Matiu 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ikọn ri nẹ obo ri Jọn ri Baptist rhe

¹ Rẹ oke rhi vwo te, ri Jesu vwọ ta eta kẹ ihwivẹ na nu, ọ da yanran kpo evun rẹ irere na re yono ihwo.

² Ọke ri Jọn vwo nyo usi rẹ iruo ri Kristi vwẹ uwodi, o de ji idibo rọye ra nọ.

³ Ọ da ta kẹ nẹ, Wẹ ọ ro cha na, gbinẹ ohwo ọfa?

⁴ Jesu da kpahe kẹ ayen ọ da ta, Yanran re ovwan ra vuẹ Jọn emu rẹ ovwan mrẹre kugbe ọ rẹ ovwan nyori;

⁵ orhuẹro mrẹ orẹ, okpolo yanre, ehonvwoti e sivwi ayen, idierhọ nyo ẹme, irivwi vrẹre, iyẹnrẹ esiri na eghwoghwiro kẹ igbere.

⁶ Ebruba kẹ ohwo rọ mrẹ emu rẹ ogbeku vwẹ obọ mẹ-ẹ.

⁷ Rọ ayen vwọ yanran re, Jesu ko gbe ikun kẹ ihwo re hẹ etiyin na vwọ kpahe Jọn, Die ovwan yanran kpo aghwa rẹ ni vwo? eyareya rẹ odju kpogho?

⁸ Ẹkẹvuọvo kidie ovwan tobọ re ni vwọ? Ohwo rọ vwẹ emwa elọlọhọ rhuo? Nighe ihwo ri rhuo emwa elọlọhọ e hẹ obo egodo rẹ ovie.

⁹ Ẹkẹvuọvo kidie ovwan tobọ re ni? emraro? E, Me ta kẹ ovwan nẹ, ọ rọ rho nẹ ọmraro.

¹⁰ Ọnana hẹ ohwo na, re siro kpahe nẹ, Nighe mi ji ikọn mẹ ka obaro kẹ wẹ, Ọ rọ rhuẹrẹ idjerhe wẹn.

¹¹ Uyota me ta kẹ ovwan, Ihwo rẹ eya vwiẹri na, o ji vwo ọ rọ rhoro te Jọn ri Baptist na-a, ẹkẹvuọvo ọ rọ ma hanvwe vwẹ uvie rẹ odjuvwu rho nọ.

¹² Nẹ ọke ri Jọn rhe rhi te ọke nana ọye uvie rẹ odjuvwu vwọ hẹ ukpokpogho, ihwo ogbarogba vwọ vwẹ ẹgba reyọ.

¹³ Kidie irhi na kugbe emraro na herọ rhi te ọke ri Jọn.

¹⁴ Ovwan da sa reyọ, kẹ ọ na Ilaija rọ rhoma cha na.

¹⁵ Ọ ro vwo erhọn ro vwo nyo ẹme e jo nyo.

¹⁶ Ẹkẹvuọvo kidie me vwẹ orua nana dje? E họhọ imitete ri tidia vwẹ afieki, ri kudje se irivẹ rayen;

¹⁷ ayen me ta nẹ, mi hworo owanre kẹ ovwan yu we se gbe eha-a, avwanre viẹre we se muomahọ-ọ;

¹⁸ Kidie Jọn ri Baptist rhere, ọ re emuọvo-o, ọ da emuọvo-o, yẹ ovwan tare nẹ, o vwo idẹbono.

¹⁹ Ọmọ rẹ ohwo rhere ọ da ọ ria, ovwan da ta nẹ, Nighe oruimwemwu, ọgbọre, ọgbaudi, ugbeyan rẹ imiarhọghọ kugbe iruimwemwu yẹ iruo rọye vọnre vẹ aghwanre.

Ẹkan hẹ Irere ri Kurhẹriẹ-ẹ

²⁰ Kọ harha irere ro de ru iruo ride rẹ igbunu na, fikiridie ayen se kurhẹriẹ-ẹ.

²¹ Iraghwo korazini Iraghwo Betsaida kidie e ru iruo ride nana vwi Taya vi Sidọn, re ruru vwẹ evun rẹ ovwan na, mane ayen kurhẹriẹ rhabae, rẹ ayen de bru oma vwọ iwurhie.

²² Ẹkẹvuọvo me ta kẹ ovwan nẹ, o yovwi kẹ Taya vẹ Sidọn vwẹ ẹdẹ rẹ edjọeguo vwọ nọ wẹ.

²³ We ri Kepanọm ro kpenu? ka cha guọghọ owẹ te otọ; kidie iruo ride re ruru vwẹ evun wẹ na, ke ru ayen vwi Taya vẹ Sidọn, yẹ ayen mudia rhi te ọke na.

²⁴ Me ta kẹ ovwan nẹ, o yovwi kẹ Sidọn vwẹ ẹdẹ ẹdjọeguo vwọ nọ wẹ.

Bru vwe rhe ri Rovwo oma

²⁵ Vwẹ ọke yena Jesu da ta nẹ, Me kpẹvwẹ owẹ E Ọsẹ, Ọ ro ma odjuvwu vẹ akpọ, re vwo si emu nana nu kẹ ihwo rẹ ghwanre vẹ i ri vwo ẹruọ, wọ da vwọ ayen phia kẹ emọboba.

²⁶ Eriyin, Ọsẹ, kidie ọye obo ru wọ guọnọre.

²⁷ Ọsẹ mẹ vwi kemu kemu na ejobi kẹ vwẹ, yẹ ohwo ọvuọvo riẹn ọmọ na-a, jokpa rẹ Ọsẹ na; ohwo ọfa riẹn Ọsẹ na-a, jokpa rẹ Ọmọ na kugbe ihwo rẹ Ọmọ na dje Ọsẹ na kẹ.

²⁸ Bru vwe rhe ihwo rẹ owian kugbe oghwa bẹn, Me kẹ ovwan ufuoma.

²⁹ Mu urhekpe mẹ ghwa re wo yono uruemu mẹ; kidie me pha vworovworo fuefu vwẹ udu mẹ, kẹ wo mrẹ ufuoma vwọ kẹ erhi wẹn.

³⁰ Kidie urhekpe mẹ pha frae, oghwa mẹ ọ phapharhe.