Nehemaya 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Irherẹn na kugbe Livae na

¹ Enana hẹ irherẹn kugbe ihwo ri Livae ri vi Zerubbabẹl ọmọ ri Shealtiel gba rhe, kugbe Jeshua, Seraya, Jerimaya, Ẹzra,

² Amarava, Maluk, Hatush,

³ Shekanaya, Rehum, Meremọt,

⁴ Iddo, Ginetoi, Ahija,

⁵ Mijamin, Maadia, Bilga,

⁶ Shemaya, Joiarib, Jedaya,

⁷ Ealu, Amọk, Hilkaya, Jedaya. Enana hẹ ilori rẹ irherẹn na kugbe imoni rayen vwẹ ọke ri Jeshua.

⁸ Ihwo ri Livae na, Jeshua, Binui, Kadmiẹl, Sherebia, Juda, kugbe Matanaya, o vẹ imoni rọye ri gbẹ vwo iruo rẹ ine rẹ ẹkpẹvwẹ

⁹ kugbe Bakbukia kugbe Unno rẹ omoni rayen de mudia hirhe aro ku ayen vwe evun rẹ ẹga na.

¹⁰ Jeshua ọye hẹ ọsẹ ri Johayakim rẹ ọsẹ re Eliashib, Eliashib ke ọsẹ ri Jehoyada,

¹¹ Jehoyada hẹ ọsẹ ri Jonatan, Jonatan ke rha vwẹ ọsẹ ri Jadua.

¹² Vwẹ ọke ri Jehoyakim irherẹn herọ, igbuyovwi rẹ iwevwi re esẹ na ọ ri Seraya, Meraya, ọ ri Jerimaya, Hananaya;

¹³ ọ re Ẹzra, Meshullam; ọ re Amaraya Jehohanan,

¹⁴ ọ ri Maluki, Jonatan; ọ ri Shebanaiya, Josẹf,

¹⁵ ọ ri Harim, Adna; ọ ri Meraiyot, Helkai,

¹⁶ ọ rẹ Iddọ, Zekaraya, ọ ri Ginetọn, Mẹshulam;

¹⁷ ọ rẹ Ahija, Zikri; ọ ri Miniamin, ọ ri Moadia, Piltai,

¹⁸ ọ ri Bilga, Shamua; ọ ri Shemaya, Jehonatan,

¹⁹ ọ ri Joiarib, Matenai, ọ ri Jedaya, Uzi,

²⁰ ọ ri Salai, Kallai, o ri Amọk, Eha;

²¹ ọ ri Hilkaya, Hahsabia, o ri Netanel.

²² Vwọ ke ihwo ri Livae na, vwẹ ọke re Eliashib, Johoyada, Johanan, kugbe Jadua, e de kere igbuyovwi iẹ iwevwi re esẹ na; ji te irherẹn na rhiri re duvwu ẹriọ ri Dariọs ohwo ri Pẹsha.

²³ Emọ ri Livae, igbuyovwi rẹ iwevwi re esẹ na, e de si ayen phihọ Ọbe rẹ Ikun na rhi te ọke ri Johanan ọmọ re Eliashib.

²⁴ Ehọnvwọre re ihwo ri Livae: Hashabia, Shẹrebia, kugbe Jẹshua ọmọ ri Kadmiẹl, vẹ imoni rayen ri hirhe opharo ku ayen, re ejiro re ayen a kpẹvwẹ, kerẹ urhi ri Devid ohwo rẹ Ọghẹnẹ, ro shephihọ ọke re ohẹrhẹ.

²⁵ Matanaya, Bakhukia, Obadaya, Meshulam, Talmọn, kugbe Akub ke erhẹrẹchẹ ri mudia ohẹrhẹ vwẹ asan evun rẹ anurhoro na.

²⁶ Enana hẹ ọke ri Jehoyakim ọmọ ri Jeshua ọmọ ri Jozadak, kugbe ọke ri Nehimaya rẹ osun na kugbe Ẹzra rẹ orherẹn na rẹ osiobe.

Irheirie rẹ Igbẹhẹ na

²⁷ Ọke re vwo rhie igbẹhẹ ri Jerusalẹm ayen da guọnọ ihwo ri Livae vwẹ asan rayen ejobi, rere a vwẹ ayen rhe Jerusalẹm rhe ghọghọ aghọghọ re irhierhie na vẹ omavwerhe, ve ẹkpẹvwẹ ve ine, ve igogo, ekpata, kugbe isorogun.

²⁸ Emọ re ibuine na da dje oghrenghren rhe ghwe koko Jerusalẹm ji nẹ ẹko re ihwo ri Netọf rhe,

²⁹ ji nẹ Betgilgal rhe ji ne ubrakpo ri Geba vẹ Azmave rhe, kidie ibuine na fan eko riariẹ Jerusalẹm phihọ.

³⁰ Te irherẹn na kugbe ihwo ri Livae na da nabọ phorho oma re ayen, ayen de phorho ihwo na oma kugbe anurhoro vẹ igbẹhẹ na.

³¹ Etiyin me da reyọ isun ri Juda na rhe obo igbẹhẹ na, ayen da ghare ihwo buebu na ẹko ivẹ re kpẹvwẹ ẹkpẹvwẹ vwẹ evun rẹ urhiẹ re ayen tẹre. Ọvo de nene obọrhe vwe enu re igbẹhẹ na kpo obọ Anurhoro rẹ Isọn na;

³² Hoshaya da vwọ kpahe ayen kugbe abọvo rẹ isun ri Juda,

³³ kugbe Azaraya, Ẹzra, Mẹshulam,

³⁴ Juda, Bẹnjamin, Shemaiya, kugbe Jerimaya,

³⁵ ẹvo vwẹ emọ rẹ irherẹn vẹ owanre: Zekaraya ọmọ ri Jonatan, ọmọ ri Shemaiya, ọmọ ri Matanaya, ọmọ ri Mikaya, ọmọ ri akọ, ọmọ rẹ Asaf,

³⁶ kugbe ihwo rẹ orua rọye, Shemaiya, Azarẹl, Milalai, Gilalai, Maai, Netanẹl, Juda, kugbe Hanani, vẹ ekuakua rẹ ihwehworo ri Devid ohwo re Ọghẹnẹ na; Ẹzra osiọbe na da ka obaro kẹ ayen.

³⁷ Vwe asan Anurhoro re Ogbugbu na ayen da ghwa yan phiọnphion vwe obaro re ayen vwe asan oyerenu rẹ orere ri Devid, vwe asan re igbẹhẹ na da kpare kpenu, vrẹn uwevwi ri Devid, re te Anurhoro re Ame vwẹ obaro ọnre.

³⁸ Usun ro chekọ re kpẹvwẹ akpẹvwẹ na de nene obọhwere, mẹvwẹ ve ubro re ihwo na ri chekọ, da vwọ kpahe ayen vwe enu re igbẹhẹ na, ro kpenu vrẹn Ọguan re Ẹkuerhanre, re te Igbẹhẹ Ọhẹhẹre na,

³⁹ vwe obenu re Anurhoro rẹ Ifrem na, vwe oma rẹ Anurhoro rẹ Awanre na, ji kugbe oma rẹ Anurhoro re Eri kugbe Ọguan rẹ Hanatnẹl kugbe Ọguan rẹ Ujori, re te Anurhoro rẹ Igegede; ayen de rhi mudia vwẹ Anurhoro rẹ Ohẹrhẹ.

⁴⁰ Ọtiọye ẹko ive rẹ ihwo re kpẹvwẹ akpẹvwe na de mudia vwẹ evun rẹ uwevwi re Ọghẹnẹ, te okpuyovwi mẹ kugbe abọvo rẹ otu re iruiruo na vẹ ovwẹ de mudia;

⁴¹ irherẹn na Eliokim, Maaseiya, Miniamin Maikaya, Elioenai, Zekaraya, kugbe Hananaya, ve ewanre;

⁴² kugbe Maaseiya, Shemaya, Eleaza, Uzi, Jehohanan, Malkija, Elam, kugbe Eza. Ibuine na ve Jerimaya osun rayen de mu ine phihọ ẹsuọ.

⁴³ Ayen de ze izobo rode vwe ẹdẹ yena ayen da ghọghọ, kidie Ọghẹnẹ nẹrhẹ ayen ghọghọ aghọghọ rode, eya ve imitete na da je ghọghọ rhe E de nyo umri rẹ aghọghọ ri Jerusalẹm vwe ogboko.

Emu rẹ phihọ otọ kẹ irherẹn na kugbe Livae na

⁴⁴ Vwẹ ẹdẹ yena a da vwe ihwo mu phihọ ivun ra da sẹro re ekuakua, arhọghọ, emamọ rẹ ẹsosuọ, kugbe ẹkẹnhwe, re toro ayen utute kirobo re urhi guọnọre fiki re irherẹn na ve ihwo ri Livae kirobo re udju re irho na epha; kidie Juda ghọghọre vwẹ oma re irherẹn na ve ihwo ri Livae ri gbẹ odibo na.

⁴⁵ Ayen da ga ẹga rẹ Ọghẹnẹ rayen kugbe ẹga re ọma-ephorho, ọtiọye rhe ibuine na ve erhẹrẹchẹ na ruru, kere urhi ri Devid ji kẹ Solomọn ọmọ rọye.

⁴⁶ Kidie vwe ọke re awanre Devid kugbe Asaf vwọ hẹ olori re ibuine, ayen ji vwo ine re ejiro vẹ akpẹvwẹ ra sua kẹ Ọghẹnẹ.

⁴⁷ Vwẹ ọke ri Zerubabel kugbe ọke ri Nehemaya Izrẹl ejobi vwo ẹkẹn emu ra ghare keẹ ibuine kugbe erhẹrẹchẹ na; ẹkẹn re ihwo ri Livae e mi phi ayen phihọ akakọ, ihwo ri Livae mi rhe phi ọ re emọ rẹ Erọn phihọ akakọ.