Nehemaya 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹrhuẹrẹ phihọ ri Nehemaya

¹ Vwẹ ẹdẹ yena ayen de se ne evun rẹ ọbe ri Mosis na ke ihwo na nyo; e de si phihọ evun rọye nẹ ihwo rẹ Amọr eyẹ ihwo ri Moab vwẹriẹ ọghwẹgbe rẹ Ọghẹnẹ-ẹ;

² kidie ayen vwe ikara kugbe ame vwọ ke ihwo re Izrẹl na-a, ẹkẹvuọvo ayen de durhie Balaam ne o rhi duvwu iyori hwe ayen–dede na Ọghẹnẹ re avwanre da rhẹriẹ iyori na phihọ ẹrhovwo.

³ Ọke re ihwo na vwo nyo urhi na, ayen da hẹriẹ erhorha na ejobi nẹ ohri rẹ ihwo rẹ Izrẹl.

⁴ Asakiephana tavwe re enana ki rhi ru, Eliashib re orherẹn na, re vwo mu ne o ni ivun re uwevwi re Ọghẹnẹ re avwanre, ro vẹ Tobaya gba jephihọ,

⁵ ọ da rhuẹrẹ uvun rode ra ghwẹ eka re izobo phihọ jovwo, adjija, ekuakua, kugbe ẹkẹnhwe re ọka, udi, evwri, re urhi tanẹ a vwọ kẹ ihwo ri Livae, ibuine, kugbe erhẹrẹchẹ, kugbe arhọghọ re toro ke irherẹn vwọ ke Tobaya

⁶ Ọke re vwo ruẹ enana ye me hẹ Jerusalẹmu-u, kidie vwẹ ikpe rẹ ọgban gbẹ ivẹ re Ataxas ovie ri Babilọn mi de bru ovie ra Ọmọke vwọ wan nu ma da re ovie ne o siobọ nẹ uvwe

⁷ Me da rhe Jerusalẹm, me da mrẹ otọ re umwemwu re Ehashib ruru fiki ri Tobaya, rọ vwọ rhuẹrẹ uvun re ọguan rẹ uwevwi re Ọghẹnẹ kẹ.

⁸ Ivun de miovwo uvwe gangan, me da kpare ekuakua re eyere uwevwi ri Tobaya ejobi ne uvun na kufia.

⁹ Etiyin me da vwe urhi kẹ ayen nẹ ayen hwerhe eka re izobo na kugbe adjija na.

¹⁰ Me da rhoma mrẹ nẹ ẹkẹn emuọre rẹ ihwo ri Livae na ne a je vwọ kẹ aye-en, ọtiọye na ihwo ri Livae kugbe ibuine na, ri ru iruo na, dje kpo dohwo dudju rọye.

¹¹ Ọtiọye mi de nene iruiruo na ghwọ tanẹ, Die sorọ ra vwọ sen uwevwi re Ọghẹnẹ? Mi de se ayen koko mi de phi ayen phihọ ako re iruo rayen.

¹² Etiyin Juda ejobi da ghwe ẹkẹnhwe re ọka, udi, kugbe evwri rhe uwevwi rẹ erhu na.

¹³ Me da vwe Shelemaya rẹ orherẹn na, Zadok re osiọbe na, kugbe Pedaiya re ohwo ri Livae, ne gba dia eyọnre-ighọ, Hanan ọmọ ri Zakọ, ọmọ ri Matanaya nọ gba cha ayen ukọ, kidie abọ re ayen fonro; iruo rẹ ayen ru ke emu ayen ghare kẹ imoni rayen.

¹⁴ Karohọ ovwẹ, E Ọghẹnẹ mẹ, fiki rẹ ọnana, wọ phoro iruo esiri ri mi ruru ke uwevwi rẹ Ọghẹnẹ mẹ nẹ-ẹ kugbe ẹga rọye.

¹⁵ Vwe ọke yena me da mrẹ ihwo vwi Juda ri chiyi wain mie vwẹ ẹdidjala, re ghwa ibo rẹ eka ri krẹn ayen nye ekẹtẹkẹtẹ rẹ ayen, kugbe udi rhe, otiẹ, fig, kugbe koka koka rẹ oghwa, ra ghwa ro Jerusalẹm vwẹ ẹdidjala, me ta ota kpahe emuore re ayen shẹ.

¹⁶ Ihwo ri Taya rhe, re dia evun re orere na, da ghwa eri rhe kugbe ekuakua ejobi a me she ayen vwẹ ẹdidjala ke ihwo ri Juda, kugbe Jerusalẹm.

¹⁷ Etiyin mi de mu ophu kpahe ihwo ride ri Juda me da ta kẹ ayen, Didi emu umwemwu nana re ovwan ruẹ, vwo miovwo ẹdidjala na?

¹⁸ Ọ dia enẹ esẹ re ovwan ruru, ọ dia fiki re ọnana Ọghẹnẹ re avwanre vwọ vwe umiovwo nana ru avwanre ve orere nana? Ovwan ra rhoma ghwa ivuemiovwo ọfa cha Izrẹl vwe oma rẹ ẹdidjala egbekuẹ.

¹⁹ Vwẹ ẹdidjala tavwe re ọke ki she vwẹ anurhoro ri Jerusalẹm, mi de ji urhi nẹ a kanre ẹchẹ na ne e rhie ayen bẹsiẹ re ẹdidjala ki nẹ otọ-ọ. Mi de ji idibo mẹ ẹvo phihọ anurhoro na ne a ghwa oghwa ro orere na vwẹ edidjala-a.

²⁰ Etiyin ineki na kugbe otu re she oka koka rẹ ekuakua ejobi de wo phihọ otafe ri Jerusalẹm ẹsievo eye asiava.

²¹ Ẹkẹvuọvo mi de kpogho obọ phihọ ayen ẹro me da ta ke ayen, Die we vwo wo phihọ obo otafe re igbẹhẹ na? We de ji ru ọtiọye ọfa mi shabọ phihọ ovwan. Nẹ ọke yena yanran ayen gbe rhe vwẹ ẹdidjala ọfa-a.

²² Mi de ji urhi ke ihwo ri Livae ne ayen phorho oma re ayen re ayen rhe rhe rhẹrẹ anurhoro na, re a yọnrọn ẹdidjala na fuanfon. Je karohọ ọna phihọ erhuvwu mẹ, E Ọghẹnẹ me, rere wo ju vwe vwo kirobo re ọrho rẹ ẹguọnọ wẹn ro jẹ rhẹriẹ na epha.

²³ Vwẹ ọke yena me da je mrẹ ihwo ri Ju re rọvwọ eya re Ashdọd, Amọn, kugbe Moab,

²⁴ abọvo re emọ rayen ke ephere re Ashdod kọye ayen je, ayen gbẹ sa jẹ ephere ri Juda-a, ẹkẹvuọvo ke ephere re ihwo ọvuọvo.

²⁵ Me ve ayen da ghwọ mi de duvwu iyori ke ayen mi de hwe evọ vwẹ ayen, me da sanvwe ẹto rẹ ẹvo; me da gba ayen vwe odẹ re Ọghẹnẹ duvwu iyori tanẹ, Wa vwe emetẹ re ovwan kẹ emeshare raye-en, eyẹ reyọ emetẹ rayen ke emeshare re ovwa-an eyẹ ke oma re ovwa-an.

²⁶ O dia fiki re eya tiọye na Solomọn ovie rẹ Izrẹl vwo ru umwemwu-u? Vwẹ usun re ẹgborho ibuebu na o vwo ovie rọ họherọ-ọ ivun rọye da vwerhe Ọghẹnẹ rọye, Ọghẹnẹ de vwọ mu ovie vwẹ enu re Izrẹl ejobi; dede na eya re irho efa da nẹrhẹ ru umwemwu.

²⁷ Avwanre gba kerhọn re ovwan re e ru umwemwu rode nana rere e ru zighi zighi kpahe Ọghẹnẹ re avwanre vwọ reyọ eya rẹ irho efa?

²⁸ Ọmọ ri Jehoyada ọvo, ọmọ rẹ Eliashib rẹ orherẹn rode, kẹ ọgọ ri Sanbalat ohwo ri Họrọn, ọtiọye na me da dje ne oma mẹ.

²⁹ Karohọ ayen, E Ọghẹnẹ mẹ fikiridie ayen gbẹ uvwiẹ rẹ irherẹn ẹgua kugbe ọphọ re irherẹn kugbe ihwo ri Livae.

³⁰ Enẹ me vwọ hworhẹ ayen ne kemu kemu ọrhorha ejobi, mi de ru iruo re irherẹn kugbe ihwo ri Livae na muoto kokoroko, kuohwo kuiruo rọye;

³¹ mi de phi ihwo phihọ otọ ri du irhe rẹ izobo, vwẹ ọke re bruro phihọ, kugbe ọke re emamọ rẹsosuọ. Karoho ovwẹ vwẹ erhuvwu, E Ọghẹnẹ mẹ.