Ọbe ri Pọl si rhe Ihwo ri Rom 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oma Evwokpotọ kẹ Ihwo ri Suẹn

¹ E jẹn kohwo kohwo vwẹ oma kpotọ kẹ otu ra vwẹ ogangan rẹ isuesun kẹ. Kidie ogangan ọfa herọ-ọ jokpa rẹ ọ ro nẹ obo rẹ Ọghẹnẹ rhe, ayen otu ri suẹn na Ọghẹnẹ re vwẹ ayen mu.

² Fiki rẹ ọtiọye na ohwo ro yivwaro kpahe otu ra vwẹ ogangan rẹ isuesun kẹ na yivwaro kpahe otu rẹ Ọghẹnẹ vwo mu, ayen otu ri yivwaro kpahe ayen ka vwẹ ayen guẹdjọ.

³ Kidie isun na se mue kpahe ihwo esiri-i, ẹkẹvuọvo vwọ kpahe ihwo ebrabra. Oshọ rẹ otu ra vwẹ ogangan rẹ isuesun kẹ na rhe mu uwe? Gbe ru obo ri yoma, kẹ ayen jiri uwe.

⁴ Kidie ayen hẹ ọrhuẹre akpọ rẹ Ọghẹnẹ vwo mu. Ẹkẹvuọvo wo de ruchọ, gba djẹ gan, kidie ọ dianẹ ọ de yọnrọn ọlọkọ na ghevweghe-e; ọrhuẹrẹ akpọ rẹ Ọghẹnẹ o ruẹ, ọye re ria ihri rẹ umwemwu ejobi vwẹ obọ rẹ ohwo ro ruchọ.

⁵ Fiki rẹ ọtiọye na wa vwẹ oma kpotọ kẹ ayen, ọ dianẹ fiki rẹ oshọ rẹ unuakpọ-ọ ẹkẹvuọvo ọghọ oma guọnọre.

⁶ Kidie ọna sorọ rẹ ovwan vwọ hwa igho rẹ ẹgbukpe rhe, kidie ogangan rẹ isuesun na hẹ igbe-odibo rẹ Ọghẹnẹ ra ta nẹ e vwẹ ẹro te emu nana dẹn.

⁷ Jẹn ẹkẹn arhọghọ wẹn kẹ ayen, ọ ra hwa osa rẹ uyovwi kẹ hwa kẹ, ọ ra jẹ arhọghọ kẹ jẹ kẹ, ọ rẹ oshọ fori djẹ kẹ, ọ ro fo ọghọ vwẹ ọghọ kẹ.

Eguọnọ rẹ Iniọvo

⁸ Wọ ria osa rẹ ohwo ọvuọvo-o, jokpa nẹ osa rẹ ẹguọnọ wa re ohwohwo; kidie ọ rọ guọnọ ọrivẹ rọye ọye hẹ orugba rẹ urhi na.

⁹ Fiki rẹ ọtiọye na, Wo gbe ọfarhiẹ-ẹ, Wo hwe ohwo-o, Wo cho uji-i, Wo jẹ emu rẹ ohwo ọfa da wẹ ẹro-o, ọ da dianẹ urhi ọfa herọ yẹ ọna, Wọ me guọnọ ọrivẹ wẹn kirobo ru wọ guọnọ oma wẹn.

¹⁰ Ẹguọnọ ruẹ obo re chọre kẹ ọrivẹ rọye-e; ọtiọye ẹguọnọ hẹ orugba rẹ urhi na.

Ẹdẹ ri Kristi na si Kẹre rẹ

¹¹ Ovwan riẹn nẹ o te ọke rẹ ovwan vwọ rhọvwọ nẹ ovwerhẹ rẹ. Kidie ọke nana esivwo rẹ ovwan vwọ kẹre nọ ọke rẹ ovwan vwo segbuyota vwẹ obọ;

¹² ọke na kpo krire, ọke na che rhiere. E gbe jẹn avwanre siobọ nẹ iruo rẹ ebri na re avwanre ku ewun rẹ urhukpẹ na phihọ.

¹³ E gbe jẹn avwanre vwẹ oma kpotọ yan vwẹ uvo koko na, ọ dia o rẹ emu ẹriọ kugbe udi-ẹda-a, ọ dia ophiẹvwe kugbe ozighi-i, ọ dia ohọre kugbe omaeriọ-ọ.

¹⁴ Ẹkẹvuọvo gbe ku Ọrovwavwanre Jesu Kristi phihọ, wọ vwẹ asan kẹ ugboma-a rere ẹguọnọ rẹ ugboma vwo je ovwan esioghwro.