Malakae 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Asakiephana, E irherẹn na, ovwan e ji urhi nana kẹ.

² Wa gbe rha kerhọ-ọn, wa gbe vwẹ udu roro-o re wa da vwẹ urinrin kẹ odẹ mẹ-ẹ, eriyin Ọrovwohwo rẹ otuofovwi na tare, ke me cha harhe ovwan ekan ki mi che duvwu iyori phihọ ebruphihọ rẹ ovwan, uyota me tobọ harhe ovwan nure, kidie wa vwẹ udu rẹ ovwan roro-o.

³ Nighe, me cha ghwọ ku uvwiẹ wẹn, me cha vwẹ isọn ghworo uwe opharo; isọn rẹ ẹkpẹvwẹ wẹn na, ke me djẹ wẹ nu obaro mẹ.

⁴ Kọye wọ cha vwọ riẹn nẹ mi jẹ urhi nana kẹ wẹ, rere ọphọ re me vẹ Lẹvi rere vwọ sẹ, enẹ Ọrovwohwo rẹ otuofovwi na tare.

⁵ Ọphọ re me vẹ ọye gba re na ọphọ rẹ arhọ vẹ ufuoma, me da vwẹ ayen kẹ, rere oshọ vwo muo; ọ da ghine djẹ oshọ mẹ, udidi mẹ de muo.

⁶ Uyono rẹ uyota da hẹ unu rọye, a mrẹ efian vwẹ unu rọye-e. O nabọ yan nene uvwe vwẹ ọsoso vẹ ufuoma, o de si ihwo buebu nẹ orukuruku rayen.

⁷ Kidie ẹbẹrunu rẹ orherẹn ọye re sẹro rẹ erianriẹn, ihwo ke guọnọ uyono nẹ unu rọye cha, kidie ọyinkọ rẹ Ọrovwohwo rẹ otuofovwi na o ruẹ.

⁸ Ẹkẹvuọvo wo kurhẹriẹ nẹ idjerhe na; wọ da nẹrhẹ ihwo buebu she fiki rẹ uyono wẹn; we gbe ọphọ ri Livae ku, eriyin Ọrovwohwo rẹ otuofovwi tare,

⁹ kọye mi de ru we kueku, me da vwẹ owẹ gbe otọ kẹ ihwo buebu mrẹ, fikiridie wọ nene idjerhe mẹ-ẹ ẹkẹvuọvo abọ ọvo kọye uyono wẹ nuẹ nene.

A Ghwọku Ijesegbuyota rẹ Izrẹl

¹⁰ O dia ọsẹ ọvo avwanre na ejobi vwori? Ọ dia Ọghẹnẹ ọvo na ma avwanre? Kidie sorọ rẹ avwanre vwọ jẹ ohwohwo eseghuyota, rẹ avwanre vwo miovwo ọphọ rẹ esẹ rẹ avwanre?

¹¹ Juda vwo esegbuyota-a, e gbe ẹgua rode na vwẹ Izrẹl vi Jerusalẹm, kidie Juda gbe ẹshẹ rẹ Ọrovwohwo na ẹgua, rọ guọnọre na, ọ da ra rọvwọ ọmọtẹ rẹ ọghẹnẹ ọfa.

¹² E jẹn Ọrovwohwo rhe nyavwe utughẹ ri Jekọp kufia, fiki rẹ ohwo ro ru emu nana, ono ri se oseri eyẹ kono re kpahe ota, eyẹ kono re vwẹ ẹkpẹvwẹ rhe Ọrovwohwo rẹ otuofovwi na!

¹³ Ọna kọye wọ rhọma ru. Wọ da ra viẹ ku enu rẹ agbada rẹ Ọrovwohwo na, vẹ oma ebere kugbe enuebro fikiridie ọ gbe vwẹ evun esiri reyọ ẹkpẹvwẹ rẹ ovwa-an.

¹⁴ Wọ da nọ nẹ, Die sorọ o vwo jẹ reyọ? fikiridie Ọrovwohwo na oseri rẹ ọphọ re wọ vẹ aye wẹn rẹ ọke-emọ rere, aye yena wo gbe ọfanrhiẹ rhurhu dede na ọye otu wẹn kugbe aye rẹ ọphọ wẹn.

¹⁵ Ọ dia Ọghẹnẹ ọvuọvo na rọ ma avwanre na ọye je vwẹ erhi rẹ arhọ na yọnrọn avwanre na? Kidie ọ guọnọre? Omamọ ẹkpẹvwẹ rẹ uyota. Gba kẹnẹ oma wẹn, rere ohwo kohwo vwo jẹ ọfanrhiẹn e gbe rhurhu aye rẹ ọke-emọ rọye.

¹⁶ Kidie aye re siobọ nẹ na tu vwe oma eriyin Ọrovwohwọ Ọghẹnẹ re Izrẹl tare, re vwẹ ozighi e gbe chobiẹ amwa, eriyin Ọrovwohwo rẹ otuofovwi na tare. Vwẹ ọtiọye na gba kẹnẹ oma wẹn wo gbi gbe ọfanrhiẹ-ẹ.

Iroro Kpahe Ẹdẹ rẹ Ẹdjọeguo re Siẹkẹrẹ

¹⁷ Wọ vwẹ eta wẹn ghwọrọ Ọrovwohwo oma. Yo wọ tanẹ, Mavọ avwanre vwọ ghwọrọ owẹ oma? Wọ vwọ tanẹ, kohwo kohwo ro ru umwemwu vwẹ obaro rẹ Ọrovwohwo yẹ oyoyovwi o ruru, oma rọye kọ vwerhọ. Eyẹ kọ nọ nẹ, Tivọ Ọghẹnẹ rẹ uyota na epha?