Nehemaya 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Vwẹ evun rẹ emeranvwe ri Nisan, vwẹ ẹgbukpe uje rẹ ẹriọ rẹ Ovie Artaxerxes, vwe ọke re udi vwọ hẹ obaro rọye re, mi de mu udi na vwọ kẹ Ovie na. Asakiephana mi ji muoma phihọ vwe obaro rọye dẹvo-o.

² Fiki rẹ ọtiọye na, ovie na da ta kẹ vwẹ, Die wọ vwo muoma phihọ, yọ dianẹ ọga ga we-e? Ona sa dia emuọfa vrẹ omaemuo-phihọ re udu-u. Etiyin oshọ de mu vwe gangan.

³ Me da ta kẹ ovie na, Jẹn ovie re rhiri bẹdẹ Die mi vwo je opharo emuophihọ, vwẹ ọke re orere na, asan re ishi rẹ ese me hẹ epha, vwọ ghwọrọ kufia, ra da vwẹ erhanre guọghọ anurhoro rọye?

⁴ Etiyin ovie na da ta kẹ vwẹ, kẹ obọ rẹ ono wọ da yare oyare na? Kẹ etiyin me da nẹ ẹrhovwo kẹ Ọghẹnẹ rọ hẹ ọbo odjuvwu.

⁵ Me da ta kẹ ovie na, ọ da dianẹ o je ovie, rẹ odibo wẹn da mrẹ ẹroesiri vwẹ obaro wẹn, gbẹ ju vwe kpo Juda, vwo kpo orere re shi esẹ mẹ phihọ na rere me ra rhoma bọn.

⁶ Ovie na da ta ke vwẹ, (Yẹn aye rẹ Ovie ghwe tidia kẹrẹ) Mavọ ọyan wẹn krite vwo, ke ọkevọ wo vwo rhivwi rhe? Ọtiọye o de je ovie na ne me gba ra; mi de brẹde kẹ.

⁷ Me da ta ke ovie na, o da dianẹ o je ovie, je siẹbe vwọ kẹ vwẹ vwọ rhe isun re hẹ ubrotọ rẹ Obovrẹn rẹ Urhie na, rere ayen ju vwe wanvrẹn bẹsiẹ mi vwo te Juda;

⁸ kugbe ọbe mi vwo rhe Asaf, rọ sẹro re egbo rẹ Ovie, rọ kẹ vwẹ igedu mi vwo ru igbere rẹ anurhoro na kugbe uwevwi rẹ ẹga na, kugbe igbẹhẹ re orere na, ji kugbe uwevwi ri mi che wo phihọ. Ovie da rhọvwe phihọ obo re me nọre, kidie obọ esiri rẹ Ọghẹnẹ vo vwẹ herọ.

⁹ Etiyin mi de rhi te asan rẹ isun rẹ ubrotọ rẹ Obovrẹn rẹ Urhie na, me da vwe ọbe rẹ Ovie na keẹ ayen. Asakiephana Ovie ji ghwe ji inotu re ofovwi ve otu re iyesi nene uvwe.

¹⁰ Ẹkẹvuọvo ọke ri Sanballat ohwo rẹ Họrọn ve Tobiah odibo na, ohwo re Ammọn vwo nyo Ọnana, ivun de miovwe ayen gangan ne ohwo ọvo rhere rhe guọnọ erhuvwu rẹ emọ re Izrẹl.

Nehemaya phi udu hẹ ihwo na awọ nẹ ayen rhoma bọn igbẹhẹ na

¹¹ Etiyin mi de rhi te Jerusalẹm, me da dia etiyin ẹdẹ erha.

¹² Etiyin mi de vrẹn vwẹ ason, mẹvwẹ kugbe imihwo krẹn ri nene uvwe, me vuẹ ohwo ovuọvo obo re Ọghẹnẹ me phihọ udu me ni mi rhi ru vwi Jerusalẹmu-u. Eranvwe ọvuọvo nene uvwe-e jokpa rẹ eranvwe re me guare na ọvo.

¹³ Me da ro otafe vwẹ ason vwe asan Anurhoro re Iyara na re fi Orhare Erha re te Anurhoro rẹ Isọn, me da nabọ vwe ẹro me te igbẹhẹ ri Jerusalẹm ro sheri na, ji kugbe inurhoro rọye ra vwẹ erhanre torhẹ na.

¹⁴ Ke etiyin me da rhe asan Anurhoro rẹ Ogbugbu na re te asan ẹtẹrhe rẹ Ovie. Ẹkẹvuọvo eranvwe re me guare na gbẹ mrẹ asan wa-an.

¹⁵ Etiyin Me da yan kpo obenu vwẹ ason ra wan orhoma rẹ Iyara na me da ra fuẹrẹ igbẹhẹ na, Mi de rhivwi rhe rhe vwẹriẹ Anurhoro rẹ Iyara na, ke ọtiọye mi de rhivwi kpo.

¹⁶ Itu re inotu na riẹn asan re ma rare-e eye ayen riẹn obo ri mi rue-ẹ; Me je ta ke ihwo ri Ju-u, irherẹn na, ehọnvwọre na, inotu na, kugbe i ri chekọ ri che ru iruo na.

¹⁷ Etiyin Me da ta kẹ ayen, Wa mrẹ ukpokpogho rẹ avwanre epha na-a, obo ri Jerusalẹm guọghọre tototo ra torhẹ inurhoro rọye ejobi. Wan yanrhe re a ra bọn igbẹhẹ ri Jerusalẹm, rere avwanre vwo nẹ abọ re ehwẹjẹ.

¹⁸ Etiyin mi de gbẹ ikun re obọ esiri rẹ Ọghẹnẹ mẹ rọ vẹ ovwẹ herọ ke ayen, ji kugbe eta rẹ ovie ta ke vwẹ. Etiyin ayen da ta, E jẹn avwanre vrẹn re a bọn. Ọtiọye na ayen da rhere irien rayen vi ke iruo na.

¹⁹ Ẹkẹvuọvo ri Sanballat ohwo ri Họnrọn kugbe Tobiah re ọdibọ na, ohwo re Ammọn, Gẹshẹm ohwo re Arebia, vwo nyo, ayen da vwẹ avwanre jehwẹ, ayen da jẹn avwanre fia tanẹ, Die ovwan ruẹ vwo? Ovwan vwẹ eghre sua Ovie?

²⁰ Kẹ Etiyin me da kpahe kẹ ayen, Ọghẹnẹ rẹ Odjuvwu che ru avwanre yovwi, avwanre rẹ idibo rọye ki vrẹn re a bọn; Ẹkẹvuọvo we vwo ẹkẹn, eyẹnrẹ ogangan, eyẹnrẹ ẹkarophihọ vwi Jerusalẹmu-u.