Matiu 20 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Iruiruo vwẹ evun rẹ Ogba ri Vain

¹ Uvie rẹ odjuvwu ọ họhọ ọghwẹrẹ ro durhie ihwo iruo vwẹ irhiọke ride, re ayen re ru iruo vwẹ udju rọye.

² Ọke rẹ ọ vẹ ayen vwo ve phihọ ikọba ẹdọke nu, ọ da ghwẹ ayen kpo obo udju.

³ Rẹ uvo vwọ bẹrẹ cha, ọ da mrẹ efa ri ruẹ emuọvo-o vwẹ afieki;

⁴ Ọ da ta kẹ ayen nẹ, Yanran kpo obo udju mẹ, obo ri fori ejobi kọye me hwa kẹ ovwan. Ayen da ghene yanran.

⁵ Ọke rẹ ọnre vwo vi, ọ da rha mrẹ ihwo efa, ọ da je ta unu ọvo na kẹ ayen.

⁶ Rẹ ọnre vwo vi gẹre, ọ da ro otafe, ọ da je mrẹ ihwo efa ri mudia; ọ da ta kẹ ayen nẹ, Die ovwan vwo jẹ emuọvo e ruo vwẹ ẹdẹ na ejobi?

⁷ Ayen da ta kẹ nẹ, avwanre mrẹ ohwo rọ reyọ avwanre-e. Ọ da je ta kẹ ayen nẹ, Wa yanran kpo obo udju mẹ.

⁸ Ọke rẹ ovwọnvwọn vwo te, ọghwẹrẹ na de ji idibo rọye nẹ, yanran re se ihwo na rhe, rere wa hwa osa kẹ ayen, nẹ ọke rẹsosuọ re te oba.

⁹ Ihwo re durhieri rẹ onre vwo vi na, a da hwa ikọba kẹ ayen.

¹⁰ Ihwo re durhieri vwẹ irhiọke ride na, ki roro nẹ osa rayen bunọ ọtiọye; ukuko rọye a da je hwa ikọba kẹ ayen.

¹¹ Rẹ ayen vwọ reyọ nu, ayen ki guẹ ọghwẹrẹ ro vwo udju na,

¹² ta nẹ, ihwo rẹ ukuko na, ru iruo kri-i, yẹ a hwa osa abavo kẹ avwanre rẹ wian owian rhiri, rẹ uvo ọgangan na muru.

¹³ Ẹkẹvuọvo ọ da kpahe ọ da ta kẹ ọvo vwẹ usun rẹ ayen na nẹ, oko mi ru we chọ-ọ; wọ rhọvwe ikọba kẹ vwẹ nanaye-e?

¹⁴ Biko reyọ osa wẹn, re wọ yanran; ẹguọnọ mẹ rere me vwọ hwa osa kẹ wẹ kirobo re me hwa kẹ ọrivẹ na.

¹⁵ Wo gbi roro nẹ o fori rere me vwẹ igho mẹ ru obo ri je vwe-e? Gbenẹ ivun miovwo ovwan fiki rẹ obo me vwọ riẹn emu ru?

¹⁶ Eriyin na ọ rọ ka uko kọ karo, ọ rọ karo kọ ka uko.

Obọ Rerha ri Jesu ta Ota rẹ Ughwu vẹ Evrẹnushi Rọye

¹⁷ Ri Jesu vwo kpo Jerusalẹm, o de se ihwivẹ na phihọ akakọ, ọ da ta kẹ ayen vwẹ idjerhe nẹ,

¹⁸ Nighe, avwanre kpo Jerusalẹm re; a cha reyọ Omọ rẹ ohwo vwọ hẹ obọ rẹ ilori rẹ irherẹn kugbe isiẹbe, ayen che brorhiẹ hwe rere o ghwu,

¹⁹ Ihwo ri Keferi ke cha vwọ jehwẹ, ke ruo oja, ka karọ mu agbagba: ẹdẹ erha da wan nu ko vrẹn nẹ ughwu.

Oyare rẹ Oni ri Jems kugbe Jọn

²⁰ Etiyin oni rẹ emọ ri Zẹbidi kugbe emọ rọye ivẹ de bro rhe, rẹ ayen vwo yere nu, ọ da nọ ekpẹn rẹ emu ọvo.

²¹ Ọ da ta kẹ nẹ, Die wọ guọnọre? Ọ da ta kẹ nẹ, Rhọvwe rere emọ mẹ ivẹ na vwo tidia, ọvo obọrhe wẹn ọrivẹ obọhwẹre wẹn vwẹ evun rẹ uvie wẹn.

²² Ẹkẹvuọvo Jesu da kpahe ọ da ta kẹ nẹ, Wọ riẹn obo wọ nọre na-a. Ovwan sa da uko re me cha da na? Ayen da rhọvwe nẹ, ayen sa da.

²³ Ọ da ta kẹ ayen nẹ, Uyota ovwan sa da uko na, ẹkẹvuọvo re vwo tidia vwẹ obọrhe mẹ eyẹ obohwẹre mẹ, Ọ dia omẹvwẹ ri se ruo-o, ẹkẹvuọvo ọ herọ kẹ ihwo rẹ ọsẹ mẹ rhuẹrẹ phihọ otọ kẹ.

²⁴ Ọke rẹ ihwivẹ ri chekọ vwo nyo, ivun de miovwo ayen kpahe iniọvo ivẹ na.

²⁵ Ẹkẹvuọvo Jesu de se ayen rhe, ọ da ta kẹ ayen nẹ, ivie ri Keferi vwẹ ọrho nyẹ ayen, inotu rayen je ghwa vwẹ ogangan sun ayen.

²⁶ Ọ sa dia ọtiọye vwẹ ohri rẹ ovwa-an. Ẹkẹvuọvo ohwo kohwo rọ guọnọ ọrho vwẹ ohri rẹ ovwan, e gbe jo gbe odibo;

²⁷ ọ rọ guọnọ nẹ ọye karo e gbe jọ vwẹ oma kpotọ.

²⁸ Ọ dianẹ Ọmọ rẹ ohwo rhere re e vwo gbe odibo kẹ-ẹ, ẹkẹvuọvo re o vwo gbe odibo, rere ọ vwẹ arhọ rọye tan ihwo buebu.

Jesu Sivwi Irhuẹrẹ Ivẹ

²⁹ Ọke rẹ ayen vwo nẹ Jeriko phia, ihwo buebu de bru nene.

³⁰ Nighe, irhuẹro ivẹ de tidia vwẹ orhoma rẹ idjerhe, rẹ ayen vwọ riẹn nẹ Jesu cha wan vrẹn, ayen de kperi ta nẹ, Ọrovwohwo ni aruẹdọn rẹ avwanre, wẹ ọmọ ri Devid.

³¹ Otu buebu na da van ku ayen nẹ we rhurhu unu; ẹkẹvuọvo ayen de kperi gangan nẹ, Ọrovwohwo ni aruẹdọn rẹ avwanre, We Ọmọ ri Devid.

³² Jesu de mudia, o de se ayen, ọ da ta nẹ, Die wa guọnọre ni mi ru kẹ ovwan?

³³ Ayen da ta kẹ nẹ, Ọrovwohwo, rhiẹ ẹro rẹ avwanre.

³⁴ Ẹro da dọn gangan, ọ da vwẹ obọ te ẹro rayen, siẹvuọvo na ayen da mrẹ orẹ, ayen de nene.