Matiu 18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ono ro Ma Rho?

¹ Vwẹ ọke yena idibo ri Jesu de bro rhe ayen da nọ nẹ, Ono re ma rho vwẹ uvie rẹ odjuvwu?

² O de se omotete ọvo bro rhe, o de muo mudia vwẹ uherevie rayen,

³ ọ da ta nẹ, Uyota me ta kẹ ovwan, Jokpa nẹ ovwan rhẹriẹ re rẹ ovwan de hirhe oma vwọ hẹ omotete-e, ovwan sa ro uvie rẹ odjuvwu-u.

⁴ Ohwo kohwo rọ vwẹ oma kpotọ kerẹ omotete na, ọye re sa ro uvie rẹ odjuvwu.

⁵ Ohwo kohwo rọ reyọ omotete tiọnana vwẹ odẹ mẹ yọ reyọ ovwẹ.

Ọdavwini rẹ ọ Nẹrhẹ e ruẹ Umwemwu

⁶ Ẹkẹvuọvo ohwo kohwo ro kpokpo ọvo vwẹ usun rẹ emọ nana ri segbuyota na ro de she, oyoma kẹ ohwo yena rere o churu olalọ si ohọre re o divwi ghwu vwẹ abadi.

⁷ Ekan kẹ akpọ na fiki rẹ ogbarogba! o dianẹ ogbarogba karọ-ọ, ẹkẹvuọvo ekan kẹ ohwo rọ wan obọ rọye rhe.

⁸ Ọ diane obọ wẹn, eyẹ owọ wẹ nẹrhẹ owẹ she, bro nẹ oma wẹn o fori kẹ wẹ rere wo vwo kru obọ eyẹ owọ ra ro arhọ, nọ re wọ da vwẹ abọ wẹn ivẹ kugbe awọ wẹn ivẹ ra ro erhanre ri bẹdẹ.

⁹ Ẹro wẹn da nẹrhẹ owẹ she, rhuo nu; o fori kẹ wẹ rere wo rhu ẹro ọvo, nọ re wọ da vwẹ ẹro ivẹ ro erhanre ri bẹdẹ.

Itẹ rẹ Ogodẹ ro Ghwruru

¹⁰ Wo jẹ ọvo rẹ imitete na fia-a, fikiridie emakashe rẹ emọ na i mudia vwẹ obaro rẹ Ọghẹnẹ Ọsẹ rẹ avwanre rọ hẹ obo odjuvwu.

¹¹ Kidie Ọmọ rẹ ohwo rhi sivwi otu ri ghwruru.

¹² Ọrhọ ovwan rori? ọ da dianẹ ohwo vwo igodẹ ujori, ọvo rọye de ghwru, o gbi gbobọnyẹ ọvo nuro ujori na, rọ da yan ro evun rẹ aghwa ra guọnọ ọ ro ghwruru na?

¹³ Ọ da dianẹ ọ mrẹrẹ, Uyota me ta kẹ wẹ, kọ ghọghọ vwẹ oma rẹ ọvuọvo na nọ ọvo nuro vwẹ ujori ri je ghwro na.

¹⁴ Eriyin na ọ dia ẹguọnọ rẹ Ọsẹ rẹ ovwan rọ hẹ obo odjuvwu rere ọvo rẹ imitete na vwo ghwru-u.

Oniọvo Ro Ruẹ Umwemwu

¹⁵ Omoni wẹn de gbe we ku, vwẹ obo ro ruru vwọ nẹ; o de nyo we ye wọ rease rọye.

¹⁶ Ẹkẹvuọvo o gbi nyo-o, reyọ ihwo ivẹ efa boma, kidie iseri rẹ amwarha re ma sẹ.

¹⁷ Ọ gbe je davwerhọ-ọn, gba ra ta kẹ ishọshi; o gbi ji nyo ota rẹ ishọshi-i, gbe jo dia kẹ wẹ kerẹ Ikeferi kugbe omiarọghọ.

Ẹgba kugbe Erhan

¹⁸ Uyota me ta kẹ wẹ, kemu kemu rẹ ovwan gbare vwẹ akpọ na yẹ a gbarọ vwẹ odjuvwu. Ọ rẹ ovwan rhanre vwẹ akpọ na yẹ a je rhan vwẹ odjuvwu.

¹⁹ Me je ta kẹ ovwan nẹ, ovwan ivẹ de kuoma gbe vwọ nọ ekpẹn rẹ emu, Ọsẹ rẹ obo odjuvwu kọ ruo kẹ ayen.

²⁰ Kidie asan rẹ amwava eyẹ amwarha de kuoma gbe vwẹ odẹ mẹ, ke me dia uherevie rayen.

Itẹ rẹ Odibo ro jẹ Evwoghovwo Evwo

²¹ Pita da rhe, o da ta kẹ nẹ, Ọrovwohwo bro ẹsiẹ omoni mẹ gbe vwe ku te, mi de vwo ghovwo, bẹsiẹ ro vwo te akueghwrẹ?

²² Jesu da kpahe kẹ nẹ, Me ta kẹ we nẹ, ọ dia akueghwrẹ ọvo-o, ẹkẹvuọvo akueghwrẹ ujorha gbẹ ighwrẹ.

²³ Eriyin na uvie rẹ odjuvwu họhọ ovie ọvo ro che kere emu kẹ idibo rọye.

²⁴ Ọke ro vwo kere, odibo ọvo da re osa rẹ ikpahọ uriori ihwe.

²⁵ Rọ gbe mrẹ hwa-a, ọrovworo da ta nẹ, e muo ra shẹ, te aye rọye, te emọ rọye kugbe ekuakua rọye ejobi re ọ vwọ hwa osa na.

²⁶ Odibo na de she diguẹ vwẹ obaro rẹ ọrovworo na, ọ da rẹ nẹ, ọ vwẹ ẹdẹ kẹ ọye re ọye vwọ hwa osa na.

²⁷ Ọrovworo de ni aruẹdọn rọye, o de siobọ no o de vwo ghovwo.

²⁸ Ẹkẹvuọvo odibo yena rọ re osa jovwo na re vwo ghovwo na, ọ da mrẹ odibo rẹ ovie na ọfa ro re osa ikpahọ iyori. O de shabọ phihọ, ọ da yọnrọn upho, ọ da ta nẹ, Hwa osa mẹ kẹ vwẹ.

²⁹ Odibo rivẹ na ko rhe shiguẹ, ko rẹ nẹ ọ vwẹ ọke kẹ ọye rere ọ vwọ hwa osa na.

³⁰ Odibo rẹsosuọ na gbe rhọvwe-e, o de re muo phihọ uwodi, bẹsiẹ rọ vwọ mrẹ igho na hwa.

³¹ Idido ri chekọ vwo nyo, ọ da da ayen gangan, ayen de rhi gbe ikun na kẹ onini rayen.

³² Ọrovworo ko sere, ọ da ta kẹ nẹ, Wẹ odibo obrabra na, me da vwẹ eghughu rẹ igho na vwo ghovwo uwe, fikiridie wọ rẹ vwẹ.

³³ Kidie wo gbi vwo ghovwo ọrivẹ wẹn kirobo mi ni aruẹdọn wẹ-ẹ?

³⁴ Ivun de miovwo ọrovworo na gangan, o de muo vwo rhe ọnọkpa re ayen ruo oja bẹsiẹ rọ vwọ hwa osa na nu.

³⁵ Eriyin Ọsẹ mẹ ro hẹ obo odjuvwu ru kẹ ovwan, ọ da dianẹ ovwan gbe sa vwẹ imwemwu rẹ orivẹ rẹ ovwan vwo ghovwo te otọ rẹ evu-un.