẹ ayen otu re hẹ otọ rẹ urhi, rere unu ri kohwo kohwo rọ phraphro vwo rhurhu, rere ihwo rẹ akpọ ejobi vwọ hẹrhẹ orhiebro ro nẹ obọ rẹ Ọghẹnẹ rhe.

²⁰ Kidie ọ vwo ohwo ọvuọvo rọ rease vwẹ obaro rọye fiki rẹ iruo rẹ urhi-i, fikiridie urhi na re nẹrhẹ e vwo eriẹnriẹn kpahe umwemwu.

Ẹfuọn vwẹ Oma rẹ Esegbuyota

²¹ Ẹkẹvuọvo asakiephana a vwẹ ọvwata rẹ Ọghẹnẹ phia vwẹ obuko rẹ urhi, dede na te urhi na te emraro na se oseri kẹ,

²² ọvwata rẹ Ọghẹnẹ vwẹ oma rẹ esegbuyota vwi Jesu Kristi ọ herọ kẹ ihwo ejobi ri segbuyota. Ọ vwo ofẹnẹ-ẹ.

²³ Kidie ihwo ejobi ru umwemwu o rhe jẹ urinrin rẹ Ọghẹnẹ dia oma rẹ avwanre-e.

²⁴ Ẹkẹvuọvo ase rẹ avwanre kẹ oma rẹ ẹserọphẹ vwẹ ẹkuoma rẹ ẹtanhirhe rọ hẹ Kristi Jesu.

²⁵ Ohwo rẹ Ọghẹnẹ vwẹ ọbara rọye vwọ hwa osa na, re a sa vwẹ esegbuyota vwọ reyọ. Ọnana kọye e vwo dje ọvwata rẹ Ọghẹnẹ, fikiridie vwẹ evun rẹ akoechiro rọye ọ da vwẹ imwemwu rẹ awanre ejobi vwọ vrẹn avwanre;

²⁶ ko vwiro dje vwẹ ọke nana nẹ ekpuyovwi rọye ọvwata nẹ ọ sa vwẹ ase kẹ ohwo ro vwo esegbuyota kpahe Jesu.

²⁷ Eriyin na kẹ otọ rẹ eyan rẹ avwanre na rhọ? E si ọyena no. Ki didi idjerhe? Vwẹ idjerhe rẹ iruo? Ẹjo, ẹkẹvuọvo vwẹ idjerhe rẹ esegbuyota.

²⁸ Kidie a reyerọ nẹ esegbuyota ọye ohwo vwọ rease ọ dia fiki rẹ iruo rẹ urhi-i.

²⁹ Eyẹ Ọghẹnẹ kẹ Ọghẹnẹ rẹ ihwo ri Ju ọvo? Ọ rha je dia Ọghẹnẹ rẹ ihwo ri Keferi-i? E, je hẹ Ọghẹnẹ rẹ ihwo ri Keferi rhe.

³⁰ Kidie Ọghẹnẹ ọvuọvo; ọye sa vwẹ ase kẹ ihwo re yanvwere fiki rẹ esegbuyota rayen kugbe ijẹyanvwọ fiki rẹ esegbuyota rayen.

³¹ Kẹ avwanre vwi fiki rẹ esegbuyota phan urhi na? Kaka vwo! Vwẹ owọ ọfa, avwanre ke yọnrọn urhi na.