Matiu 25 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Itẹ rẹ Ikọpha Ihwo na

¹ Uvie rẹ odjuvwu kọ họhọ ikọpha ihwe, re reyọ irhukpẹ rayen, ayen da ra vwa ọpha.

² Iyori vwẹ usun rẹ ayen da dia ẹkpa, iyori ri chekọ de vwọ aghwanre.

³ Otu rẹ ẹkpa na, ọke rẹ ayen vwọ reyọ urhukpẹ nu, ayen ghwa evwri choma-a;

⁴ Ẹkẹvuọvo otu ri vwo aghwanre na da ghwa evwri choma.

⁵ Ọpha na gbe fobọ rhe-e, ikọpha na da vwerhẹ re.

⁶ Ẹkẹvuọvọ ro rhi vwo te uherevie ason e de kuvwie nẹ, Nighe ọpha na cha re! Wa yanrhe re a ra vwa ọpha na.

⁷ Ikọpha na de vrẹn, aye da vwẹ irhukpẹ rhu.

⁸ Otu rẹ ẹkpa na da ta kẹ e re ghwanre na nẹ, Wa kẹ avwanre emevwri rere avwanre ku phihọ irhukpẹ rẹ avwanre, kidie irhukpẹ rẹ avwanre furu.

⁹ Ẹkẹvuọvo otu re ghwanre na da kpahe ta nẹ, Avwanre de ku kẹ ovwan nu, ọ ro chekọ gbi te kẹ avwanre-e. Wa yanran bru ihwo re shẹ rere wa ra dẹ.

¹⁰ Ọke rẹ ayen vwọ yanran ra dẹ nu, ọpha na da rhe vwẹ obuko rayen; ikọpha ri vwo urhukpẹ na vẹ ọye da ro uwevwi rẹ orẹ na; ẹchẹ na de huhu.

¹¹ Ukoko rọye ikọpha ri chẹkọ obuko na da rhe, ayen de se nẹ, Ọrovwohwo, Ọrovwohwo rhiẹ ẹchẹ kẹ avwanre.

¹² Ẹkẹvuọvo ọ da kpahe ọ da ta nẹ, Uyota me ta kẹ ovwan, Me riẹn ovwa-an.

¹³ Rhẹrẹ kidie wa riẹn ọkẹ eyẹ ẹdẹ rẹ Ọrovwohwo vwọ rhe-e,

Itẹ rẹ Igho na

¹⁴ Kidie ọ họhọ ọke rẹ ọshare ọvo vwo kpo isiorho, o de se idibo rọye, ọ da vwẹ ighọ kẹ ayen.

¹⁵ Ọ vwẹ ikpahọ iyori kẹ ọvo, ọ vwẹ ivẹ kẹ ọrivẹ, ọ da vwẹ ọvo kẹ ọrerha, krẹkrẹ kirobo rẹ ogangan rayen teri; o de kpo oyan.

¹⁶ Ọ rẹsosuọ da vwẹ igho rọye cho eki ọ da mrẹ erere rẹ ikpahọ iyori ọfa vwẹ enu rọye.

¹⁷ Ọ rivẹ da je mrẹ erere rẹ ikpahọ ivẹ efa.

¹⁸ Ẹkẹvuọvo ọ rerha ra vwẹ ikpahọ ọvo kẹ na, da yanran ra tọn igho rẹ ọrovworo vwọ họ otọ.

¹⁹ O rhi vwo kri re ọ ro vwo odibo na da rhe, o de rhi kere igho rọ ghwẹ kẹ ayen yọnre na.

²⁰ Ọ ra kẹ ikpahọ iyori na, da rha vwẹ ikpahọ iyori efa kpahọ rhe ọ da ta nẹ, ikpaho iyori wọ vwọ kẹ vwẹ jovwo; nighe me je mrẹ erere rẹ ikpahọ iyori efa vwẹ enu rọye,

²¹ Ọrovworo da ta kẹ nẹ, Wo runọ odibo rẹ esiri na; wọ vwọ dia ọvwata vwẹ oma rẹ ememu nana, ku wọ dia ovie vwẹ enu rẹ emu buebu; mọ rhe ro aghọghọ rẹ ọrovwowe.

²² Ọ ra kẹ ikpahọ ivẹ na da rhe ọ da ta nẹ, Ọrovwohwo ikpahọ ivẹ wọ kẹ vwẹ; nighe me mrẹ erere rẹ ikpahọ ivẹ efa vwẹ enu rọye.

²³ Ọrovworo da ta kẹ nẹ, Wo runọ odibo rẹ esiri, wọ vwọ dia ọvwata vwẹ emu otete nana, gba ra re ovie vwẹ enu rẹ emu buebu; mọ rhe ro aghọghọ rẹ Ọrovwowe.

²⁴ Ọ ra kẹ ikpahọ ọvo na da rhe ọ da ta nẹ, Ọrovwohwo, Me riẹnre nẹ ohwo ọgangan wo ruẹ, asan wọ kọn phihọ-ọ etiyin wo de vuẹ, asan wo phihọ-ọ etiyin wọ da reyọ;

²⁵ Oshọ ko mu vwe ke me ra tọn igho wẹn phihọ otọ; nighe igho wẹn na.

²⁶ Ẹkẹvuọvo ọrovworo da kpahe ọ da ta kẹ nẹ, Wẹ odibo ọbrabra na, wọ da riẹn nẹ asan re me kọn phihọ-ọ etiyin mi de vuẹ kugbe asan ri mi phihọ-ọ etiyin me da reyọ?

²⁷ Mane ki wo phi igho mẹ vwọ hẹ bank, rere ọke me da rhe me mrẹ erere vwọ?

²⁸ We gbe mie ikpahọ ọvo na re wa vwọ kẹ ọ ro vwo ikpahọ ihwe na.

²⁹ Kidie ohwo kohwo ro vwori ọye a kẹ, ọroye ko bu phihọ; ọ ro vwori-i, emerha ro vwori na ka karhiẹn mie.

³⁰ We mu odibo ọbrahra na phihọ uwodi; kẹ etiyin o de beroma ọ da reako.

Ẹdjọeguọ rẹ Irere na

³¹ Ẹkẹvuọvo ọke rẹ Ọmọ rẹ ohwo da cha rhe vwẹ urinrin, vẹ emakashe rọye, kọ che tidia vwẹ ekete rẹ urinrin rọye.

³² Ka cha ghwẹ ẹgborho rẹ akpọ na ejobi koko obaro rọye; ko hẹriẹ ayen ohwohwo nohwo kerẹsiẹ rẹ osuigodẹ a da hẹriẹ igode nẹ usun rẹ ẹvwe.

³³ Kọ ghwẹ igodẹ vwọ hẹ obọrhe, ẹkẹvuọvo ọ me rha ghwẹ ẹvwe vwọ hẹ obọhwẹre.

³⁴ Ovie na kọ ta kẹ ihwo re hẹ obọrhe rọye nẹ, Wa yanrhe ihwo rẹ ọsẹ mẹ bruba kẹ, wa rhe reuku rẹ uvie ra rhuẹrẹ vwọ otọ kẹ ovwan nẹ otọ rẹ akpọ rhe.

³⁵ Kidie owẹvwe hwe vwe wọ da kẹ vwẹ emu re; urhuru rẹ ame hwe vwe wọ da kẹ vwẹ ame da; me vwọ hẹ ọrhorha wo de se vwe te uwevwi;

³⁶ Me banphihọ wọ da vwẹ amwa rhuo vwe; me vwọ hovwa ọga wo de rhi yenre uvwe; me vwọ hẹ uwodi wọ da rhe mrẹ vwẹ.

³⁷ Evwata na kẹ kpahe kẹ nẹ, Ọrovwohwo, ọkevọ me vwọ mrẹ wẹ rẹ owẹvwe hwe we me da kẹ wẹ emu re? rẹ urhuru rẹ ame hwe we me da kẹ wẹ ame da?

³⁸ Ọkevọ wọ vwọ hẹ ọrhorha mi de se we ro uwevwi? wọ vwọ banphihọ mi de rhuo we?

³⁹ Ọkevọ me vwọ mrẹ wẹ vwẹ ọga eyẹ vwẹ uwodi mi de bru uwe rhe?

⁴⁰ Ovie na kọ kpahe kọ ta kẹ ayen nẹ, Uyota me ta kẹ ovwan, kirobo ri we ruro kẹ ohwo ọvo vwẹ usun rẹ imoni mẹ na, yẹ ovwan ruro kẹ vwẹ.

⁴¹ Kọ cha ta kẹ ihwo re hẹ obọhwẹre rọye nẹ, Bioma nẹ asan mie epha, ovwan ihwo ra harhere na, vwo kpo erhanre ri bẹdẹ re koko phihọ kẹ ẹdjọ vẹ emakashe rọye.

⁴² Kidie owẹvwe hwe vwe wa kẹ vwẹ emu re-e; urhuru rẹ ame hwe vwe wa kẹ vwẹ ame da-a;

⁴³ ọrhorha mi ruẹ we se vwe te uwevwi-i, me banphihọ wa vwẹ amwa rhuo vwe-e; me mwa ọga, e mu vwe vwọ hẹ uwodi we te asan mie epha-a.

⁴⁴ Ayen ke kpahe ta nẹ, Ọrovwohwo, ọkevọ me vwọ mrẹ wẹ rẹ owevwe hwe, eyẹ rẹ urhuru rẹ ame hwe, eyẹ ọrhorha, eyẹ rẹ ọ banphihọ, eyẹ rẹ ọ mua ọga eyẹ rọ hẹ uwodi ri mi ru emu ọvuọvo kẹ wẹ-ẹ?

⁴⁵ Kọ ta kẹ ayen nẹ, Uyota me ta kẹ ovwan, kirobo we ruro kẹ ohwo ọvo vwẹ usun rẹ imoni mẹ na-a, we ruro kẹ vwẹ-ẹ.

⁴⁶ Ihwo nana ki kpo ehwe ri bẹdẹ ẹkẹvuọvo otu rẹ evwata ki kpo arhọ ri bẹdẹ.