Matiu 22 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Itẹ rẹ Eha rẹ Orọvwe na

¹ Jesu da kpahe ọ da ta kẹ ayen vwẹ itẹ nẹ,

² Uvie rẹ odjuvwu họhọ ovie ọvo, rọ reyọ aye vwo kẹ ọmọ rọye.

³ O de ji idibo rọye nẹ, wa yanran we re se ihwo ri mi durhieri jovwo na vwọ kẹ orẹ rẹ orọvwe na; ihwo na gbe rhọvwe rhe-e.

⁴ Ọ da rhoma ji idibo efa re se ayen nẹ, Ta ke ihwo ri mi seri jovwo na nẹ, Nighe, Mi chere emu vọn otọ nure; erhuẹn mẹ kugbe egbo mẹ rode na e hwe ayen, emu na ejobi gba nure; Wa yanrhe asan ra da cha rẹ orẹ rẹ opha na.

⁵ Ẹkẹvuọvo ayen sere gbe emu-u, ayen da yanran kpo asan ro je ayen, ọvo kpo aghwa rọye, ọfa kpo eki rọye.

⁶ I ri chekọ de shabọ phihọ idibo na, ayen de gbe oja kẹ ayen re, ayen de hwe evo.

⁷ Ẹkẹvuọvo ivun de miovwi ovie na; o de ji usun rẹ ofovwi rọye nẹ i re hwe izighẹ na, rere ayen torhẹ orere rayen na.

⁸ Ọ da ta kẹ idibo rọye nẹ, ọke rẹ orẹ rẹ orọvwe na tere, ẹkẹvuọvo ihwo re seri na gbi fo-o.

⁹ Ovwan yanran kpo idjerhe ride na, re ohwo kohwo rẹ ovwan mrẹre, we se ayen rere ayen rhe re emu mẹ na.

¹⁰ Idibo na da ghene yanran kpo idjerhe ride na, ayen de se ohwo kohwo rẹ ayen mrẹre, i ri mioma te i ri yoma; asan orẹ na da rhe vọn vẹ erhorha.

¹¹ Ẹkẹvuọvo ọke rẹ ovie na vwo rhi ni erhorha na, ọ da mrẹ ohwo ọvo ro vwo ewun rẹ ọpha na-a.

¹² Ọ da ta kẹ nẹ, Oko, mavọ wo ru sa ro uwevwi na, yi wo ku ewun rẹ ọpha phihọ-ọ? Ọ gbe mrẹ ota kpahe-e.

¹³ Ovie na da ta kẹ idibo rọye nẹ, A gba abo vẹ awọ re we muo phihọ uwodi; kẹ etiyin ọ da viẹ reako.

¹⁴ Kidie ihwo buebu e seri, ẹkẹvuọvo emerha a jẹreyọ.

Enanọ kpahẹ Osa rẹ Uyovwi Ẹhwa

¹⁵ Otu ri Farisi na da yan phia, ra jẹ iroro rẹ obo rẹ ayen vwọ kpahe ufi hẹrhẹ.

¹⁶ Ayen de ji idibo rẹ ayen kugbe otu ri Hẹrodias bro ra ayen da ta nẹ, Oyono, avwanre riẹnre nẹ wẹ ohwo rẹ uyota, wo ji yono idjerhe rẹ Ọghẹnẹ rẹ uyota, ye wọ je davwerhọn rẹ ohwo-o. Kidie wo nẹ ikparo rẹ ohwo-o.

¹⁷ Gba ta kẹ avwanre, obo wo rori. O fori ra vwo hwa osa kẹ Siza gbenẹ a hwa-a?

¹⁸ Ẹkẹvuọvo Jesu da ghwa riẹn iroro rẹ udu rayen, ọ da ta, Die ovwan vwọ davwẹ ovwẹ nẹ, iruero na?

¹⁹ A vwẹ igho rẹ arhọghọ na rhe vwe. Ayen da vwẹ ikọba vwọ nẹ.

²⁰ Ọ da ta kẹ ayen nẹ, Ono ri vwo ifoto nana kugbe obo re si phihọ na?

²¹ Ayen da ta kẹ nẹ, I ri Siza. Ọ da ta kẹ ayen nẹ, A vwẹ ẹkẹn ri Siza kẹ Siza; re a vwẹ ọ rẹ Ọghẹnẹ kẹ Ọghẹnẹ.

²² Ọke rẹ ayen vwo nyo, o de gbe ayen unu, ayen de gbobọnyẹ, ayen da yanran.

Enanọ kpahẹ Evrẹnushi

²³ Ẹdẹ yena ọvuọvo na, ihwo ri Sadiusi de bro rhe, e re phra nẹ evrenushi herọ-ọ; ayen da nọ nẹ,

²⁴ Oyono, Mosis tare nẹ, Ohwo de ghwu ro vwiẹri-i, oniọvo rọye ko reyọ aye rọye, rere o vwiẹ kẹ oniọvo rọye na.

²⁵ Iniọvo ighwrẹ da herọ; Ọ rẹ okpako da reyọ aye o de ghwu ọ vwieri-i, ọ rọ kpaherọ da reyọ aye na.

²⁶ Ọtiọye ji te ọrerha, rhiri rhi te ọrighwrẹ.

²⁷ Ukuko rọye aye na de rhi ghwu.

²⁸ Ọke rẹ evrẹnushi na kono ri vwo ayen na vwẹ usun rẹ iniọvo ighwrẹ na? Kidie ayen ighwrẹ na rọvwerọ gba.

²⁹ Ẹkẹvuọvo Jesu da kpahe kẹ ayen nẹ, Ovwan riẹn emuọvo-o, ovwan riẹn otọ rẹ ẹbe ọfuanfon na-a, eyẹ ogangan rẹ Ọghẹnẹ-ẹ.

³⁰ Ẹdẹ rẹ evrẹnushi na orọvwe gbe herọ kẹ ihwo-o, ẹkẹvuọvo kẹ ayen dia kerẹ emakashe re hẹ obo odjuvwu.

³¹ Ẹkẹvuọvo vwọ kpahe ekuoma rẹ evrẹnushi rẹ otu ri ghwuru, ovwan ji se obo rẹ Ọghẹnẹ tare nẹ,

³² Mẹvwẹ Ọghẹnẹ rẹ Ebraham, Ọghẹnẹ rẹ Aizik, kugbe Ọghẹnẹ ri Jekọp. Ọghẹnẹ dia Ọghẹnẹ rẹ otu ri ghwuru-u, ẹkẹvuọvo ọ rẹ ihwo ekpokpọ.

³³ Rẹ ihwo na vwo nyo eyono rọyẹ na, o de gbe ayen unu.

Urhi rodẹ na

³⁴ Ẹkẹvuọvo ọke rẹ otu ri Farisi vwo nyo ta nẹ ọ mare otu ri Sadiusi she, ayen de re se ẹguare koko.

³⁵ Ọvo vwẹ usun rẹ ayen, oguẹdjọ o ruẹ, ọ da nọ enanọ vwọ davwọ ni,

³⁶ Oyono, ọvọ re ma rho vwẹ evun rẹ irhi na?

³⁷ Ọ da ta kẹ nẹ, Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi.

³⁸ Ọnana hẹ urhi rẹsosuọ kugbe ọ rọ marho.

³⁹ Ọ ro chekọ je họhọ ọnana, Gnọnọ ọrivẹ wẹn kirobo wọ guọnọ oma wẹn.

⁴⁰ Enu rẹ irhi nana ivẹ na, otu rẹ emraro na kugbe irhi na mudia phihọ.

Enanọ kpahẹ Ọmọ ri Devid

⁴¹ Asakiephana ọke rẹ ihwo ri Farisi vwo sioma koko, Jesu da nọ ayen enanọ ọvo nẹ,

⁴² Die we roro kpahe Kristi vwo? Ọmọ rẹ ono o ruẹ? Ayen da ta kẹ nẹ, Ọmọ ri Devid.

⁴³ Ọ da ta kẹ ayen nẹ, Komavọ Devid rha vwọ dia obo Erhi se nẹ Ọrovwohwo.

⁴⁴ Ọrovwohwo ta kẹ Ọrovwovwe nẹ, Tidia vwẹ obọrhe mẹ, Bẹsiẹ me vwọ vwẹ ivwighrẹ wẹn hwa otọ kẹ wẹ chiyi.

⁴⁵ Ọ da dianẹ Devid sere Ọrovwohwo, komavọ o ru wan dia ọmọ ri Devid vwo?

⁴⁶ Ohwo ọvuọvo sa kpahe enanọ na kẹ-ẹ eyẹ ohwo ọfa gbi ji yivwi nọ enanọ ọfa-a.