Nehemaya 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Nehemaya nẹ Ẹrhovwo kẹ Jerusalẹm

¹ Eta ri Nehemaya ọmọ ri Hakalaya. Asakiephana o phiare vwe evun re emeranvvve re irhiri, vwe ẹgbukpe uje, re me vwọ hẹ otorere ri Susa,

² Hanani, ọvo vwe usun re iniọvo me, ve ihwo ẹvo de ne Juda rhe, me da nọ ayen vwọ kpahe ihwo ri Ju ri ghwu chekọ re dje vabọ re imu na, je vwọ kpahe Jerusalẹm.

³ Ayen da ta kẹ vwẹ, ihwo ri ghwu chekọ vwe ubrakpọ yena re dje vabọ rẹ imu na e hẹ evun re ukpokpogho ve omẹvuọ, igbẹhẹ ri Jerusalẹm ekpoiro she, a je vwẹ erhanre torhẹ inurhoro rọye.

⁴ Vwe ọke mi vwo nyo eta nana mi de tidia me da viẹ, mi de muoma phihọ vwe ẹdẹ buebu, mi de chiri owẹvwe me da nẹ ẹrhovwo vwe obaro rẹ Ọghẹnẹ rẹ Odjuvwu.

⁵ Me da ta, E Ọrovwohwo Ọghẹnẹ re Odjuvwu, ọ rọ rhoro vẹ Ọghẹnẹ rọ muọshọ rọ sẹro rẹ ọphọ vẹ ẹguọnọ ro jẹrhẹriẹ ke otu re guọnerọ re sẹro rẹ irhi rọye,

⁶ Jẹn erhọn wẹn nabọ rhie phihọ, rere ẹro wẹn rhie, wo nyo ẹrhovwo rẹ odibo wẹn re me nẹ asakiephana vwẹ obaro wẹn te ason te uvo vwọ ke emọ re Izrẹl idibo wẹn, re me da rhọvwe imwemwu rẹ emọ rẹ Izrẹl rẹ avwanre ru kpahe owẹ. Uyota, mẹvwẹ vẹ uwevwi rẹ ọsẹ me ru imwemwu.

⁷ Avwanre ru emu ogbegbo kpahe owẹ, avwanre sa yọnre irhi wẹ-ẹn, iji wẹn, kugbe aghwoghwo wẹn ru wo ji urhi kẹ odibo wẹn Mosis.

⁸ Karohọ ota na ri wo ji urhi rọye kẹ odibo wẹn Mosis, tanẹ, We rhe segbuyota-a, ke me hra ovwan ro ohri re ihwo na ejobi;

⁹ Ẹkẹvuọvo ovwan de rhivwi bru vwe rhe, rẹ ovwan da sẹro rẹ irhi me ru we de ru ayen, owene a hra ovwan kpo asan ro me sheri vwẹ otọ rẹ ọnre na, ke me ghwe ayen koko ne asan ra ghwẹ ayen ra rhe, ke me vwẹ ayen rhe asan re me jẹreyọ na, rere odẹ ẹe vwọ dia etiyin.

¹⁰ Ayen idibo wẹn kugbe ihwo wẹn, ru wọ tan hirhe vwẹ ọgangan wẹn rode na kugbe ogangan rẹ obọ wẹn na

¹¹ E Ọrovwohwo, jẹn erhọn wẹn nabọ rhie phihọ ke ẹrhovwo re odibo wẹn, ji kugbe ẹrhovwo re idibo wẹn re vwe omavwerhe dje oshọ re odẹ wẹn na, wọ vwe obọekparọ ke odibo wẹn nonẹ na, re wọ ke arọdọvwe wẹn, vwẹ obaro re ohwo nana. Asakiephana mẹvwẹ ọye omuidi rẹ ovie na.