Ọbe ri Pọl si rhe Ihwo ri Rom 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Imoni mẹ, udu mẹ guọnọre nẹ me nẹ ẹrhovwo kẹ Ọghẹnẹ fiki rẹ esivwo rẹ ihwo mẹ.

² Mi se se oseri nẹ oruru rẹ ẹga rẹ Ọghẹnẹ rhe ayen, ẹkẹvuọvo idjerhe rẹ ughenghẹn kọye ayen neneri.

³ Kidie, rẹ ayen vwọ dia ogbori rẹ ọvwata ro nẹ obọ rẹ Ọghẹnẹ rhe na, rẹ ayen vwọ guọnọ ọ robọ rẹ ayen ruẹ na, ayen rha vwẹ oma kpotọ kẹ ọvwata rẹ Ọghẹnẹ-ẹ.

⁴ Kidie, Kristi hẹ oba rẹ urhi na, rere ohwo kohwo ro vwo esegbuyota vwọ sa rease.

Esivwo kẹ Ihwo Ejobi

⁵ Mosis siro nẹ ohwo ro ru ọvwata rẹ urhi na guọnọre kọ rhọ fiki rọye.

⁶ Ẹkẹvuọvo ọvwata rọ wan oma rẹ esegbuyota rhe tare, Wọ rha ta vwẹ evun rẹ udu wẹ-ẹn, Kono ri yeri kpo obo odjuvwu re se Kristi rhe otọ!

⁷ eyẹ, Kono ri divwi kpo obo orivwi re se Kristi nẹ ughwu rhe?.

⁸ Ẹkẹvuọvo kidie ọ tare? Ota na si kẹre owẹ, vwẹ ẹbẹrunu wẹn kugbe udu wẹn (kọye hẹ, ota rẹ esegbuyota rẹ avwanre ghwoghwo na).

⁹ Wo de ghine rhọvwe vwẹ unu wẹn nẹ Jesu hẹ Ọrovwohwo wo de rhe segbuyota vwẹ udu wẹn nẹ Ọghẹnẹ kpaerọ nẹ ughwu rhe, ku wọ rhọ.

¹⁰ Kidie udu ohwo vwo segbuyota kọye ọ vwọ rease, ọ me rha vwẹ unu rhọvwe kọye ọ vwọ rhọ.

¹¹ Ọbe ọfuanfọn na tare, Kohwo kohwo ro sere gbuyota oma gbe sa vuọ-ọ.

¹² Kidie ofẹnẹ herọ kẹ ihwo ri Ju vẹ ihwo ri Griki-i; Ọrovwohwo ọvuọvo na ọye hẹ Ọrovwohwo ro vwo emu ejobi, ọ vwẹ efe rọye kẹ ihwo ejobi ri se odẹ royẹ.

¹³ Kidie, kohwo kohwo ro se odẹ rẹ Ọrovwohwo kọ rhọ.

¹⁴ Ẹkẹvuọvo komavọ ayen se se ohwo rẹ ayen segbuyota-a? Komavọ ayen se se ohwo rẹ ayen nyo urhuru rọye-e gbuyota? Komavọ ayen se nyo yẹ ohwo ghwoghwo kẹ aye-en?

¹⁵ Komavọ ayen se ghwoghwo jokpa nẹ e ji ayen? kirobo re siro, mavọ awọ rẹ ayen otu ri ghwoghwo iyẹnrẹ esiri na yovwi te!

¹⁶ Ẹkẹvuọvo ọ dia ayen ejobi re kerhọn rẹ iyẹnrẹ esiri na-a; kidie Aizaya tare, Ọrovwohwo, ono se iyẹnrẹ esiri rẹ avwanre ghwoghwori na gbuyota?

¹⁷ Ọtiọye na esegbuyota kẹ ẹme-enyo o nẹ cha, ẹme-enyo ke rha vwẹ iyẹnrẹ esiri ri Kristi re ghwoghwori na o nẹ cha.

¹⁸ Ẹkẹvuọvo me nọre, ayen nyori-i ? Dẹn, ayen nyori, kidie E nyo umri rayen wan akpọ na ejobi, eta rayen rhiri re te oba rẹ akpọ na.

¹⁹ Ke me rhoma nọ, kọye Izrẹl rhe vwo ẹruọ-ọ? Ẹsosuọ Mosis tare, Mi ru uwe vwọ reoma kpahe otu ri jẹ ẹgborho ẹdia; ẹgborho djidji ki mi ru ayen vwọ hiẹ wẹ ivun.

²⁰ Kọye Aizaya vwọ ta vẹ aroeyivwo nẹ Ihwo re guọnọ ovwẹ-ẹ ke mrẹ vwẹ, Ihwo rẹ nọ ekpẹn mẹ-ẹ ke me vwẹ oma mẹ nẹ ayen.

²¹ Ẹkẹvuọvo je vwẹ Izrẹl na ọ ta kẹ, Kẹdẹ kẹdẹ ejobi me vwọ bẹrẹ abọ mẹ vwọ ta eta kẹ ihwo na ri jẹ ọghọ e vwo na kugbe ihwo echọchọ na.