Matiu 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Itẹ rẹ Ọkekankọn na

¹ Vwẹ ẹdẹ yena Jesu de vrẹn kpo otafe, o de tidia vwẹ orhoma rẹ abadi.

² Ihwo buebu de koko bro rhe, ọ da ro evun rẹ okọ o de tidia; ihwo na ejobi de mudia vwẹ orhotọ.

³ Ọ da ta ota buebu kẹ ayen vwẹ itẹ, ọ da ta nẹ, Nighe, ọkekankọn ọvo yanran ra kọn.

⁴ Rọ vwọ kọn na, emamọ evo de she phihọ orhoma rẹ idjerhe, emephran da sohrọ ayen re.

⁵ Ẹvo de she phihọ enu rẹ oragha, asan ro vwo ekpẹn buebu-u; o ji kri na-a e da ghwa djẹ, kidie ekpẹn na kodori-i;

⁶ Ọke rẹ ọnre vwọ varhe, o de vwioro, fikiridie ọ vwo owọ-ọ o de ghwu.

⁷ Ẹfa de she phihọ ohri rẹ inwe; inwe na dje rhe i de duvwu ayen hwe.

⁸ Ẹfa de she phihọ otọ esiri, e da djẹ e da mọ emamọ, evo ujori, evo ujorha, evo ọgban.

⁹ Ọ ro vwo erhọn, e jo nyo.

Obo re Sorọ re vwo kpe Itẹ na

¹⁰ Idibo rọye de bro rhe, ayen da ta kẹ nẹ, Die nẹrhẹ owẹ kpe itẹ kẹ ayen?

¹¹ Ọ da kpahe kẹ ayen nẹ, Ovwan a tare nẹ e riẹn odjahọ rẹ uvie rẹ odjuvwu, ẹkẹvuọvo ihwo efa itẹ kọye a vwọ ta kẹ ayen.

¹² Kidie kohwo kohwo ro vwori, ọye a vwọ kẹ, ko vwo buebu, kohwo kohwo ro vwori-i, emerha ro vwori na ka rhoma mie.

¹³ Fiki rẹ ọtiọye na mi vwo kpe itẹ kẹ ayen, fikiridie ayen mrẹ orẹ yẹ ayen se vughe-e, ayen nyo ẹme yẹ ayen riẹn otọ rọye-e.

¹⁴ Kẹ ọna aroẹmrẹ rẹ Aizaya vwọ sẹ rọ tare nẹ, Ovwan se nyo, yẹ ovwan riẹn otọ rọye-e, Ovwan sa mrẹ, yẹ ovwan se vughe-e.

¹⁵ Kidie udu rẹ ihwo nana figberi, Erhọn rayen diri; Ẹro rayen ji ghwe rhu; Re ayen jẹ orẹ ẹmrẹ, Rere ayen vwo jẹ ẹme enyo; Udu rayen de rhe roro; Ayen de rhe kurhẹriẹ, E de rhe sivwi ayen.

¹⁶ Ebruba kẹ ẹro rẹ ovwan, kidie ayen sa mrẹ; ebruba kẹ erhọn rẹ ovwan, kidie ayen se nyo.

¹⁷ Uyota me ta kẹ ovwan nẹ, emraro buebu kugbe evwata buebu re guọnọre nẹ ayen mrẹ emu rẹ ovwan mrẹre na, yẹ ayen sa mrẹ-ẹ; re ayen ji nyo obo rẹ ovwan nyori na, yẹ ayen se nyo-o.

Jesu fan Otọ re Itẹ rẹ Ọkekankọn na

¹⁸ Ovwan gbe kerhọn rẹ itẹ na.

¹⁹ Ọke rẹ ohwo de nyo ikun rẹ uvie rẹ odjuvwu rọ gbe riẹn otọ rọye-e, idẹbono kọ cha, ọ me rhe kọrọ ota na nẹ udu rọye. Edje nana họhọ emamọ ri she phihọ orhoma rẹ idjerhe ye.

²⁰ Ena hẹ edje ra kọn phihọ otọ rẹ oragha, eye hẹ edje ri nyo ota na, ayen da vwẹ aghọghọ reyọ.

²¹ Ẹkẹvuọvo ayen ghwa riẹn otọ rọye-e, o rhi vwo kri emerha, ọdavwini vẹ ukpokpogho vwọ rhe ayen de she.

²² Enana hẹ i ri she phihọ ohri rẹ inwe, ena hẹ edje ri nyo ota na; ẹnwan rẹ akpọ kugbe ophiẹvwe rẹ efe mi rhi keke ota na, ọ gbe sa mọ emamọ-ọ.

²³ Ọ ra kọn phihọ otọ rẹ esiri na, eye hẹ edje ri nyo ota na, re riẹn otọ rọye, e da ghene mọ emamọ, evo ujori, evo ujorha, evo ọgban.

Itẹ rẹ Ẹgo na

²⁴ O de ji kpe itẹ ọfa kẹ ayen nẹ, uvie rẹ odjuvwu hohọ ohwo rọ kọn emamọ esiri phihọ udju rọye.

²⁵ Ẹkẹvuọvo ọke rẹ asọn re ihwo vwọ vwerhẹ nu, ọvweghrẹ rọye da rhe kọn ego kugbe irosu na, ọ da yanran.

²⁶ Ọke rhi vwo te, ego na vẹ irosu na de rhi gro kugbe.

²⁷ Idibo rẹ ohwo na da rhe vuẹ nẹ, Ọga, ọ dia irosu wọ kọn phihọ udju wẹ-ẹn? Komavọ ego rha vwọ djẹ vwọ?

²⁸ O da ta kẹ ayen nẹ, Ọvweghrẹ ri ru emu na. Idibo rọye da ta kẹ nẹ, Avwanre gbe re ghwie ayen kufia?

²⁹ Ọ da sen ta nẹ, we de ghwie ego na kẹ ovwan vwẹ irosu na ba ghwie.

³⁰ We jẹn ayen ivẹ na rho kugbe tavwe. Orhọ de te re, ke me ta kẹ otu ri vuẹ nẹ, Ovwan ka ghwẹ ego na koko, wa gba ayen ẹkuẹko rere a torhẹ ayen; ẹkẹvuọvo irosu mẹ ri chekọ na we gbeje ayen kpo erhu.

Itẹ rẹ Ubi rẹ Uyerhie na

³¹ O de ji kpe itẹ ọfa kẹ ayen nẹ, Uvie rẹ odjuvwu họhọ ubi rẹ uyerhie ra kọn phihọ udju;

³² Ẹsosuọ o da dia yẹyẹghẹ; ẹkẹvuọvo ukuko rọye ọ da rhe rho nọ ekankọn re hẹ udju na ejobi, o de rhi hirhe phihọ okpurhe, emephran da rhe bọn ẹho phihọ enu rọye.

Itẹ rẹ Iphuephu na

³³ Ọ da rhoma kpe itẹ ọfa kẹ ayen nẹ, Uvie rẹ odjuvwu họhọ ekuọka rẹ aye phare phihọ ọko erha, i de rhi phu tututu.

Itẹ ekpe ri Jesu

³⁴ Itẹ nana ejobi eye Jesu kperi kẹ ihwo buebu na, ọ dia itẹ-ẹ a gbe ta ota kẹ aye-en.

³⁵ Rere ota rẹ ọmraro na tare vwọ gba nẹ, Ki mi rhie unu mẹ vwo kpe itẹ; Eta re djahere nẹ ẹtuọhọ rẹ akpọ na rhe, keye me cha ta.

Jesu fan Otọ rẹ Itẹ rẹ Ẹgo na

³⁶ Ọ da yan jẹ ihwo na vwo, ọ da ro evun rẹ uwevwi; idibo rọye de bro rhe rhe nọ otọ rẹ itẹ na nẹ, Gbe dje otọ rẹ ite rẹ ego na kẹ avwanre.

³⁷ Ọ da ta nẹ ohwo rọ kọn emamọ esiri na vwenẹ ọye Ọmọ rẹ ohwo;

³⁸ Udju na vwenẹ kẹ akpọ na; emamọ esiri na kọye hẹ emọ rẹ uvie na; ẹgo na kẹ emọ rẹ idẹbono;

³⁹ Ọvweghrẹ na kẹ idẹbono; orhọ na kẹ oba rẹ akpọ na, ihwo ri vuẹ na kẹ emakashe.

⁴⁰ Kirobo ra gba ego na koko ra da torhẹ ayen na, ọtiọye ọba rẹ akpọ na cha dia.

⁴¹ Ọmọ rẹ ohwo ko che ji emakashe rọye ro akpọ na, ayen kẹ cha sanọ ihwo ri kpokpo uvie rọye nẹ akpọ na kugbe ihwo ri ruẹ imwemwu koko,

⁴² Ka ghwẹ ayen phihọ erhanre ri bẹdẹ; kẹ etiyin ayen da reako kugbe oviẹ.

⁴³ Otu rẹ evwata ki che lo kerẹ ọnre vwẹ uvie rẹ Ọsẹ na. Ọ ro vwo erhọn e jo nyo.

Itẹ rẹ Efe re Sinu

⁴⁴ Uvie rẹ odjuvwu họhọ igho rẹ ohwo tọn phihọ otọ; rẹ ohwo ọfa mrẹre o de sionu; o de kpo vẹ aghọghọ ra shẹ obo ro vwori ejobi, ọ da rhe dẹ oto na kẹ oma rọye.

Itẹ rẹ Irhu rọ Ghare Gangan

⁴⁵ Ọfa, uvie rẹ odjuvwu họhọ ọneki rọ guọnọ irhu oyoyovwi.

⁴⁶ Rọ vwọ mrẹ irhu na re, o de kpo ra she emu ro vwori ejobi, ọ da dẹ.

Itẹ rẹ Obriki

⁴⁷ Ọfa rọye, uvie rẹ odjuvwu họhọ ọbriki re phi phihọ ame, o de mu kemu kemu;

⁴⁸ Ọke rọ vwọ vọn nu, e de siọ phihọ otọ, ayen de tidia, nabọ sanọ omamọ rẹ iyeri re herọ phihọ okọ, asihọ vẹ ehẹbe re herọ e de ku ayen kufia.

⁴⁹ Ọtiọye ọ cha dia vwẹ oba rẹ akpọ na; emakashe ke cha rhe, ke cha sanọ evwata nẹ ohri rẹ iruimwemwu.

⁵⁰ Ka cha ghwẹ ayen phihọ erhanre rode; etiyin ayen da viẹ reako rayen.

Uyono Kpokpọ vẹ ọ rẹ Awanre

⁵¹ Ovwan je riẹn otọ rẹ imu nana-a? Ayen da rhọvwe kẹ nẹ, E.

⁵² Ọ da ayen nẹ, kosiọbe kosiọbe re vwọ ru odibo rẹ uvie rẹ odjuvwu, ọ họhọ ohwo ro vwo uwevwi, rọ reyọ emu ọkpokpọ kugbe e rẹ awanre nẹ evun rẹ ighẹn rọye cha.

A Siẹn Jesu vwi Nazarẹt

⁵³ Ọke rhi vwo te, ri Jesu vwo kpe itẹ rọye ejobi nu, o de vrẹn nẹ etiyin.

⁵⁴ Ro rhi vwo te orere rẹ obọ rọye, o de yono vwi senagọg, o de gbe ayen unu, ayen da ta nẹ, Tivọ ohwo nana de vwo eghwanre nana kugbe iruo ride nana.

⁵⁵ Ọna dia ọmọ rẹ ọwena na-a? re se oni rọye Meri? rọ vẹ Jems, Josẹf, Saimọn kugbe Judas gba hẹ imoni?

⁵⁶ Rẹ iniọvo rẹ emetẹ rọye vẹ avwanre gba herọ na-a? Ki tivọ o de yono imu nana?

⁵⁷ Ivun ko miovwo ayen. Ẹkẹvuọvo Jesu da ta kẹ ayen nẹ, Ọbo se vwo ọghọ vwẹ orere rẹ obọ roye-e, eyẹ uwevwi rọye-e.

⁵⁸ Ọ gbi se ru iruo ride vwẹ etiyi-in, fiki ri je segbuyota rayen.