Nahum 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Otu re guọghọ na bru we rhire. Se ihwo rhe re hwa hẹrhẹ; rhere idjerhe na; chobiẹ amwa wẹn; Rhanre oma vi.

² Kidie Ọrovwohwo rhoma vwẹ ọrho ri Jekọp cha kerẹ ọrho rẹ Izrẹl, kidie igbunegbu gborho ayen ayen da guọghọ eghọn rayen.

³ Ekpọfia rẹ egba na ra vwara, otuofovwi rọye vwẹ isene rhuo ẹkpẹrẹ na ke nyavwaro kerẹ erhanre vwẹ ọke rẹ ayen da karedje rẹ ofovwi; ayen ghwa họrhọ ruọ

⁴ ẹkpẹrẹ na ra yangha vwẹ evun rẹ irhuvwu ayen djẹ kpo obonẹ kpo oboyi vwẹ evun rẹ ọsuere; i re lo ghẹrẹ ghẹrẹ kerẹ imwẹrhanre, e rọ nyavwaro kerẹ enu.

⁵ E se inotu na rhe, ayen gele je ayen yanran, ayen re broma kpo obo igbẹhẹ, dohwo dọlọkọ rọye garivi enu.

⁶ Echẹ rẹ urhie na e rhiẹ ayen phihọ, ighẹn rẹ ovie na shẹ ọyangha;

⁷ Aye ro vwo ighẹn na e choro yanran, emẹtẹ rọye ra viẹ, i ro beroma kerẹ ilekuku, ayen ra teyẹ udu rayen.

⁸ Ninivẹ da họhọ oku rẹ amẹ rọye djẹ yanran. Daji! Daji!, ayen de kperi; ẹkẹvuọvo ọvuọvo rhivwi rhe-e.

⁹ Gborho idọnọ ẹfuanfon na, gborho iro na! o vwo efe ro vwo oba-a yẹrẹ efe rẹ emu ọghaghare ro vwo oba-a.

¹⁰ Kua! ẹkuafiotọ vẹ ẹghwọrọ! Udu nẹ ẹdia, igbo ra phariẹ, uvweri vọn oma ejobi hwe, epharo ejobi ki phurẹn phurẹn!

¹¹ Tivọ unu rẹ okpohrokpo na epha emwa rẹ emọ rẹ okpohrokpo na, asan rẹ okpohrokpo muẹ obo rọ ria cha, asan rẹ emọ rọye epha, yẹ ohwo djobọ te aye-en?

¹² Okpohrokpo na chẹghẹn emu vọn otọ kẹ emọ rọye. O de hwe eranvwe kẹ oni rọye; o hwe eranvwe vọn emwa na eranvwe ra chẹghẹre vọn unu rọye.

Ninivẹ Ghwọrọ re Tototo

¹³ Nighe mi mu kpahe owẹ, eriyin Ọrovwohwo rẹ otuofovwi na tare, ke me cha torhẹ ekpẹrẹ wẹn na, ivwirhi ki bru rhe, ka cha vwẹ ọlọkọ nyavwẹ imikpohrokpo wen na; ke me cha nyavwẹ eranvwe wẹn nẹ otọ na, e gbi che nyo urhuru rẹ iyinkọn wẹn ọfa-a.