Matiu 15 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uruemu rẹ Ekpako na

¹ Otu ri Farisi kugbe isiẹbe de nẹ Jerusalẹm bru Jesu rhe, ayen da ta kẹ nẹ,

² Die sorọ rẹ idibo wẹ vwo miovwo urhi rẹ ekpako na? kidie ayen hworhẹ obọ tavwe rẹ ayen ke re emu-u.

³ Ọ da kpahe ọ da ta kẹ ayen nẹ, Die ovwan vwo gbe urhi rẹ Ọghẹnẹ kuẹ vwi fiki rẹ uruemu rẹ ovwan?

⁴ Kidie Ọghẹnẹ tare nẹ, Vwẹ ọghọ kẹ ọsẹ wẹn vẹ oni wẹn. Ohwo ro ta ota omiomiovwi kpahe ọsẹ eyẹ oni rọye e jo ghwu.

⁵ Ẹkẹvuọvo ovwan tare nẹ, Kohwo kohwo rọ ta kẹ ọsẹ eyẹ oni rọye nẹ, Erere rẹ ovwan a mrẹ vwẹ obọmẹ jovwo, me vwerọ kẹ Ọghẹnẹ.

⁶ Yẹ ohwo yena gbe vwẹ ọghọ kẹ ọsẹ eyẹ oni rọye ọfa-a. Ovwan da vwẹ uruemu rẹ ovwan gbe urhi rẹ Ọghẹnẹ ku.

⁷ Evwọnrọn efian na, mavọ Aizaya mraro kpahe ovwan.

⁸ Ihwo nana de vwẹ ọghọ rẹ unu diodi kẹ vwẹ, Yẹ udu rayen sheri kẹ vwẹ.

⁹ Ayen de ga vwẹ ghevweghe, Ayen me vwẹ uruemu rayen yono ihwo.

Obo ri Miovwẹ Ohwo

¹⁰ O de se ihwo buebu na, o da ta kẹ ayen nẹ, Ovwan nyo ota mẹ re ovwan riẹn ọto rọye.

¹¹ Ọ dia obo rọ wan unu ro evun rẹ ohwo ọye ri miovwo-o, ẹkẹvuọvo ọ ro nẹ evun rẹ ohwo rhe ọye ri miovwo.

¹² Etiyin idibo rọye de bro rhe, ayen da ta kẹ nẹ, Wọ riẹnre nẹ ivun miovwo otu ri Farisi na, vwẹ ota wọ ta kpahe ayen na?

¹³ Ẹkẹvuọvo ọ da kpahe ọ da ta nẹ, Kurhe kurhe rẹ Ọsẹ mẹ rọ hẹ obo odjuvwu kọnre-e, ke ghwie kufia.

¹⁴ We jẹ ayen vwo; irhuẹro ayen ruẹ. Orhuẹro de sun orhuẹro ayen ivẹ ki she phihọ ọgọdọ.

¹⁵ Pita da kpahe ọ da ta kẹ nẹ, Gba fan otọ rẹ itẹ na kẹ avwanre.

¹⁶ Ọ da ta nẹ, ota na je ro ovwa-an?

¹⁷ Ovwan gbe riẹn nẹ, emu rọ wan unu ro ohwo obotọ rẹ evun ọ ra, e mi re tue kufia-a?

¹⁸ Ẹkẹvuọvo obo ri nẹ unu rhe, otọ rẹ udu o nẹ cha; kọye ri miovwo ohwo.

¹⁹ Fikiridie evu rẹ udu ọye iroro imiomiovwi nẹ cha; ozighẹ, igberadja, ọfanrhiẹ, ujiecho, iseri rẹ eku, ọghware.

²⁰ Enana ejobi na keye ri miovwo ohwo. Ẹkẹvuọvo ọ dia abọ re jẹ hworhẹ ra ke re emu ri miovwo ohwo-o.

Esegbuyota rẹ Aye ri Kenan na

²¹ Jesu de vrẹn nẹ etiyin, o de kpo ẹbẹre ri Taya vẹ Saidọn.

²² Nighe, aye ri Kenan ọvo de nẹ akakọ rẹ etiyin rhe, o de kperi ta nẹ, Ni aruẹdọn mẹ Ọrovwohwo, we ọmọ ri Devid, erhi rẹ idẹbono herọ laghẹ ọmọtẹ mẹ gangan.

²³ Ẹkẹvuọvo ọ kpahe ota ọvuọvo kẹ-ẹ. Idibo rọye da rhe nẹ ọ djẹ yanran, kidie o kperẹ nene ayen,

²⁴ Ẹkẹvuọvo ọ da kpahe ọ da ta nẹ, E ji vwe bru ihwo efa ra-a, jokpa rẹ igegede rẹ uwevwi rẹ Izrẹl ri ghwruru.

²⁵ Ẹkẹvuọvo aye na de rhi shiguẹ vwẹ obaro rọye ọ da rẹ nẹ, Ọrovwohwo biko cha vwẹ uko.

²⁶ Ọ da kpahe ọ da ta nẹ, O fori ra vwẹ emu rẹ emọ na kẹ eranko-o.

²⁷ Ẹkẹvuọvo, aye na da ta nẹ, eriyin Ọrovwohwo, ẹkẹvuọvo eranko re hẹ otọ rẹ imẹjẹ je re ivwuvwu rẹ emu ri she no rhe.

²⁸ Jesu da kpahe ọ da ta kẹ nẹ, E aye na, esegbuyota wẹn rhoro, gbe je ọ dia kẹ wẹ kirobo wọ guọnọre.

Jesu Sivwi Ihwo Buebu

²⁹ Jesu de vrẹn nẹ etiyin, o de kpo orhoma rẹ abadi ri Galili o de kpo enu rẹ ugbenu, o de tidia vwẹ etiyin.

³⁰ Ihwo buebu de bro rhe, te ikpono, irhuẹro, idierhọn, ikrabọ, de rhi tidia agada rọye, o de sivwi ayen.

³¹ Ọ de gbe ayen unu, rẹ ayen vwọ mrẹ idiẹrhọn na ri nyo ẹme, ikrahọ oma rẹ ayen kpori, ikpono yanre, irhuẹro mrẹ orẹ; ayen de jiri Ọghẹnẹ rẹ Izrẹl.

Eghẹrẹ rẹ Ihwo Uriori Ẹne

³² Jesu de se idibo rọye, ọ da ta nẹ, aro rẹ otu buebu na dọ vwẹ, fikiridie etiyin ẹdẹ erha ayen vẹ ovwẹ herọ re, ayen vwo emuọvo rẹ ayen ria-a, mi de siobọ nẹ ayen erhierhi oma bruro ayen vwẹ idjerhe.

³³ Idibo rọye da ta nẹ, bovọ a da mrẹ ikara dẹ vwẹ evun rẹ aton, re sa vọn ihwo nana evun.

³⁴ Jesu da nọ ayen nẹ, bro ikara ovwan vwori? Ayen da ta nẹ ighwrẹ kugbe imiyeri evo.

³⁵ Ọ da ta nẹ ihwo na tidia te otọ.

³⁶ Ọ da reyọ ikara ighwrẹ na, kugbe imiyeri na. Ọ da kpẹvwẹ o de bro vwọ kẹ idibo rọye, nẹ a vwọ kẹ ihwo na ejobi.

³⁷ Ayen da re evun da vọn ayen; ayen de gbeje ivwuvwu rọye vọn ibere ighwrẹ.

³⁸ Ihwo re re emu na da dia uriori ẹne eya kugbe imitete e kere aye-en.

³⁹ O de siobọ nẹ ihwo na kpo, ọ da ro okọ kpo ubrakpọ ri Magadan.