Matiu 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jesu Sivwi Ọhonvwoti

¹ Ọke ro rhi vwo wo nẹ enu rẹ ugbenu na rhe, ihwo buebu de tue nene.

² Nighe, ọhonvwoti ọvo de bro rhe, ọ da ga, ọ da ta kẹ nẹ, Ọrovwohwo, wọ da rhọvwe, wo se ru vwe fon.

³ Ọ da vwẹ obọ te, ọ da ta nẹ, me rhọvwere gba fon. Siẹvuọvo na oti na de ghwe kpo.

⁴ Jesu da ta kẹ nẹ, Wọ ta kẹ ohwo ọvuọvo-o, ẹkẹvuọvo yanran kpo, ra vwẹ oma wẹn nẹ orherẹn, rere wọ gọ iye kirobo ri Mosis ji urhi kẹ wẹ, rere o dia iseri kẹ ayen.

Jesu Sivwi Odibo rẹ Olori rẹ Isodjẹ

⁵ Ọke ro rhi vwo te Kepanọm, onotu rẹ ofovwi ọvo de bro rhe, ọ da rẹ nẹ,

⁶ Ọrovwohwo, odibo mẹ hiro she enwẹnwẹ, oma na herọ miavwọ gangan.

⁷ Ọ da ta kẹ nẹ, me cha rere mi re sivwo.

⁸ Onotu rẹ ofovwi na da ta kẹ, Ọrovwohwo, mi fo ohwo ru wo te uwevwi rọye-e, ẹkẹvuọvo ta ota rẹ unu wẹn, odibo mẹ na ko vrẹn.

⁹ Kidie mẹvwẹ onotu rode, mi ki ji vwo ihwo buebu re me ghwẹ kpo ofovwi; me da ta kẹ ọna nẹ, yanran, ọ me ghene yanran, mọ, ọ me yanrhe: ta kẹ ọviẹ mẹ, ru ọna, o mi ghine ruo.

¹⁰ Ọke ri Jesu vwo nyo, ọ de gbunu, ọ da ta kẹ ihwo ri tue nene na nẹ, Uyota me ta kẹ ovwan, Me je mrẹ esegbuyota tiọna dẹvo vwẹ Izrẹl na-a.

¹¹ Me ta kẹ ovwan nẹ, ihwo buebu che nẹ obaro ọnre rhe kugbe obọrhe ọnre, i mi rhi tidia kugbe Ebraham, Aizik kugbe Jekọp vwẹ uviẹ rẹ Ọghẹnẹ.

¹² Ẹkẹvuọvo emọ rẹ uvie na dẹn ka cha djẹ ayen ro otafe, ra ro ebri ri hwin. Kẹ etiyin ayen da viẹ da re ako.

¹³ Jesu da ta kẹ onotu na nẹ, Yanran kpo obo wọ ra, kirobo ru wo segbuyota na jọ dia ọtiọye kẹ wẹ; oma rẹ odibo na de ghwe kpo nẹ ọke yena yanran.

Jesu Sivwi Ihwo Buebu

¹⁴ Ọke ri Jesu rhi vwo te uwevwi ri Pita, oniaye rọye kọ mwa ọga.

¹⁵ Ọ da vwẹ obọ te, emiavwe na de ghwe kpo; o de vrẹn o de gbe odibo kẹ.

¹⁶ Ọkẹ rẹ ovwọnvwọn vwo te, e de mu ihwo buebu re mwa ọga bro rhe, ọ de sivwi ayen, ọ da vwẹ ota rẹ unu djẹ erhi rẹ idẹbono buebu phia.

¹⁷ Rere aroẹmrẹ rẹ Aizaya vwọ mrasan gba, ro ta nẹ, Ọye mu odjadja vẹ emiavwe rẹ avwanre ghwa.

Ihwo ri se nene Jesu-u

¹⁸ Ọke ri Jesu vwọ mrẹ ihwo buebu na, ọ da ta kẹ idibo rọyẹ, nẹ, e bi kpo ẹbẹre rivẹ.

¹⁹ Osiọbe ọvo de bro rhe, ọ da ta kẹ nẹ, Oyono, me guọnọre mi nene uwe kpo asan kasan re wọ ra ejobi.

²⁰ Jesu da kpahe kẹ nẹ, irhirako vwo mu, ephran vwo ẹho, ẹkẹvuọvo ọmọ rẹ ohwo vwo asan rọ vwẹ uyovwi hwa-a.

²¹ Ohwo ọfa da rhe, ọ da ta kẹ nẹ, Ọrovwohwo, ji vwe re shi ọsẹ mẹ tavwe.

²² Ẹkẹvuọvo Jesu da ta kẹ nẹ, nene uvwe; jẹ ihwo ri vwo orivwi re shi orivwi rayen.

Jesu fue Ọgbogho rẹ Abadi

²³ Ọke rọ vwọ ro evun rẹ okọ, idibo rọye de nene.

²⁴ Nighe ayen da ro evun rẹ okọ, aphopho rode na de rhi dju vwa ayen vwẹ evun rẹ abadi, ame de bru ro okọ na, yẹ ekpuyovwi rọye vwerhẹ.

²⁵ Ayen de bro rhe, ayen da rhọvwọ nẹ, Ọrovwohwo, sivwi avwanre me ghwẹ na.

²⁶ Ọ da ta kẹ ayen nẹ, die ovwan vwọ djẹ oshọ, ovwan ri vwo esegbuyota tutuno na? Ọ de vrẹn, ọ da van ku odju na kugbe abadi na, asan ejobi da ghwa fọ riei.

²⁷ Ọ de gbe ayen unu ta nẹ, ọna didi ohwo rẹ aphopho kugbe abadi nyo ota rọye?

Erhi rẹ Idẹbono ra djẹ nẹ Ihwo oma

²⁸ Ọke ro rhi vwo te ẹbẹre rivẹ rẹ orho ri Gadarin, ihwo ivẹ ri vwo erhi rẹ idẹbono re dia ohri rẹ ishi, i mu osho gangan, fiki rẹ eriyin na ihwo gbi yivwẹ wan idjerhe yena-a.

²⁹ Rẹ ayen vwọ mrẹ, ayen de kperi ta nẹ, Die avwanre vẹ owẹ gbi ru, wẹ Ọmọ rẹ Ọghẹnẹ? Wọ rhe vwẹ oja re avwanre bẹsiẹ rẹ ọke rẹ avwanre vwo te?

³⁰ Vwẹ akakọ rẹ etiyin na, otu rẹ isi herọ ria emu vwọ.

³¹ Irhi rẹ idẹbono na da rẹ gangan nẹ, Wọ da djẹ avwanre vwonẹ, gbe jẹ avwanre ra ro evun rẹ isi na.

³² Ọ da ta kẹ ayen nẹ, Wan yanran, ayen de ghine nẹ evun rẹ ihwo na ra ro evun rẹ isi na; ayen da djẹ nene oghwrọrọ na rọ epha chohri chohri na, ra ro evun rẹ abadi na, ayen de divwi ghwu.

³³ Ihwo re ghẹrẹ isi na da djẹ kpo obo orere na, rẹ gbe ikun rẹ obo rẹ ayen mrẹre vwẹ oma rẹ ihwo ri vwo irhi rẹ idẹbono na kugbe isi na.

³⁴ Orere na ejobi da ghwiẹ rhe rhe vwa Jesu: ọke rẹ ayen vwọ mrẹ ayen da rẹ nẹ o nẹ erhuru rayen.