Matiu 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọdavwini ri Jesu

¹ Etiyin Erhi Ọfuanfon de sun Jesu kpo evun rẹ aghwa rere idẹbono vwọ davwọ ni.

² Ọke ro rhi vwo chiri owẹvwe ason ujuvẹ kugbe uvo ujuvẹ nu owẹvwe de rhi hwe.

³ Idebono da rhe ọ da ta kẹ nẹ, Wọ da ghene dia ọmọ rẹ Ọghẹnẹ, gbe hirhe ibiekpẹn nana phihọ emu rere wọ re.

⁴ Ẹkẹvuọvo Jesu da kpahe kẹ nẹ, e siro phihọ otọ nẹ, ohwo sa vwẹ emu ọvo rhọ-ọ, jokpa rẹ ota ro nẹ unu rẹ Ọghẹnẹ rhe.

⁵ Idẹbono de rhe muo kpo orere ọfuanfon na; o de muo kpo okpo rẹ uwevwi rẹ ẹga,

⁶ Ọ da ta kẹ, Wọ da ghene dia ọmọ rẹ Ọghẹnẹ, gbe pho rhe otọ; kidie e siro hẹ otọ nẹ, Ọ vwẹ ogangan kẹ emakashe rọye nẹ, E rhẹrẹ owẹ. Rere ayen yonrọn owẹ, rere awọ wẹn vwo jẹ oragha edje.

⁷ Jesu da ta kẹ nẹ, e siro nẹ, Wọ davwẹ Ọrovwohwo Ọghẹnẹ wẹn nẹ-ẹ.

⁸ Idẹbono da rhoma reyọ vwo kpo enu rẹ ugbenu ọvo ro kpenu gangan, ọ da vwẹ uvie rẹ akpọ na ejobi vwọ nẹ, kugbe urinrin rọye ejobi;

⁹ Ọ da ta kẹ nẹ, enana ejobi ke dia ewẹ, ọ da dianẹ wo diguẹ kẹ vwẹ re wọ da ga vwẹ.

¹⁰ Etiyin Jesu da ta kẹ nẹ, Wan nẹ obaro mẹ, Ẹdjo na; Kidie e siro nẹ, Ọrovwohwo Ọghẹnẹ ọye wo shiguẹ kẹ, ọye ọvo wo je ga.

¹¹ Idẹbono na da yan jovwo; emakashe de rhi tete.

Jesu mu Odibo Egbe Phihọ vwi Galili

¹² Ọke ro vwo nyo nẹ e mu Jọn, Jesu de sioma nu vwi Galili.

¹³ O de vrẹn nẹ Nazarẹt kpo Kepanọm rọ kẹrẹ oma rẹ abadi, vwẹ ughwru ri Zẹbulọn kugbe Naftaili.

¹⁴ Rere ota na vwọ gba, ọ rẹ Aizaya mraro rọye nẹ,

¹⁵ Otọ ri Zẹbulọn kugbe Naftaili, Rọ kẹrẹ abadi vwẹ abo oboyi ri Jọdan, Kugbe Galili rẹ erhorha na,

¹⁶ Ihwo ri tidia vwẹ evun rẹ ebri ayen mrẹ urhukpẹ rode, kugbe ihwo re hẹ uhoho rẹ ughwu, Arhọ ọkpokpọ de bru ayen rhe.

¹⁷ Nẹ ọke yena yanran, Jesu kọ ta ota rẹ iyẹnrẹ esiri na, ọ da ta nẹ, we kurhẹriẹ, uvie rẹ odjuvwu si kẹre re.

Jesu se Ihwiyeri Ẹne

¹⁸ Rọ vwọ yan vwẹ orhoma rẹ abadi ri Galili, ọ da mrẹ iniovo ivẹ, Saimọn re se Pita, kugbe Andru rẹ oniọvo rọye ri phiẹ obriki vwẹ evun rẹ abadi, kidie ayen ihwiyeri.

¹⁹ Ọ da ta kẹ ayen nẹ, We nene uvwe, ki nu ru ovwan vwọ dia ihwiyeri rẹ ihwo.

²⁰ Siẹvuọvo na, ayen da ghwa yan jẹ ibriki rayen vwo, ayen de nene.

²¹ Rọ vwọ yan hẹ obaro emerha, ọ da mrẹ iniọvo ivẹ efa, Jems rẹ ọmọ ri Zẹbidi kugbe Jọn rẹ oniọvo rọye, vwẹ evun rẹ okọ kugbe Zẹbidi rẹ ọsẹ rayen re rhuẹrẹ ibriki rayen, o de se ayen.

²² Siẹvuọvo na ayen da yan jẹ ọsẹ rayen vwo vwẹ evun rẹ okọ ayen de nene.

Jesu ru Iruo kẹ Urogho rode

²³ Jesu da yanrhe yankpo vwi Galili, o de yono ihwo vwi Sinagọg, ọ da ta ota rẹ iyẹnre esiri rẹ uvie na, o de sivwi ihwo buebu re mwa ọga, dohwo doghẹre rẹ emiavwe rọye.

²⁴ Usi rọye de kperi ruẹ Siria; ayen de mu ihwo buebu re mwa ọga bro rhe, e re mwa orhuẹ, i ri she enwẹnwẹ, i ri ghwoma; etiyin o de sivwi ayen.

²⁵ Ihwo buebu de tue nene nẹ Galili rhe, te Dikapolis, te Jerusalẹm, te Judia kugbe ovrẹn ri Jọdan.