Matiu 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jesu Sanọ Ihwivẹ na

¹ O de se ihwivẹ na bro rhe, o da vwẹ ogangan kẹ ayen vwẹ enu rẹ irhi ri jẹfuọn, rere ayen vwọ djẹ ayen kufia, rere ayen vwo sivwi emiavwe dohwo doghẹre rọye.

² Odẹ rẹ ihwivẹ na kẹ ena, ọ rẹsosuọ Saimọn re se Pita kugbe Andru oniọvo rọye, Jems rẹ ọmọ ri Zẹbidi, kugbe Jọn oniọvo rọye.

³ Filip kugbe Batalomiu; Tọmọs kugbe Matiu rẹ omiarhọghọ; Jems ọmọ rẹ Alfiọs, kugbe Tadiọs.

⁴ Saimọn ohwo ri Kenan, kugbe Judas Iskariọt rọ shẹrẹ.

Oyan rẹ Ihwivẹ na

⁵ Ihwivẹ nana eye Jesu jiri, ọ da vwẹ urhi kẹ ayen nẹ, ovwan kpo irere efa-a, eyẹ irere ri Sameria-a.

⁶ Ẹkẹvuọvo wa yanran bru igegede mẹ, emọ Izrẹl ri ghwruru na.

⁷ Ovwan da yanran, wa ta nẹ, Uvie rẹ odjuvwu si kẹre otọ re.

⁸ Sivwi ihwo re mwa ọga rhọvwọ ihwo ri ghwuru, sivwi ehonvwoti, djẹ idẹbono phia, ọphẹ ovwan mrẹrẹ, ọphẹ ovwan je vwọ kẹ rhe.

⁹ Ovwan ghwa oro-o, eyẹ idọnọ efuanfo-on, eyẹ emu ọfa vwẹ evun rẹ ekpo-o.

¹⁰ Ovwan ghwa ekpo vwẹ oyan na-a, eyẹ ewun ivẹ-ẹ, ovwan ghwa isabato-o, ovwan ghwa ọkpọ-ọ, kidie ohwo rọ wian owian o vwo osa rẹ owian rọye.

¹¹ Korho korho rẹ ovwan teri, eyẹ orere, ovwan guọnọ ohwo ro fori vwọ, etiyin kọye ovwan dia bẹsiẹ rẹ ovwan vwo no.

¹² Ovwan de te uwevwi we yere.

¹³ Ọ da dia uwevwi ro fori, ufuoma rẹ ovwan kọ dajo. O rhe fo-o, ufuoma rẹ ovwan ko rhivwi bru ovwan rhe.

¹⁴ Ohwo kohwo rọ reyọ ovwa-an, ro nyo ota rẹ ovwa-an, we de nẹ uwevwi yena eyẹ orere na, we phorho ekpẹn re tamu awọ rẹ ovwan phihọ otọ.

¹⁵ Uyota me ta kẹ ovwan, o yovwi kẹ Sodọm vi Gomora vwẹ ẹdẹ rẹ ẹdjọeguo, nọ orere yena.

Ukpokpogho rọ cha

¹⁶ Nighere mi ji ovwan kerẹ igegede re hẹ uherevie rẹ ikpohrokpo; wa gba ghwanre kerẹ ọrọdekọ, re we ru dẹndẹn kerẹ ilekuku.

¹⁷ Ẹkẹvuọvo ovwan jomaotọ; kidie e che mu ovwan kpo ẹguare, vwẹ evun ri Sinagọg, kẹ ayen che ru ovwan oja.

¹⁸ Ke che mu ovwan rhe ikeferi vẹ ivie vwi fiki mẹ, kẹ ovwan dia iseri kẹ otu rẹ ikeferi na.

¹⁹ Ẹkẹvuọvo e de mu ovwan, wa ro ẹnwan rẹ obo rẹ ovwan cha ta-a, kidie vwe ọke yena ke che dje obo re wọ ra kẹ wẹ.

²⁰ Kidie ọ dia owẹ re ta ota na-a, ẹkẹvuọvo Erhi rẹ Ọsẹ na ọye re ta ota vwẹ evun wẹ.

²¹ Oniọvo che hwe oniọvo, ọsẹ che hwe ọmọ, emọ che hwe i ri vwiẹ ayen, ri de ghwu.

²² Ihwo ke cha jẹ ovwan eghrẹ fiki mẹ; ẹkẹvuọvo ọ ro se chirako ri te oba, kọye re cha rhọ

²³ Ẹkẹvuọvo e de kpokpo uwe vwẹ orere ọvo, djẹ kpo ọrivẹ. Kidie uyota me ta kẹ ovwan, ovwan sa djẹ vrẹn irere rẹ Izrẹl na ejobi re tavwe rẹ Ọmọ rẹ ohwo ke rhe-e.

²⁴ Odibo rho nọ onini rọye-e, ọviẹn rho nọ ọrovworo-o.

²⁵ Oyoma re odibo họhọ onini rọye, re oviẹn je họhọ ọrovworo. Ayen de se o ro vwo uwevwi Bẹlzibọl, komavo e ru ikru rọye.

Ohwo ra djẹ Oshọ Rọye

²⁶ Ovwan djẹ oshọ rẹ aye-en; o vwo emu ọvuọvo rọ djahere ro jẹ phia-a, eyẹ emu ọvuovo re sinu re jẹ mrẹ-ẹ.

²⁷ Obo re me ta kẹ ovwan vwẹ odjahọ ọye ovwan ta vwẹ azagba, obo ra bẹbẹ ta kẹ ovwan, ọye we ghwoghwo vwẹ enu rẹ uwevwi.

²⁸ Ovwan djẹ oshọ rẹ ohwo ro se hwe ugboma-a, ẹkẹvuọvo wa djẹ oshọ rẹ ohwo rọ se hwe ẹnwẹn.

²⁹ Ọ dia igue ivẹ eye a shẹ anini? yẹ ọvuọvo sa va Ọghẹnẹ abọ she-e?

³⁰ Ẹkẹvuọvo ogẹto rẹ uyovwi rẹ ovwan na e kere ayen.

³¹ Ovwan djẹ oshọ-ọ, ovwan ghare nọ igue na.

Rhọvwo Kristi vwo Obaro rẹ Ihwo

³² Ohwo kohwo rọ rhọvwe ovwẹ vwẹ irharo rẹ ihwo, ọye me je rhọvwe vwẹ obaro rẹ ọsẹ rọ hẹ obo odjuvwu.

³³ Ẹkẹvuọvo ohwo kohwo rọ sen vwẹ vwẹ irharo rẹ ihwo, ọye me je sen vwẹ obaro rẹ ọsẹ mẹ rọ hẹ obo odjuvwu.

Ọ dia Ufuoma-a, Ẹkẹvuọvo Ọlọkọ

³⁴ We roro ni mi rhi phi ufuoma phihọ akpọ-ọ, me vwẹ ufuoma rhe-e, ẹkẹvuọvo ọlọkọ.

³⁵ Me rhere rhi phi ohẹriẹ phihọ uvwre rẹ ọsẹ vẹ ọmọ, ọmọtẹ vẹ oni rọye, kugbe aye vẹ oniorọvwe rọye.

³⁶ Uwevwi rẹ ohwo ọye ọvweghrẹ rọye epha.

³⁷ Ohwo ro guọnọ ọsẹ eyẹ oni nọ vwẹ, yo fo vwe-e; ọ rọ guọnọ ọmọshare eyẹ ọmọtẹ rọye nọ vwẹ, yo ji fo vwe-e.

³⁸ Ohwo ro rhe mu agbagba rọye ro de nene uvwe-e, yẹ ohwo yena se fo vwe-e.

³⁹ Ohwo rọ guọnọ arhọ rọye ko kuofia, ọ ro rhe ku arhọ rọye fia fiki mẹ ko sivwo rhọ.

Osaẹhwa

⁴⁰ Ohwo rọ reyọ ovwan yọ reyọ ovwẹ, ọ rọ rha reyọ ovwẹ-ẹ, yọ reyọ ọ ro ji vwe rhe na-a.

⁴¹ Ọ rọ reyọ ọmraro vwẹ odẹ rẹ omraro, ko vwo osa rẹ omraro. Ohwo ro reyọ ọvwata vwẹ odẹ rẹ ọvwata ko vwo osa rẹ ovwata.

⁴² Ohwo ro reyọ uko rẹ ame djidjiro vwọ kẹ ọvo vwẹ imitete mẹ na da vwẹ odẹ rẹ odibo, uyota me ta kẹ ovwan, osa rọye se ghwru-u.