Matiu 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyono kpahe Okẹ

¹ Jomaotọ, wo ru ẹse wẹn vwẹ irharo rẹ ihwo-o, rere ayen vwọ mrẹ wẹ-ẹ, ọ da dia ọtiọye wọ gbi se vwo osa vwẹ obaro rẹ ọsẹ rọ hẹ obo odjuvwu-u.

² Ọke wo de ru ẹse, wo vwo hworo ukpokpo-o, kirobo rẹ otu ri Keferi ruẹ-ẹ, rere ihwo vwọ mrasan jiri ayen. Uyota me ta kẹ ovwan, ayen vwo osa rayen nure.

³ Ẹkẹvuọvo ovwan de ru ẹse we jẹ obọrhe rẹ ovwan riẹn obọ rẹ obọhwere rẹ ovwan ruẹ-ẹ.

⁴ Ovwan me bẹbẹ ru ẹse rẹ ovwan; rere ọsẹ rẹ ovwan rọ mrẹ orẹ vwẹ odjahọ vwọ hwa osa kẹ ovwan vwẹ azagba.

Uyono kpahe Ẹrhovwo

⁵ Wa da nẹ ẹrhovwo we ruẹ kerẹ otu ri Farisi na-a, re vwẹ oma nẹ vwẹ ọsuere-e, eyẹ vwẹ evun rẹ ishọshi-i, rere ihwo vwọ mrẹ ayen. Uyota me ta kẹ ovwan, ayen reyọ osa rayen nure.

⁶ Ẹkẹvuọvo ovwan da nẹ ẹrhovwo, wa ro uvun rẹ ovwan, we de bi ẹchẹ gbe nu, gba rẹ ọsẹ rẹ ovwan rọ hẹ odjahọ, re ọsẹ rẹ ovwan rọ mrẹ orẹ vwẹ ehoho ye, kọ hwa osa kẹ wẹ vwẹ azagba.

⁷ Ovwan da nẹ ẹrhovwo, wa ta ota ọvo asiava-a, kirobo rẹ ikeferi ruẹ-ẹ, kidie ayen roro nẹ ọye eme nyo.

⁸ Ovwan ruẹ ọtiọye-e, Kidie ọsẹ rẹ ovwan riẹn obo re da ovwan tavwe wa ke nọ.

⁹ Enẹ ovwan nẹ ẹrhovwo; Ọsẹ rẹ avwanre rọ hẹ obo odjuvwu, Jẹn avwanre vwẹ ọghọ kẹ ọde wẹn.

¹⁰ Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.

¹¹ Emu ri kẹdẹ kẹdẹ vwẹ ọ ri nonẹ kẹ avwanre.

¹² Vwẹ imwemwu rẹ avwanre rhovwo avwanre, Kirobo me vwo rhovwo ọrivẹ rẹ avwanre.

¹³ Wo suẹn avwanre ro ọdavwini-i, ẹkẹvuọvo si avwanre nẹ ukpokpogho.

¹⁴ Kidie we de vwo rhovwo ọrivẹ rẹ ovwan, Ọsẹ rẹ ovwan rọ hẹ obo odjuvwu ko ji vwo rhovwo ovwan.

¹⁵ Ẹkẹvuọvo we gbi vwo rhovwo ihwo-o, Ọsẹ rẹ ovwan rọ hẹ obo odjuvwu rhe se vwo rhovwo ovwa-an.

Uyono kpahe Owẹvwe Echiro

¹⁶ Ọfa, ovwan de chirẹ owẹvwe, we ruẹ kerẹ ikeferi ri mu opharo phihọ-ọ; ayen mu opharo phihọ rere ihwo vwọ mrẹ ayen nẹ ayen chirẹ owẹvwe. Uyota me ta kẹ ovwan, ayen vwo osa rayen nure.

¹⁷ Ẹkẹvuọvo ọke wo de chirẹ owẹvwe, họ, wọ vwẹ udẹ ghworo opharo wẹn;

¹⁸ Rere ihwo vwo jẹ riẹn nẹ wo chirẹ owẹvwe, jokpa rẹ ọsẹ wẹn rọ mrẹ orẹ vwẹ odjahọ; rere Ọsẹ wẹn rọ mrẹ orẹ vwẹ odjahọ na, sa hwa osa kẹ wẹ vwẹ azagba.

Ẹfe vwẹ Odjuvwu

¹⁹ We koko efe rẹ ovwan phihọ akpọ na-a; asan rẹ ẹghwọghwọ da ria rẹ ekagba de ji muẹ, asan rẹ oji tọfiẹ o mi cho.

²⁰ Ẹkẹvuọvo koko efe wẹn phihọ obo odjuvwu, asan rẹ eghwọghwọ da ria-a, rẹ ekagba de muẹ-ẹ, asan rẹ oji sa tọfiẹ o cho-o.

²¹ Kidie asan rẹ efe wẹn epha etiyin iroro wẹn je dia rhe.

Urhukpẹ rẹ oma na

²² Urhukpe rẹ oma na ọye ẹro; ẹro wẹn da dia ọkpokpọ, oma wẹn ejobi ko vọn vẹ orẹmrẹ.

²³ Ẹkẹvuọvo ẹro wẹn da dia brabra, oma wẹn na ejobi kọ vọn vẹ ebri. Ọrẹmrẹ rọ hẹ oma wẹn de mu ebri, komavọ ebri yena rho te!

Ọghẹnẹ vẹ ẹdjọ

²⁴ Ohwo sa ga inini ivẹ-ẹ, ọ da dia ọtiọye kọ dia avwebọ kẹ ọvo, ọ me rha dia avwiorọvwe kẹ ọrivẹ; eyẹ ko si kẹre ọvo ko sheri kẹ ọrivẹ; Wọ sa ga Ọghẹnẹ vẹ ẹdjọ kugbe-e.

Enwan vẹ oshọ

²⁵ Eriyin na me ta kẹ wẹ nẹ, wọ rua ẹnwan kẹ oma wẹ-ẹn, obo wọ cha re kugbe obọ wọ cha da-a, eyẹ amwa wo che vwo rhuo-o. Ẹnwẹn wẹ ghare nọ amwa-a?

²⁶ Gbe ni emephran re hẹ obenu na, ayen kọ-ọn, ayen vuẹ-ẹ, ayen vwo erhu-u, jẹ Ọsẹ wẹn rọ hẹ obo odjuvwu ghẹrẹ ayen. Ovwan gbe ghare nọ aye-en?

²⁷ Kono re sa ro ẹnwan ro de se bru emerha ba ugrogro rọye?

²⁸ Kidie ovwan vwọ ro ẹnwan rẹ emwa? Gbe roro idodo rẹ aghwa na, obo rẹ ayen rhua te; ayen wia-an, ayen ruẹ emuọvo-o.

²⁹ Me ta kẹ ovwan nẹ, Solomọn vwẹ evun rẹ urinrin rọye, se rhuo emwa iyoyovwi kerẹ idodo nana-a.

³⁰ Ọ da dia nẹ Ọghẹnẹ sa vwẹ amwa rhuo idodo rẹ aghwa, re rhua bodo bodo nonẹ, odẹ rọ cha a gbẹn ayen kufia, komavọ o rhuo ovwan te, iri vwo esegbuyota krẹkrẹ na?

³¹ Eriyin na wọ gbe ro ẹnwan ta nẹ, kidie avwanre cha re? eyẹ kidie avwanre cha da? eyẹ kidie avwanre che vwo rhuo?

³² Kidie emu nana ejobi otu rẹ egedjọ na guọnọ ayen. Ẹkẹvuọvo Ọsẹ rẹ ovwan rọ hẹ obo odjuvwu riẹre nẹ ovwan guọnọ ayen.

³³ Ẹkẹvuọvo gba ka guọnọ uvie rẹ Ọghẹnẹ tavwe, kugbe ọvwata rọye, kọ vwẹ emu na ejobo ba kẹ wẹ.

³⁴ Eriyin na ovwan gbe ro ẹnwan kpahe odẹ-ẹ, kidie odẹ cha ro ẹnwan rẹ oma roye. Jẹn ukpokpogho rẹ ẹdẹ na te kẹ ẹdẹ na.