Nehemaya 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹzra a fan umwemwu rẹ Izrẹl

¹ Asakiephana vwẹ ẹdẹ uje gbẹ ẹne rẹ emeranvwe na ihwo re Izrẹl ejobi da rhe ghwẹ koko vẹ owẹvwe echiro vẹ emwa rẹ uvweri, vẹ ekpẹn ra ghwẹ kuhọ iyovwi rayen.

² Ihwo re Izrẹl ejobi da hẹriẹ oma nẹ otu rẹ erhorha, ayen de vrẹn mudia rhọvwe imwemwu rayen kugbe orukuruku re ese rayen.

³ Ayen de vrẹn mudia vwẹ asan rẹ ayen epha ayen de se nẹ ọbe rẹ urhi rẹ Ọrovwohwo Ọghẹnẹ rayen rhe vwe ẹkẹne rẹ ẹdọke, ẹkẹne rẹ ẹdọke rẹ ọke na ayen da rhọvwe imwemwu ayen da ga Ọrovwohwo Ọghẹnẹ rayen.

⁴ Enu re ovwevwe re ihwo ri Livae na ọye Jeshua, Bani, Kadmiẹl, Shebanaya, Bunni, Shẹrebia, Bani, kugbe Chenani mudia phihọ, ayen da va kperi se Ọrovwohwo Ọghẹnẹ rayen.

⁵ Etiyin ihwo ri Livae, Jeshua, Kadmiẹl, Bani, Hashabneiya, Sherebia, Hodia, Shebanaya, kugbe Petahia, da ta, Vrẹn mudia re we bruphihọ kẹ Ọrovwohwo Ọghẹnẹ rẹ ovwan nẹ bẹdẹ re te bẹdẹ. Ebruphihọ kẹ odẹ rẹ urinrin wẹn ra kpare kpenu nọ ebruphihọ kugbe ejiro ejobi.

⁶ Ẹzra da ta: Wọwẹ hẹ Ọrovwohwo, wọwẹ ọvo kpogholo, wọwẹ re ma odjuvwu, odjuvwu rẹ idjuvwu na, vẹ urogho rayen ejobi, akpọ na vẹ obọ re hẹ enu rọye, ebadi na vẹ obo re hẹ evun re ayen, wọwẹ re sẹro rẹ ayen ejobi, urogho rẹ odjuvwu na ejobi ga wẹ.

⁷ Wọwẹ hẹ Ọrovwohwo, Ọghẹnẹ ro jẹ Ebram reyọ rọ da reyọ ne otọ re ihwo ri Kaldia rhe wo de mu odẹ Ebraham vwọ kẹ,

⁸ wọwẹ re mrẹ udu rọye nẹ o vwo esegbuyota vwẹ obaro wẹ, wo vẹ ọye da re ọphọ nẹ wọ vwẹ otọ ri Kenan kẹ uvwiẹ rọye, ihwo ri Hẹt, ihwo re Amọr, ihwo ri Pẹrẹz, ihwo ri Jebu, kugbe ihwo ri Girgash; wo ghine ru ive wẹn gba, kidie ọvwata wo ruẹ.

⁹ Wọ da ghine mrẹ oma elagha rẹ ese re avwanre vwẹ Ijipt wo de nyo oviẹ rayen vwẹ Abadi Ọvwavware na,

¹⁰ wo de ghine ru emu rẹ oka ve igbunu kpahe Fero kugbe idibo rọye ejobi kugbe ihwo re otọ rọye ejobi, kidie wọ riẹnre ne ayen di mukpahe ese re avwanre ekueku, wọwẹ ọvo ri ghine re odẹ ke oma we, kirobo rọ epha nonẹ na.

¹¹ Wọ da ghine ghare abadi na vwe obaro re ayen, ọtiọye na ayen da wan evun re abadi na vrẹn vwẹ otọ ọyaya; otu re vwọ tua ayen na wọ da kpare ayen phihọ evun rẹ odo, kerẹ ubio-ragha ro she phihọ ọgudu re ame.

¹² Vwẹ osusu re egho ọye wọ vwo sun ihwo wẹn vwẹ ogheruvo, osusu re erhanre vwe ason kọye urhukpẹ rọ dje idjerhe ke ayen.

¹³ Wọwẹ ri ghine wotọ ne Ugbenu ri Sinae rhe, wo de nene ayen ta ota ne obo odjuvwu rhe wo de ji omamọ re Iji kẹ ayen kugbe irhi rẹ uyota, omamọ re ẹgha kugbe irhi,

¹⁴ Wọwọ ri ruro kẹ ayen rere ayen vwọ riẹn ẹdidjala ọfuanfon na kugbe urhi ru wo ji kẹ ayen kugbe egha kugbe irhi ra wan oma re odibo wẹn Mosis ji ke ayen.

¹⁵ Wọwẹ re vwẹ ikara nẹ odjuvwu rhe ro fue owẹvwe rayen wọ da kẹ ayen ame vẹ evun rẹ oragha rhe rere o fue urhuru rayen, wọwẹ re je ta ke ayen nẹ ayen ra reyọ otọ ru wo veri nẹ wọ vwọ kẹ ayen.

¹⁶ Ẹkẹvuọvo te ayen kugbe esẹ rẹ avwanre de ru farhiẹn farhiẹn ayen de ru udu rayen gangan ayen gbẹ davwerhọn re irhi wẹ-ẹn,

¹⁷ ayen sen ọghọ, ayen gbi roro iruo rẹ igbunu ru wo ru vwẹ ohri rẹ aye-en; ẹkẹvuọvo ayen da gan udu ayen da vwẹ osun mu no sun ayen rhivwi kpo ọviẹn vwẹ Ijipt. Ẹkẹvuọvo wẹ Ọghẹnẹ rọ choma ro vwo ghovwo, ro vwo ehrọre vẹ arodọvwẹ, ọ fobọ mu ophu-u rọ vọnre vẹ ẹguọnọ ro jẹrhẹriẹ, wọ gbẹ sen aye-en.

¹⁸ Mrẹmrẹ re ọke re ayen vwo duvwu upene rẹ erhuẹn ra wranre kẹ oma rẹ ayen tanẹ, Ọnana Ọghẹnẹ wẹn rọ reyọ owẹ nẹ Ijipt rhe, ru we vwo gbẹ ẹgua rode na,

¹⁹ wọwẹ vwẹ evun rẹ arodọvwẹ wẹn rode na sa sen ayen vwẹ evun rẹ aghwa-a, osusu rẹ egho ro sun ayen vwẹ idjerhe vwẹ oghẹruvo na yan je ayen vwo-o, eyẹ osusu re erhanre rọ dia urhukpẹ ke ayen vwẹ idjerhe re ayen wanre na-a.

²⁰ Wọwẹ re ke ayen Erhi esiri na rere o yono ayen, wo si mana na nẹ unu raye-en, wo da keẹ ayen ame vwo fue urhuru rayen.

²¹ Ikpe ujuvẹ soso wọ ghẹrẹ ayen vwe evun rẹ aghwa, emu ọvuọvo kanre aye-en, emwa rayen bẹre dje ayen oma-a awọ rayen vwọre-e.

²² Wọwẹ re kẹ ayen uvie kugbe ihwo, wọ da ghare asan re otọ na teri ejobi kẹ ayen, ọtiọye ayen de vwo otọ ri Sihọn ovie ri Heshbọn kugbe otọ ri Ọg ovie ri Bashan.

²³ Wọwẹ ri ru uvwiẹ rayen bu phihọ kerẹ isio re obo odjuvwu, wọ da vwẹ ayen rhe otọ ru wọ ta kẹ esẹ rayen ne ayen ruọ rere ayen vwo.

²⁴ Ọtiọye na uvwiẹ rayen da yanran re vwo otọ na, wọ da djẹ ihwo re dia otọ na jovwo no, ihwo ri Kenan, wo de phi ayen phihọ obọ rayen, vẹ ivie rayen kugbe Ihwo rẹ otọ na, rere ayen ru obo ri je ayen kẹ ayen.

²⁵ Ayen de mie ayen irere ra gba ogba phihọ kugbe otọ oyoyovwi, ayen da kua ro iwevwi re vọnre vẹ emu esiri, iphrophro rẹ ame ra tọn phihọ otọ, ogba ri vain, ọgbọ rẹ oliv ve irhe re mọ emamọ buebu, otiọye ayen da re, evun da vọn ayen ayen da rhe dia tubie tubie, oma da vwerhe ayen vwẹ emu esiri wẹ rode.

²⁶ Dede na ye ayen ji vwo udu ayen de mukpahe owẹ ayen de mu urhi wẹn phihọ obuko ayen de hwe emraro wẹn, ri bru ayen uche nẹ i rhivwi bru uwe rhe, ayen de gbe ẹgua rode.

²⁷ Fiki rẹ ọtiọye na wo de phi ayen phihọ obọ rẹ ivwighrẹ rayen, i de ru ayen ọja, vwe evun re oja rayen ayen de kperi se we wo de nyo ayen ne obo odjuvwu rhe, kirobo re arodọvwẹ wẹn rode epha wọ da vwẹ isivwi kẹ ayen ri sivwi ayen nẹ obọ rẹ ivwighrẹ rayen.

²⁸ Ẹkẹvuọvo re oma vwo fu ayen nu ayen da rhoma ru umwemwu kpahe owe, wo de siobọ nẹ ayen kẹ ivwighrẹ rayen, otiọye na ayen de sun ayen; dede rẹ ayen rhe vwo kurhẹriẹ kperi se we wo de rhe nyo ayen nẹ obo odjuvwu rhe, ọke buebu ọye wọ vwẹ arodọvwẹ wẹn vwo sivwi ayen.

²⁹ Wọ da ta kẹ ayen nẹ ayen rhoma yọnrọn urhi na. Dede na ayen mu oma kpenu ayen mu ọghọ kẹ irhi wẹ-ẹn, ẹkẹvuọvo ayen de ru umwemwu kpahe iji wẹn, re ohwo da yọnrọn ọ me rhọ, ayen de si igabọ te ohọre vẹ udu kpohro e gbe rha davwerhọ-ọn,

³⁰ Ikpe buebu wo chiri ako rẹ ayen, wọ da wan oma re emraro na vwe Erhi wẹn ta ota kẹ ayen; dede na ayen davwerhọ-ọn. Fiki rẹ ọtiọye na wo de phi ayen phihọ obọ re ihwo rẹ otọ na.

³¹ Dede na vwe evun rẹ arodọvwẹ wẹn rode na wo ghwe furhie ayen te oba-a eyẹ sen aye-en, kidie wọwẹ Ọghẹnẹ re ehrọre ve arodọvwẹ.

³² Asakiephana, Ọghẹnẹ rẹ avwanre, rọ rhoro vẹ ẹgba kugbe Ọghẹnẹ ro mu oshọ, rọ serọ rẹ ọphọ ve ẹguọnọ ro je rhẹriẹ, wo je ọbẹvwẹ nana ro te avwanre oma na, ivie re avwanre, isun re avwanre, irherẹn re avwanre, emraro re avwanre, esẹ rẹ avwanre, kugbe ihwo wẹn ejobi, nẹ ọke rẹ ivie rẹ Asiria rhe rhi te nonẹ na havwa nọ kẹ wẹ-ẹ.

³³ Dede na emu re ọsoso wo ruru kpahe obo re phia kẹ avwanre na, kidie emu re esegbuyota wo ruru yẹ emu umwemwu avwanre ruru,

³⁴ ivie re avwanre, isun re avwanre, irherẹn re avwanre, kugbe esẹ rẹ avwanre yọnrọn urhi wẹ-ẹn eyẹ e davwerhọn rẹ irhi vẹ eta ru wọ ta kẹ aye-en.

³⁵ Ayen ga wẹ vwẹ evun rọ uvie raye-en, vwe evun re evun esiri wẹn ri wo vwọ keẹ ayen, kugbe evun re otọ erhuarho yoyovwi ru wo bru kẹ ayen, ayen ji se kurhẹriẹ nẹ idjerhe nẹ iruo umwemwu rayen na-a.

³⁶ Nighe, nonẹ na avwanre ke eviẹn; vwẹ evun re otọ ru wọ vwọ kẹ esẹ rẹ avwanre nẹ ayen re emamọ rọye kugbe emu esiri rọye, nighe, avwanre kẹ eviẹn.

³⁷ Emu esiri rọye ivie na ri sun avwanre ke eye re riọ fiki rẹ umwemwu rẹ avwanre, ayen ji vwo ogangan vwe enu re ugboma re avwanre kugbe uchuru rẹ avwanre obo ri je ayen, ye avwanre hẹ ọdjarhe rode.

Ihwo na veri nẹ aye yonre urhi na

³⁸ Fiki rẹ ọnana ejobi na avwanre vwọ nabọ re ọphọ me de sio phihọ otọ, isun rẹ avwanre, ihwo ri Livae, kugbe irherẹn rẹ avwanre da vwẹ obọ nye.