Matiu 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Udje-ẹne kpo Jerusalẹm vẹ Aghọghọ

¹ Rẹ ayen rhi vwo si kẹrẹ Jerusalẹm, rhi te asan re sẹ Bẹtfag, vwẹ ugbenu rẹ Oliv, Jesu de ji idibo rọye ivẹ,

² ọ da ta kẹ ayen nẹ, wa yanran kpo evun rẹ ọko rọ hẹ obaro rẹ ovwan na, wa da ruọ ovwan cha mrẹ ẹkẹtẹkẹtẹ vẹ ọmọ re churu; wa rhan rere we vwo rhe vwe.

³ Ọ da dianẹ ohwo da nọ ovwan ota, wa ta kẹ nẹ, Ọrovwohwo re guọnerọ; kọ yan jẹ ovwan vwo.

⁴ Ọnana ruru rere obo rẹ emraro na tare vwọ gba nẹ,

⁵ Ta kẹ ẹmẹtẹ ri Zayọn, Nighe, ovie rẹ ovwan bru ovwan cha, Fuefu, ọ rọ gua vwẹ enu rẹ ẹkẹtẹkẹtẹ, upene rọyẹ.

⁶ Idibo na da yanran, ayen da mrẹ kirobo ri Jesu dje kẹ ayen na.

⁷ Ayen da reyọ ekẹtẹkẹtẹ na vwo rhe kugbe upene rọye na, ayen da vwẹ iwun rayen hwa; o de tidia enu rọye.

⁸ Ihwo buebu da riẹn iwun rayen vwọ hwa idjerhe; evo da nyavwe ewanvwe vwọ hwa idjerhe na.

⁹ Usun rẹ ihwo ri nenire vwẹ obaro vẹ obuko, de kuvwie, Hozana kẹ Ọmọ ri Devid; Ebruphihọ kẹ ohwo rọ rhere vwẹ odẹ rẹ Ọrovwohwo; Hozana vwẹ asan ro kpenu.

¹⁰ Ọke ro rhi vwo te Jerusalẹm, orere ejobi ko muẹ kpogho, ayen ke nọ nẹ, Ọna ono vwo?

¹¹ Ihwo na da ta nẹ, Ọnana ọmraro na, Jesu rẹ ohwo ri Nazarẹt ri Galili.

Ephorho rẹ Uwevwi rẹ Ẹga na

¹² Jesu da ro evun rẹ uwevwi rẹ Ọghẹnẹ, ọ da djẹ ihwo buebu re she kugbe e re dẹ vwẹ evun uwevwi rẹ ẹga, o de geri imeje rẹ otu ri wene igho she, kugbe egbara rẹ otu re shẹ ilekuku;

¹³ Ọ da ta kẹ ayen nẹ, e siro nẹ, Uwevwi mẹ e se nẹ uwevwi rẹ ẹrhovwo; ẹkẹvuọvo we vwi ro ru unu rẹ iji.

¹⁴ Te irhuẹro te ikpono de bro rhe evun rẹ uwevwi rẹ ega na; o de sivwi ayen.

¹⁵ Ẹkẹvuọvo ọke rẹ ilori rẹ irherẹn kugbe isiẹbe vwọ mrẹ emu rẹ igbunu ro ruru, kugbe imitete ri kperẹ Hozana kẹ ọmọ ri Devid vwẹ evun rẹ uwevwi rẹ ẹga na, ivun de miovwo ayen gangan.

¹⁶ Ayen da ta kẹ nẹ, Wo nyo obo rẹ imitete na ta na? Jesu da ta kẹ ayen nẹ E; ovwan ji se dẹvo nẹ, Unu rẹ imitete ejiro da gba?

¹⁷ Ọ da yan jẹ ayen vwo, o de vrẹn nẹ orere na kpo Bẹtani, kẹ oboyi o wo phihọ.

Eharho rẹ Urhe rẹ Owe na

¹⁸ Vwẹ irhiọke ro vwo rhivwi kpo orere na, owẹvwe de hwe.

¹⁹ Rọ vwọ mrẹ urhe rẹ owe vwẹ orhoma rẹ idjerhe, o de te esiri rọye, ọ mrẹ emuọvo vwẹ enu rọye-e; jokpa rẹ ẹbe ọvo; ọ da ta kẹ nẹ, Ohwo ọvuọvo gbe sa re ubi wẹn bẹdẹ-ẹ.

²⁰ Ọke rẹ idibo na vwọ mrẹ, o de gbe ayen unu nẹ, Mavọ urhe rẹ owe na ghwe vwioro nu nanana?

²¹ Jesu da kpahe ọ da ta kẹ ayen nẹ, Uyota me ta kẹ ovwan, We de vwo esegbuyota, we rhe vwo iroro ivẹ-ẹ, ọ dia obo re phia kẹ urhe rẹ owe na ọvo ovwan ru-u, ẹkẹvuọvo ke wa ta kẹ ugbenu nana nẹ, ghwie re she phihọ urhie, kọ dia ọtiọye.

²² Kemu kemu ejobi rẹ ovwan nọre vwẹ esebuyota, ovwan ke mrẹ ayen.

Enanọ kpahe Ogangan ri Jesu

²³ Ọke ro rhi vwo te evun rẹ uwevwi rẹ ẹga, ilori rẹ irherẹn kugbe ekpako na de bro rhe, ro vwo yono ayen na, ayen da ta nẹ, Didi ogangan wo vwo ruẹ imu nana? Ono kẹ wẹ ogangan nana?

²⁴ Jesu da kpahe ọ da ta kẹ ayen nẹ, Me je nọ ovwan enanọ ọvo tavwe, ovwan da sa kpahọ kẹ vwẹ, Ke me je ta ogangan ri mi vwo ruẹ imu nana kẹ ovwan.

²⁵ Ame ẹreyọ ri Jọn ri Baptist tivọ o nurhe? obo odjuvwu gbenẹ ọ rẹ ihwo? Ayen ki roro ota na vwẹ udu rayen nẹ, avwanre da ta nẹ obo odjuvwu; kọ ta kẹ avwanre nẹ, Kidie ovwan gbi segbuyota-a.

²⁶ Ẹkẹvuọvo avwanre da ta nẹ, Ọ rẹ ihwo, ọshọ rẹ ihwo buebu na mu avwanre, kidie ihwo na ejobi rhọvwere nẹ Jọn ghine hẹ ọmraro.

²⁷ Ayen da kpahe kẹ Jesu nẹ, Avwanre riẹnre-e. Ekpuyovwi rọye da kpahe kẹ ayen nẹ, ye me gbe je ta ogangan ri mi vwo ruẹ imu nana kẹ ovwa-an.

Itẹ rẹ Emọ Ivẹ na

²⁸ Ẹkẹvuọvo die ovwan rori vwọ? Ọshare ọvo de vwo emọ ivẹ; ọ de se ọ rẹsosuọ ọ da ta kẹ nẹ, Mọmẹ, yanran kpo obo udju rere wo re ru iruo.

²⁹ Ọ da kpahe ọ da ta nẹ, me cha ra-a: ẹkẹvuọvo ukuko rọye ọ da rhoma ra.

³⁰ Ọ de rhe se ọrivẹ ọ da ta kẹ nẹ, yanran kpo obo udju mẹ. Ọ da kpahe ọ da ta nẹ me ra, yọ rare-e.

³¹ Kọrhọ vwẹ usu rẹ emọ na ivẹ na ri ru ẹguọnọ rẹ ọsẹ rọye? Ayen da ta nẹ Ọ rẹsosuọ na, Jesu da ta kẹ ayen nẹ, Uyota me ta kẹ ovwan, otu rẹ imiarhọghọ kugbe igberadja na cha karo kẹ ovwan ra ro uvie rẹ Ọghẹnẹ.

³² Kidie Jọn bru ovwan rhe vwẹ ọ rẹ ọvwata, ovwan sere gbuyota-a, ẹkẹvuọvo otu rẹ imiarhọghọ kugbe igberadja na sere gbuyota; ovwan re mrẹrẹ dede na se kurhẹriẹ we de segbuyota-a.

Itẹ rẹ Urhe rẹ Vain kugbe Ihwo rẹ yara otọ na

³³ Ovwan gbe rhoma kerhọn rẹ itẹ ọfa. Ọghwẹrẹ ọvo herọ rọ kọn ogba ri vain, ọ da nabọ gba ogba phihọ, ọ da bọn asan re de miẹ vain, ọ da bọn uwevwi rẹ enu phihọ, eghwẹrẹ efa da yaro ogba na mie tavwe ro ki kpo isiorho.

³⁴ Ọke rẹ ororo vwo te re, o de ji odibo rọye bru ayen ra ra kọrọ emamo rẹ udju na rhe.

³⁵ Eghwẹrẹ na de mu idibo na, ayen da fa ọvo ayen hwe ọfa, ayen de phi ọ ro chekọ na ghwu.

³⁶ Ọ da rhoma ji idibo rọye efa, buebu nọ e rẹsosuọ; ayen de ji ru ayen kerẹ e rẹsosuọ.

³⁷ Ẹkẹvuọvo ukuko rọye o de ji ọmọ re obọ rọye nẹ, ayen vwẹ ọghọ kẹ ọmọ mẹ na.

³⁸ Ẹkẹvuọvo, eghwẹrẹ na vwọ mrẹ ọmọ na ayen da ta kẹ omoma rẹ ayen nẹ, Ọnana re cha reuku na; yanrhe re avwanre hwe, re avwanre reyọ uku rọye na.

³⁹ Ayen de muo, ayen de kpono nẹ evun rẹ ogha na ra teyọ hwe.

⁴⁰ Ọke rẹ ọ ro vwo ogba na de nyo komavọ o ru otu rẹ eghwẹrẹ na?

⁴¹ Ayen da ta kẹ nẹ, Kọ guọghọ eghwẹrẹ na ibribro, kọ reyọ ogba na vwọ kẹ ihwo efa, re sa reyọ emamọ vwo rhe vwẹ ọke ororo rọye.

⁴² Jesu da ta kẹ ayen nẹ, Ovwan ji se vwẹ ẹbe ọfuanfon na, Oragha rẹ ihwo re bọn uwevwi senre, Kọye ri hirhe phihọ omamọ rẹ uchivwo vwẹ ubienyẹ. Ọnana iruo rẹ Ọrovwohwo, Ọ da dia igbunu vwẹ ẹro re avwanre.

⁴³ Eriyin na me ta kẹ ovwan nẹ, Ke che mie ovwan uvie rẹ Ọghẹnẹ na, ka vwọ kẹ ẹgborho ọfa, ro sa vwẹ emamo esiri phia vwẹ ọke rọye.

⁴⁴ Ohwo ro she teyọ oragha nana kọ guọghọ yẹghẹyẹghẹ; ẹkẹvuọvo oragha na de she nyẹ ohwo kọ guọghọ ivwivwuvwu.

⁴⁵ Ọke rẹ ilori rẹ irherẹn na kugbe otu ri Farisi vwo nyo itẹ nana, kẹ ayen roro nẹ ayen ọ ta kẹ.

⁴⁶ Ayen da guọnọ muo, yẹ oshọ rẹ otu buebu na gbi jẹ ayen ruo-o, kidie ayen riẹnre nẹ ọmraro o ruẹ.