Malakae 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Echa rẹ Ẹdẹ rẹ Ọrovwohwo na

¹ Gbe nighe, ẹdẹ cha, ọ tuabọ kerẹ enyerhanre, ọke yena ihwo ri herẹ vẹ i ri ruẹ umwemwu ejobi ke cha dia kerẹ ehẹbẹ; ẹdẹ ro cha na kọ cha torhẹ ayen ejobi, eriyin Ọrovwohwo rẹ otuofovwi na tare, ọtiọye na o gbi che jẹ o vwo owọ eyẹrẹ eghọ-ọn.

² Ẹkẹvuọvo vwọ kẹ ovwan re djẹ oshọ mẹ na uvo rẹ ọvwata cha bẹrẹ mu ayen, ọ vẹ esivwo vwẹ ibekpe rọye. Ku we che pho kerẹ upene rẹ erhuẹn ro nẹ urhuẹn rọye cha.

³ Ku wo che chiyi iruimwemwu na muotọ, kẹ ayen cha dia kerẹ iwurhie vwẹ obotọ rẹ ẹhẹrhowọ wẹn, vwẹ ẹdẹ ri mi che vwo ru ọnana, ọtiọye Ọrovwohwo rẹ otuofovwi na tare.

⁴ Karophihọ urhi ri Mosis odibo mẹ na, irhi kugbe iji ri mi ji kẹ vwẹ ugbenu ri Horẹb vwọ kẹ ihwo rẹ Izrẹl ejobi.

⁵ Nighere, mi che ji Elaija rẹ ọmraro na bru ovwan rhe tavwe rẹ ẹdẹ ro muoshọ rẹ Ọrovwohwo na ki rhi te.

⁶ Kọ cha rhẹriẹ udu rẹ esẹ na bru emọ rayen ọ me rha rhẹriẹ udu rẹ emọ na bru esẹ rayen, ọ rha dia ọtiọye-e me da rhe vwẹ obọ ke me cha vwẹ ekan guọghọ otọ na.