Nehemaya 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ihwo na ejobi da rhe ghwẹ koko gbidi vwe asan unuada re se Anurhoro rẹ Ame, ayen da ta kẹ Ẹzra osiọbe na nẹ ọ reyọ ọbe rẹ urhi ri Mosis rẹ Ọrovwohwo vwọ kẹ Izrẹl na rhe.

² Ẹzra orherẹn na da reyọ urhi na rhe vwẹ obaro rẹ ọghwẹgbe na, te eshare te eya kugbe ihwo ejobi ri se nyo ota na vẹ ẹruọ, vwẹ ẹdẹ rẹ ẹsosuọ re emeranvwe righwrẹ.

³ O de mudia hirhe opharo ku unuada na ro hẹ obaro rẹ Anurhoro re Ame na o de se nẹ urhiọke re duvwu uherevie ason, vwẹ irharo rẹ eshare na kugbe eya na kugbe ayen ri se vwo ẹruọ, ihwo na ejobi da nabọ kerhọn rẹ ọbe rẹ urhi na.

⁴ Ẹzra ọsiobe na de mudia vwe evun rẹ egbogho re ruru fiki rẹ Ọnana; ihwo nana Matitiaya, Shema, Anaiya, Yuraya Hilkaya, kugbe Maseiya de mudia akakọ re egbọghọ na vwe obọrhe, Pedaiya, Mishel, Malkija, Hashum, Hash-haddana, Zekaraya, kugbe Meshullam vwẹ obọhwẹre rọye.

⁵ Ẹzra de rhie ọbe na vwẹ irharo re ihwo na ejobi, kidie o kpenu nọ ihwo na ejobi, ọke ro vwo rhie re ihwo na ejobi de vrẹn mudia.

⁶ Ẹzra de bruba kẹ Ọrovwohwo, Ọghẹnẹ rode na, ihwo na ejobi da kpahe, Isẹ, Isẹ, ye ayen kpare abọ rayen kpenu, ayen de gbe iyovwi rayen kpotọ ayen da ga Ọrovwohwo vẹ epharọ re ayen bowvọn rhuotọ.

⁷ Ti Jeshua rhe, Bani, Sherobia, Jamin, Akub, Shabetai, Hodia, Maseiya, Kẹlita, Azaraya, Jozahad, Hanan, Pelaiya, ihwo ri Livae, da cha ihwo na uko vwo riẹn otọ rẹ urhi na, je ihwo na mudia vwẹ asan re ayen epha.

⁸ Ayen de se ne evun rẹ ọbe na, nẹ evun rẹ urhi rẹ Ọghẹnẹ rhe, phenphen; a da ke ayen ọhọ, ọtiọye na ihwo na da riẹn isese na.

⁹ Te Nehemaya, re osun na, kugbe Ẹzra re orherẹn kugbe osiẹbe na, kugbe Livae ri yono ihwo na da ta ke ihwo na ejobi nẹ, Nonẹ na ẹdẹ ọfuanfon kẹ Ọrovwohwo Ọghẹnẹ wẹn, we muomaho-ọ eyẹ wa viẹ-ẹ. Kidie ihwo na ejobi viẹre rẹ ayen vwo nyo eta rẹ urhi na.

¹⁰ Etiyin ọ da ta kẹ ayen, Wa yanran, re wa re ivwri re wa da udi re wa rha ghare ẹkẹn kẹ otu ra mrẹ chere kẹ-ẹ, kidie nonẹ na ẹdẹ ọfuanfon kẹ Ọrovwavwanre; wo je ivun miovwo ovwa-an, kidie aghọghọ rẹ Ọrovwohwo ọye hẹ ogangan rẹ ovwan.

¹¹ Ọtiọye na ihwo ri Livae de bru ihwo na ejobi uche, tanẹ, Wa fọ, kidid nonẹ na ẹdẹ ọfuanfon; we jẹ ivun miovwo ovwa-an.

¹² Ihwo na ejobi da yanran kpo dohwo dasan rọye ra rẹ ra da ayen da ghare ẹkẹn kẹ ihwo ayen da ghọghọ aghọghọ rode, fikiridie ayen riẹn otọ rẹ eta re ghwoghwo kẹ ayen na.

¹³ Vwe ẹdẹ rivẹ igbuyovwi rẹ iwevwi rẹ esẹ rẹ ihwo na ejobi, vẹ irherẹn kugbe ihwo ri Livae, de koko bru Ẹzra osiọbe na rere ayen nabọ rhi yono eta rẹ urhi na.

¹⁴ Ayen da mrẹ re siri vwẹ evun re urhi na nẹ Ọrovwohwo wan oma ri Mosis ji urhi nẹ ihwo re Izrẹl dia ọgarivi vwẹ ọke rẹ orẹ rẹ eme-ranvwe righwrẹ na,

¹⁵ rere ayen rha vwọ phia re ayen ghwoghwo vwe irho rayen ejobi kugbe Jerusalẹm, Wa yanran kpo obo igbenu re itete na re vwirhi eghọn rẹ oliv rhe, oliv re aghwa, aphiri, ewanvwe, kugbe irhe efa re ve ẹbe gbidi ru vwo bon egarivi na, kirobo re siro.

¹⁶ Ọtiọye ihwo na da yanran ra ghwẹ ayen rhe ayen da vwẹ ayen bọn egarivi kẹ oma rayen, dohwo dọkpọ re uwevwi rọye, kugbe evun re eguan rayen kugbe evun re eguan re uwevwi rẹ Ọghẹnẹ, kugbe unuada rẹ Anurhoro re Ame kugbe unuada vwẹ Anurhoro rẹ Ifrem.

¹⁷ Ọghwẹgbe rẹ ihwo ri rhivwi nẹ ighuvwu rhe da bọn egarivi ayen da dia evun rẹ egarivi na; kidie nẹ ọke ri Jeshua ọmọ ri Nọn rhe rhi te ẹdẹ yena ihwo rẹ Izrẹl ji ru ọtiọye-e. Ayen da ghọghọ okpọ aghọghọ rode.

¹⁸ Nẹ ẹdẹ re te ẹdẹ, nẹ ẹdẹ rẹsosuọ re te ẹdẹ rọ ka ọba, o de se nẹ evun re ọbe rẹ urhi rẹ Ọghẹnẹ rhe. Ayen da re orẹ ẹdẹ ighwrẹ; vwẹ ẹdẹ rẹrenre ayen de vwo ọghwẹgbe ofuefu, kirobo rẹ iji epha.