Matiu 24 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jesu ta Ota kpahe Eguọghọ rẹ uwevwi rẹ ẹga na

¹ Jesu de vrẹn nẹ evun rẹ uwevwi rẹ ẹga na, kọ yanran vwẹ evun rẹ idjerhe; idibo rọye de bro rhe re vwẹ uwevwi rẹ ẹga na vwọ nẹ.

² Ẹkẹvuọvo ọ da kpahe ọ da ta kẹ ayen nẹ, Ovwan mrẹ ekuakua nana? uyota me ta kẹ ovwan, Oragha ọvuọvo che mudia vwẹ enu rẹ ohwohwo, re je kporo she-e.

Ẹtuọhọ rẹ Ọja na

³ Ọke ro vwo tidia vwẹ enu rẹ ugbenu rẹ Oliv, idibo rọye da bẹbẹ bro rhe nẹ, ta kẹ avwanre, ọkevọ emu nana cha vwọ phia? eyẹ kọrhọ re cha dia oka rẹ ẹcha rẹ ọmọ rẹ ohwo, kugbe oba rẹ akpọ na?

⁴ Jesu da kpahe ọ da ta kẹ ayen nẹ, Wa jomaotọ rere ohwo vwo jẹ ovwan esuo ghwro.

⁵ Kidie ihwo buebu cha rhe vwẹ odẹ mẹ nẹ, Mẹvwẹ hẹ Kristi na; o mi rhi sun ihwo buebu ghwru.

⁶ We che nyo umri rẹ ofovwi kugbe edo rẹ ofovwi. We jẹn udu bru ovwa-an, kidie enana ejobi cha wan vrẹn; ẹkẹvuọvo je oba na ji te-e.

⁷ Kidie ẹgborho cha vwọ so ẹgborho, uvie cha vwọ so uvie, owẹvwe che fi, otọ che kpogho vwẹ asan buebu.

⁸ Ẹkẹvuọvo enana ejobi ke cha dia ẹtuọhọ rẹ oja.

⁹ Ka cha vwẹ okpetu so ovwan ke hwe ovwan; ivun rẹ ovwan ko che miovwo ẹgborho ejobi fiki rẹ odẹ mẹ.

¹⁰ Ihwo buebu ki che she, ohwohwo ko che mu ohwohwo; ivun che di mu ihwo miovwẹ.

¹¹ Emraro rẹ efian buebu cha rhe, ayen mi rhi sun ihwo buebu ghwru.

¹² Fiki rẹ imwemwu buebu re cha rhe akpọ na, ẹguọnọ rẹ ihwo buebu ki che djiro.

¹³ Ẹkẹvuọvo ihwo ri se chirako te oba, kẹ eye re cha rhọ.

¹⁴ Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi; tavwe rẹ oba na ki rhi te.

Ukpokpogho Rode na

¹⁵ Ọke rẹ ovwan da rhe mrẹ ukpokpogho rẹ ẹgua, ra tare vwẹ ọbe ri Daniẹl ọmraro na, ro mudia vwẹ asan ọfuanfon na (e jẹn ohwo ro se riẹn otọ rọye),

¹⁶ E gbe jẹn ihwo ri Judia djẹ kpo enu rẹ igbenu.

¹⁷ E jẹn ohwo rọ hẹ enu rẹ uwevwi wotọ cha reyọ emu ọvuọvo nẹ uwevwi na-a.

¹⁸ E jẹn ohwo rọ hẹ obo aghwa cha reyọ ewun rọye-e.

¹⁹ Ẹkẹvuọvo o miovwi kẹ eya vẹ evun kugbe e re vwẹ ivie kẹ emọ vwẹ ẹdẹ yena.

²⁰ Gba nẹ ẹrhovwo rere ọke rẹ ugbonẹ wẹn vwo je shehọ ọke rẹ ohwahwa, eyẹ ẹdidjala.

²¹ Ọke yena ukpokpogho rode kọ cha phia, ra je mrẹ oghẹre rọye dẹvo-o, eyẹ ọfa ro rho te oghẹre ọtiọna gbe sa phia bẹdẹ-ẹ.

²² Jokpa nẹ ke ru ẹdẹ na krẹ, o se vwo ohwo ọvuọvo rọ cha rhọ-ọ; ẹkẹvuọvo vwi fiki rẹ ihwo ra sanọre na, ke ru ẹdẹ na krẹ.

²³ Ọke yena ọ da dianẹ ohwo ta kẹ wẹ nẹ, No, Kristi hẹ etinẹ eyẹ ọ hẹ etiyin; wo segbuyota.

²⁴ Kidie Kristi rẹ efian cha rhe, kugbe emraro rẹ efian, ayen cha vwẹ eka buebu phia, kugbe emu rẹ igbunu buebu; rere ayen vwọ phiẹn ihwo buebu ghwru; udu rẹ ayen da gba ihwo ra sanọ reyọ dede na, a jẹ phiẹn ayen.

²⁵ Nighere me ta kẹ ovwan jovwo tavwe rẹ ọke na ki rhi te.

²⁶ Ọ da dianẹ ayen ta kẹ ovwan nẹ, Nighe, ọ hẹ evun rẹ aghwa; wọ ra-a, Nighe, ọ hẹ evun rẹ uvun, wo segbuyota-a.

²⁷ Kidie kirobo rẹ enu nyavwaro vwẹ obaro ọnre rẹ ihwo rẹ obuko ọnre da vwọ mrẹ orẹ na, ọtiọye ẹcha rẹ ọmọ rẹ ohwo cha dia.

²⁸ Asan rẹ irivwi epha etiyin ekala de koko.

Echa rẹ Ọmọ rẹ Ohwo

²⁹ Siẹvuọvo na, rẹ ukpokpogho nana ejobi de nẹ otọ nu, ọnre ko che muegho, emeranvwe gbi che lo-o, isio ki che she nẹ enu rhe, ogangan rẹ obo odjuvwu ejobi ki che kpogho;

³⁰ Kẹsiẹye oka rẹ ẹcha rẹ ọmọ rẹ ohwo ke cha phia vwẹ obo odjuvwu, uvie rẹ akpọ na ejobi ki che muomahọ, kẹ ayen cha mrẹ ọmọ rẹ ohwo rọ cha vwẹ ikoro rẹ obo odjuvwu vẹ urinrin rode.

³¹ Ko ji emakashe rọye vẹ owanre rode, ayen ki che se ihwo ra sanọ reyọ ejobi na, nẹ igogo ẹne rẹ akpọ na rhe, nẹ oba rẹ akpọ ọvo re te ọrivẹ.

Uyono rẹ Urhe rẹ Owe na

³² Ovwan gba karohọ itẹ rẹ owe na; ọke rọ da ghwẹ ẹbe phihọ, rẹ eghọn rọye da hẹ ọboba, gba ghwa riẹn nẹ evwru rhire.

³³ Eriyin ọ dia, ọke rẹ ovwan da mrẹ emu nana ejobi re cha phia, wa gba ghwa riẹn nẹ ọke na te nure, nighe o te anurhoro nure.

³⁴ Uyota me ta kẹ ovwan, uvwiẹ nana ejobi cha sa wan tavwe, re imu nana ke rhe phia-a.

³⁵ Odjuvwu vẹ akpọ cha wan, ẹkẹvuọvo ota mẹ se she fia-a.

Ohwo Ovuọvo Riẹn Ẹdẹ na ẹyẹ Ọke na-a

³⁶ Ẹkẹvuọvo ọke na eyẹ ẹdẹ na ohwo ọvuọvo sa riẹ-ẹn, emakashe rẹ obo odjuvwu sa riẹ-ẹn, ekpuyovwi rẹ Ọmọ rẹ ohwo je sa riẹn dede-e, jokpa rẹ Ọsẹ na ọvo.

³⁷ Kirobo rọ epha vwẹ ọke ri Noa, eriyin ẹcha rẹ Ọmọ rẹ ohwo je cha dia.

³⁸ Obo rọ epha tavwe rẹ oghwe na ki rhi ku eriyin ọ je dia; ayen rọ ria ayen rọ da, ayen rọvwọ eya ayen ji vwo bregọ, rhiri rhi te ọke ri Noa rhe vwọ ro okọ na.

³⁹ Ayen gbe riẹn ọke rẹ oghwe na rhi vwo ku-u, ayen de divwi ghwu vwẹ evun rẹ oghwe na; eriyin ẹcha rẹ Ọmọ rẹ ohwo na cha dia.

⁴⁰ Ọke yena eshare ivẹ che ru iruo vwẹ evun rẹ udju, a me reyọ ọvo e mi gbobọnyẹ ọvo.

⁴¹ Eya ivẹ che wuye vwẹ asan ọvo, a cha reyọ ọvo re de jẹ ọvo vwo.

⁴² Gba rhẹrẹ; kidie wọ cha riẹn ẹdẹ rẹ Ọrovwohwo cha vwọ rhe-e.

⁴³ Ẹkẹvuọvo gba riẹn onana nẹ, ohwo ro vwo uwevwi da riẹn ọke rẹ iji cha vwọ rhe, kọ rhẹrẹ hrọke, ọ gbe sa fọ nẹ iji tọn uwevwi rọye fi-i.

⁴⁴ Fiki rẹ eriyin na we muegbe: kidie ọke wo roro phihọ-ọ, ọye Ọmọ rẹ ohwo cha vwọ rhe.

Odibo rẹ Esiri eyẹ Ọ ro Miomiovwi

⁴⁵ Ono hẹ omamọ rẹ odibo esiri na, rẹ ẹsiẹ rẹ ọrovworo da rhe o de vwo mu olori rẹ uwevwi rọye, rọ da vwẹ emu kẹ ayen re vwẹ ọke yena?

⁴⁶ Ebruba kẹ odibo yena ra vware vwẹ ẹdia ọtiọye.

⁴⁷ Uyota me ta kẹ wẹ, kọ dia olori vwẹ enu rẹ emu ro vwori ejobi.

⁴⁸ Ẹkẹvuọvo odibo na da rha ta vwẹ udu rọye nẹ, Ọrovwovwe cha fobọ rhe-e.

⁴⁹ O mie hwe idibo ri chekọ, o mia ria, ọ mia da, idi mie muo;

⁵⁰ Ọrovworo cha rhe kpregede, vwẹ ọke ro roro phihọ-ọ, ọ me rhe ruọ ọrhan,

⁵¹ kọ nyavwọ ibribro, ke muo phihọ uwodi, kẹ etiyin o de beroma ọ da reako.