Matiu 27 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Arẹyọ Jesu vwo rhe Pailet

¹ Rẹ ọke rhi vwo rhie, ilori rẹ irherẹn na ejobi kugbe ekpako ri Ju na ejobi, da ra ro ẹguare kpahe Jesu obo rẹ ayen ru hwe.

² Ayen da gba, ayen de suo yanran kpo asan ri Pailet oguẹdjọ na.

Ughwu ri Judas

³ Judas rọ shẹrẹ na, rọ vwọ mrẹ nẹ e bruhwe nure, o de kurhẹriẹ, ọ da ghwẹ idọnọ efuanfon ọgban na vwo rhe otu rẹ ilori rẹ irherẹn kugbe ekpako na,

⁴ nẹ, Mi ru chọ, re me vwọ shẹ ọvwata na ekueku. Ẹkẹvuọvo ayen da ta nẹ, ọye dia ota rẹ avwanre-e, ọye ota wẹn.

⁵ Ọ da kpare igho na phihọ otọ, ọ da yanran re churu ghwu.

⁶ Ilori rẹ irherẹn na da reyọ igho na, ayen da ta nẹ, Ofori rere a vwẹ igho nana ba igho rẹ avwanre-e, kidie igho rẹ ọbara i ruẹ.

⁷ Ayen da jẹ iroro nẹ, a vwẹ igho na dẹ otọ re shi erhorha phihọ.

⁸ Kẹ ọke yena yanran e de se otọ na Otọ rẹ Obara.

⁹ Ota ri Jẹrimaya tare na da gba nẹ, Ayen da reyọ idọnọ efuanfon ọgban na, unuigho rẹ emọ rẹ Izrẹl shẹrẹ na.

¹⁰ Ayen da vwọ de otọ, ọtiọye Ọrovwohwo ta kẹ vwẹ.

Pailet nẹ Jesu Enanọ

¹¹ Jesu de rhi mudia vwẹ obaro ri Pailet oguẹdjọ na, ọ da nọ nẹ, Wẹ hẹ ovie ri Ju na? Jesu da kpahe kẹ nẹ, Wẹ re tare.

¹² Rẹ otu rẹ ilori rẹ irherẹn kugbe ekpakọ na rhi vwo gu kpahọ ọ kpahe ota ọvuọvo-o.

¹³ Pailet da ta kẹ ayen nẹ, Wo nyo obo rẹ ayen guẹ kpahe owẹ na?

¹⁴ Ọ je kpahe ota ọvuọvo-o; o de gbe Pailet unu gangan.

Ebrorhiẹ rẹ Ughwu hwe Jesu

¹⁵ Vwẹ ọke orẹ na, Pailet da guọnọ siobọ nẹ ohwo ọvo kẹ ayen vwẹ uwodi na.

¹⁶ Ọke yena ohwo ọvo rọ suota, ji vwẹ ozighẹ re se Barabas je hẹ uwodi na.

¹⁷ Ayen rhi vwo si koko, Pailet da nọ ayen nẹ, Ono wa guọnọre ni mi siobọ nu kẹ ovwan? Barabas gbenẹ Kristi?

¹⁸ Kidie ọ riẹnre nẹ omaẹriọ ayen vwo muo rhe.

¹⁹ Ro vwo tidia vwẹ asan re de brorhiẹ, aye rọye de ji ohwo ra vuẹ nẹ, Wo brorhiẹ hwe ọvwata na-a; Kidie me vwerhẹ evwerhẹ kpahọ buebu vwẹ ason na.

²⁰ Ilori rẹ irherẹn kugbe ekpako na da riẹriẹ ihwo na nẹ, e siobọ nẹ Barabas re hwe Jesu.

²¹ Pailet da nọ ayen nẹ, Ono vwẹ ivẹ na wa guọnọre ni mi siobọ nu kẹ ovwan? Ayen da ta nẹ, Barabas.

²² Pailet da ta kẹ ayen nẹ, Komavọ mi ru ọ rẹ ovwan se Kristi na? Ayen da ta nẹ, e ja karọ mu agbagba.

²³ Ọ da ta nẹ, Kidie o ruru. Ayen da rhoma kperi gangan nẹ, e ja karọ mu agbagba.

²⁴ Pailet rhe vwọ mrẹ nẹ ota rọye sa rhẹriẹ udu rẹ ihwo na-a nẹ ayen jẹ iroro rẹ ozighi, ọ da vwẹ ame hworhẹ obọ rọye vwẹ irharo rẹ ayen nẹ, Obọ mẹ hẹ ughwu rẹ ọvwata nana-a, ọye ota rẹ ovwan.

²⁵ Ayen da kpahe ta nẹ, Ọbara rọye dia enu rẹ uyovwi rẹ avwanre vẹ emọ rẹ avwanre.

²⁶ O de siobọ nẹ Barabas kẹ ayen, ẹkẹvuọvo ọ da vwẹ ugbudia fa Jesu ọ da vwọ kẹ ayen re ayen ra karọ mu agbagba.

Isodje na reyọ Jesu vwọ Jehwẹ

²⁷ Isodje ri Pailet de sun Jesu kpo uwevwi rẹ ovie, ayen de se ogodogo riariẹ,

²⁸ Ayen da ban phihọ, ayen de ku ewun ovwavware phihọ.

²⁹ Ayen da wọn erhu rẹ odjigbẹ vwo tughẹ, ayen da vwẹ ugbẹn rẹ ọghọrọghọdẹ vwọ hẹ obọ; ayen de diguẹ kẹ, vwọ jehwẹ tanẹ, Do, Ovie ri Ju!

³⁰ Ayen de dje enya kuo, ayen da vwẹ ọghọrọgbọdẹ na fa uyovwi.

³¹ Rẹ ayen vwọ reyọ vwọ jehwẹ nu, ayen de ku adagba ọvwavware na no oma, ayen de ku ewun rọye phihọ, ayen de suo ra kare mu agbagba.

Ekanrọ mu Agbagba na

³² Rẹ ayen ghwa vwọ ro uphẹphẹ, ayen da mrẹ ohwo ri Saerini, re se Saimọn, ayen da gba nẹ ọ ghwa agbagba rọye na.

³³ Ayen de rhi vwo te asan re se Gọlgọta, otọ rọye, ekpehruyovwi.

³⁴ Ayen da vwẹ udi rọ yara korokoro kẹ, rọ vwọ davwọ o jọ da-a.

³⁵ Rẹ ayen vwọ karọ mu agbagba nu, ayen da bẹrẹ ewun rọye vwo duvwu itẹ.

³⁶ Ayen de tidia kẹrẹ ra vwọ rhẹrẹ.

³⁷ Ayen de si urhi re vwo muo nẹ, ỌNANA JESU OVIE RI JU.

³⁸ A da kare iji ivẹ kugbe, ọvo hẹ obọrhe ọrivẹ hẹ obọhwẹre.

³⁹ Ihwo re yan vrẹn mi mienu phihọ ayen mi kpogho uyovwi,

⁴⁰ tanẹ Wẹ ro kporo uwevwi rẹ ẹga na, rọ da bọn ẹdẹ erha na, sivwi oma wẹn, wọ da ghene dia ọmọ rẹ Ọghẹnẹ gbe pho rhiotọ.

⁴¹ Ọtiọye na, ilori rẹ irherẹn, kugbe isiẹbe na vẹ ekpako na je vwọ jehwẹ tanẹ,

⁴² Ọ sivwi ihwo efa; yo se sivwi oma rọye-e. Ọ ta nẹ, ọye hẹ ovie rẹ Izrẹl; gbe wotọ rhe re avwanre mrẹ, kẹ avwanre se we gbuyota.

⁴³ Ọ vwẹ ẹro so Ọghẹnẹ; e gbe jo sivwo ra mrẹ, obo rọ guọnerọ te na; kidie ọ tare nẹ, Mẹvwẹ ọmọ rẹ Ọghẹnẹ.

⁴⁴ Iji ra kare kugbe na da je vwọ jehwẹ rhe.

Ughwu ri Jesu

⁴⁵ Kẹ unọke esan yanran egho de rhi mu vwẹ asan ejobi rhiri rhi te unọke irhiri.

⁴⁶ Unọke irhiri vwo te Jesu de kperi urhuru gangan ta nẹ, Eloi, Eloi lama sabaktani? ra fan otọ rọye nẹ, Ọghẹnẹ mẹ, Ọghẹnẹ mẹ, die jabọ wọ vwọ sen vwẹ?

⁴⁷ Evo ri mudia kẹrẹ vwẹ etiyin na da ta nẹ, o se Ilaija.

⁴⁸ Siẹvuọvo na ohwo ọvo rọ hẹ etiyin na da djẹ ra reyọ ahworhẹ, o de duvwo phihọ viniga, ọ da vwẹ ubiurhe kparọ kẹ nẹ ọda.

⁴⁹ Iri cheko da ta nẹ, Jo vwo re Ilaija rhi sivwo.

⁵⁰ Jesu da rhoma kperi gangan, o de phi ẹnwẹn họ.

⁵¹ Nighe amwa ra vwọ tan obaro rẹ ẹshẹ na, da bẹre ẹbẹre ivẹ nẹ otọ rhi duvwu enu; otọ de mu kpogho; eragha de mu bẹre.

⁵² Ishi rẹ ihwo efuanfon rẹ Ọghẹnẹ ri ghwuru rhabae de mu rhie, irivwi re herọ da varhe;

⁵³ Ayen vwọ varhe nu, ayen da rhe orere Ọfuanfon na re vwẹ oma phia kẹ ihwo buebu.

⁵⁴ Ọke yena olori rẹ isodje rọ rhẹrẹ Jesu vwẹ etiyin, kugbe otu rọye, vwọ mrẹ otọ re kpoghori, kugbe emu buebu re phiare na, oshọ de mu ayen gangan ta nẹ, Uyota ohwo nana ghine ọmọ rẹ Ọghẹnẹ.

⁵⁵ Eya buebu je hẹ etiyin ri no vwẹ ogboko, iri nene Jesu vwẹ obi Galili jovwo, re vwẹ ẹro te.

⁵⁶ Meri ri Magdala je hẹ usun rẹ ayen, kugbe Meri rẹ oni ri Jems vi Josis kugbe oni rẹ emọ ri Zẹbidi.

Esho ri Jesu

⁵⁷ Ovwọnvwọn rhi vwo te, ọdafe ọvo ohwo rẹ Arimatia, odẹ rọye Josẹf, je vwẹ usun rẹ ihwo ri nene Jesu jovwo na.

⁵⁸ O de bru Pailet ra, ra yare orivwi ri Jesu. Pailet da rhọvwe kẹ.

⁵⁹ Josẹf de mu orivwi ri Jesu, ọ da vwẹ ukpoyibo vwọ pharọ.

⁶⁰ O de re sho vwẹ ushi rọ tọn kẹ omobọ rọye, rọ tọn phihọ evun rẹ oragha, o de ghorie oragha nyẹ unu rẹ ushi na.

⁶¹ Meri ri Magdala kugbe Meri rivẹ de tidia hirhe opharo ku ushi na.

Ihwo re rhẹrẹ Ushi na

⁶² Vwẹ ẹdẹ rivẹ, rẹ ẹdẹ rẹ Erhuẹrẹ kpahọ vwọ wan nu, ilori rẹ irherẹn kugbe otu ri Farisi de koko bru Pailet rhe.

⁶³ Nẹ, Ọga, avwanre karohọ rẹ ọvworofian na, vwọ hẹ akpọ tare nẹ, Ẹdẹ erha da wan nu ki mi vrẹn nẹ ughwu.

⁶⁴ Ji ihwo re nabọ rhẹrẹ ushi na kokoroko, re idibo rọye vwo jẹ bẹbẹ muo reyọ, re ayen da rhe phiẹn ihwo nẹ, Ọ vrẹnri; oruchẹ yena kọye ma rho nọ ọ rẹsosuọ.

⁶⁵ Pailet da ta kẹ ayen, wa yanran re wa ra rhẹrẹ.

⁶⁶ Ayen da yanran, ra nabọ ji ihwo ra rhẹrẹ ushi na, ayen da nabọ phare unu rẹ ushi na di kokoroko.