Matiu 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹtuọho rẹ Iyẹnrẹ Esiri na vwẹ enu rẹ Ugbenu

¹ Rọ vwọ mrẹ urogho na, o de yeri kpo enu rẹ ugbenu, ro vwo tidia nu idibo rọye de bro rhe.

² O de rhie unu rọye o de yono ayen ta nẹ,

Ẹrhovwo rẹ Ebruba Na

³ Ebruba kẹ igbere vwẹ erhi; kidie uvie rẹ odjuvwu kọ dia ọrayen.

⁴ Ebruba kẹ ihwo ri muomahọ; kidie e bru ayen uche.

⁵ Ebruba kẹ ihwo ri ruẹ dẹndẹn; kidie ayen cha reuku rẹ akpọ na.

⁶ Ebruba kẹ ihwo rẹ owẹvwe rẹ ọvwata hwe; kidie evun cha vọn ayen.

⁷ Ebruba kẹ ihwo ri ni aruẹdọn; kidie ihwo efa ki ji ni aruẹdọn kẹ ayen.

⁸ Ebruba kẹ ihwo rẹ evun rẹ ayen fonro; kidie ayen cha mrẹ Ọghẹnẹ.

⁹ Ebruba kẹ ihwo rẹ kẹ ufuoma; kidie e che se ayen emọ rẹ Ọghẹnẹ.

¹⁰ Ebruba kẹ ihwo re muru ekueku fiki rẹ ọvwata; kidie uvie rẹ odjuvwu kọ dia ọrayen.

¹¹ Ebruba kẹ ovwan, vwẹ ọke rẹ ihwo da ghwọ ku ovwan, rẹ ayen de mu ovwan, rẹ ayen da ta ota ọbrabra kpahe ovwan fiki mẹ.

¹² Ghọghọ re oma vwerhe ovwan, kidie osa rẹ ovwan pha rhuarho vwẹ obo odjuvwu; kidie ọtiọye e ke kpokpo otu rẹ emraro re karo kẹ ovwan.

Ughweraka vẹ Urhukpẹ

¹³ Ovwan ughweraka rẹ akpọ na. Ẹkẹvuọvo ughweraka de ku avwerhe rọye kufia, komavọ o ru vwerhe? o gbi yovwi ọfa-a, ke kuo kufia, ihwo ki chiyo wan.

¹⁴ Ovwan urhukpẹ rẹ akpọ na. Orere rọ hẹ enu rẹ ugbenu ọ sa djahe-e.

¹⁵ Yẹrẹ ihwo sa vwẹ urhukpẹ rhu phihọ otọ rẹ ikuru-u, ẹkẹvuọvo ke muo kpahe enu rẹ emẹjẹ, kọ la mu uwevwi na ejobi.

¹⁶ Eriyin na gbe jẹ urhukpẹ wẹn la vwọ kẹ ihwo, rere ayen mrẹ iruo esiri wẹn rere ayen vwẹ ejiro kẹ ọsẹ wẹn rọ hẹ obo odjuvwu.

Uyono kpahe Urhi na

¹⁷ We roro nẹ me rhere rhe guọghọ irhi na eyẹ iruo rẹ emraro na-a, me rhere guọghọ-ọ, ẹkẹvuọvo mi rhi ru ayen gba.

¹⁸ Uyota me ta kẹ ovwan, bẹsiẹ rẹ odjuvwu vẹ akpọ vwọ wan, umuku rẹ ota mẹ ọvuọvo se she fia-a, rhiri bẹsiẹ rẹ imu na ejobi vwọ gba,

¹⁹ Kohwo kohwo ro miovwo ọvo vwẹ irhi nana, ro de yono ihwo ghwru, ọye cha ma hanvwe vwẹ uvie rẹ odjuvwu; ẹkẹvuọvo kohwo kohwo ro ru ayen gba ro de yono ayen gba, ohwo yena re cha ma rho vwẹ uvie rẹ odjuvwu.

²⁰ Kidie me ta kẹ ovwan nẹ, jokpa nẹ uruemu rẹ ovwan yovwi nọ otu ri Farisi kugbe isiẹbe na-a, ovwan sa ro uvie rẹ odjuvwu-u.

Uyono kpahe Ophu

²¹ We nyori ra vwọ ta kẹ ihwo rẹ awanre nẹ, wo hwe ohwo-o, kohwo kohwo ro hwe ohwo ke vwo gu ẹdjọ.

²² Ẹkẹvuọvo me ta kẹ ovwan nẹ, ohwo kohwo rẹ evun rẹ omoni rọye miovwiri ekueku, ke vwo gu ẹdjọ; ohwo kohwo ro harhe omoni rọye nẹ, Eghwobi, ke vwo guẹdjọ kẹ ukoko rẹ ihwo, ohwo rọ harhere nẹ, Wẹ ẹkpa na, kọ vwẹ ẹro siẹn oja rẹ erhanre ri bẹdẹ.

²³ Fiki rẹ eriyin na, wo de ze izobo wẹn vwẹ enu rẹ agbada, wọ da karohọ nẹ wọ vẹ omoni wẹ vwo ota,

²⁴ yan je izobo wẹn vwo vwẹ enu rẹ agbada na, rere wọ yanran, re wọ vẹ omoni wẹ na rhuẹrẹ kugbe tavwe rere wo ki rhi ze izobo wẹn.

²⁵ Wọ vẹ ọvweghre wẹn fobo rhuẹrẹ kugbe siẹ wọ da ghwọ nu; ọ dia ọtiọye-e, ọvweghrẹ wẹn na ko siọbe se we, enọkpa ki mu we rhe oguẹdjọ, oguẹdjọ ko mu we kpo uwodi;

²⁶ Uyota me ta kẹ wẹ, wo se nẹ uwodi na rhe-e, bẹsiẹ wọ vwọ hwa osa re wọ rere nu.

Uyono kpahe Igberadja

²⁷ Ovwan nyori re vwo ji urhi nẹ, Wo gbe igberadja-a;

²⁸ ẹkẹvuọvo me ta kẹ wẹ nẹ, kohwo kohwo ro ni aye rẹ ohwo ọfa opharo ro de je, yẹ o duro vwẹ udu rọye nure.

²⁹ Ẹro wẹn da nẹrhẹ owẹ she, rhuo nu ro nẹ uwe oma; kidie oyoma kẹ wẹ rere ẹro wẹ rhu, nọ rẹ ekroma wẹn ejobi de ghwru.

³⁰ Obọrhe wẹn da nẹrhẹ owẹ she, bro nu ro nẹ uwe oma; kidie oyoma kẹ wẹ rere obọ wẹn kru, nọ rẹ ekroma wẹn ejobi de kpo orho rẹ igbẹphẹre.

Uyono kpahe Obọesiono

³¹ A je ta nẹ, kohwo kohwo ro siobọ nẹ aye rọye, e jo siọbe rẹ obọesiono vwọ kẹ;

³² ẹkẹvuọvo me ta kẹ ovwan nẹ, ohwo kohwo ro siobọ nẹ aye rọye, jokpa nẹ o gbe ọfarhiẹ, yo gbe igberadja; ohwo kohwo rọ reyọ aye re siobọ nu yo ji gbe igberadja.

Uyono kpahe Iyori eduvwo

³³ Ọfa we ji nyo re vwo ji urhi kẹ ihwo rẹ awanre nẹ, Wo duvwu iyori-i, ẹkẹvuọvo ive wẹ ejobi Ọrovwohwo wo ve ayen kẹ;

³⁴ ẹkẹvuọvo me ta kẹ wẹ nẹ, Wo duvwu iyori-i, wo se odjuvwu duvwẹ-ẹ, kidie oboyi hẹ ekete rẹ Ọghẹnẹ;

³⁵ wọ je vwẹ akpọ duvwẹ-ẹ, kidie ọye hẹ asan rẹ Ọghẹnẹ ghwẹ awọ rọyẹ phihọ; wọ fa odẹ ri Jerusalẹmu-u, kidie ọye hẹ orere rẹ Ivie.

³⁶ Wọ fa odẹ rẹ uyovwi-i, Kidie wo se ru ogẹto ọvo fo-on, siẹvo kẹ ebio-o.

³⁷ Ẹkẹvuọvo jẹ Ẹjo wẹn dia Ẹjo, ji E wẹn dia E; ọ da vrẹn enẹ kẹ efian.

Uyono kpahe Orukeri

³⁸ Wo ji nyo ra vwọ ta nẹ, a vwẹ ẹro hwa osa rẹ ẹro ako hwa osa rẹ ako;

³⁹ ẹkẹvuọvo me ta kẹ wẹ nẹ, Wọ vẹ ohwo umwemwu sioma-a, ẹkẹvuọvo ohwo da teye owẹ ọhwa rẹ obọrhe, rhẹriẹ orivẹ kẹ.

⁴⁰ Ohwo de kpono uwe kpo ẹguare fiki rẹ ikotu wẹ, gba je ghwiẹ adagba wẹn kẹ.

⁴¹ Ohwo da gba wẹ nẹ, wọ vẹ ọyẹ yan uroko ọvo, nene yan ivẹ.

⁴² Ohwo da yare owẹ vwọ kẹ, ohwo de bru uwe rhe ri momo wọ sia kẹ-ẹ.

Guọnọ Ivwighrẹ wẹn

⁴³ Wo ji nyo ra vwọ ta nẹ, guọnọ igbeyan wẹn, rere wọ vẹ ivwighrẹ wẹn ghwọ.

⁴⁴ Ẹkẹvuọvo me ta kẹ wẹ nẹ, guọnọ ivwighrẹ wẹn, nẹ ẹrhovwo kẹ ihwo ri kpokpo uwe,

⁴⁵ ke se ovwan emọ rẹ ọsẹ rọ hẹ ọbo odjuvwu, kidie uvo rọye muẹ ọbo vẹ ogbori, osio rọye hwe ọvwata vẹ oruimwemwu.

⁴⁶ Wọ da guọnọ igbeyan wẹ ọvo ki didi erere ri te we? Otu rẹ imiarhọghọ na rhe ji ru ọtiọye rhe-e?

⁴⁷ Wọ da sanọ imoni wẹ ọvo yeri, kidie wo rhe vwo yovwi nọ ihwo efa vwo? Otu rẹ ikeferi na ji ruẹ ọtiọye rhe?

⁴⁸ Ọtiọye na ovwan gba fon kirobo rẹ Ọsẹ rẹ ovwan rọ hẹ obo odjuvwu fonro na.