Maika 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uruemu rẹ Izrẹl Gbori

¹ Ekan kẹ vwẹ! Kidie me rhe họhọ ọke ra da kọrọ emamọ rẹ ọkeuvo nu, kerẹ ọke ra da kọrọ ibi ri vain ejobi nu: rẹ erheghe ọvuọvo gbe herọ ra ria-a, o gbi vwo ubi ri fig rẹ ẹsosuọ rọ vware rẹ erhi mẹ guọnọre-e

² Ohwo esiri na ghwu nẹ otọ na re, o rhe vwo ọvwata ọvuọvo vwẹ ohri rẹ ihwo-o; ayen ejobi fiọnko hẹrhẹ ọbara dohwo doniọvo rọye tan ariri hẹrhẹ.

³ Obo rayen hẹ emu umwemwu eruo, ayen nabọ ruo dẹndẹn; te osun te oguẹdjọ ra nọ ekpẹn rẹ udi, ohwo rode ra ta ota umwemwu rẹ erhi rọye guọnọre; kẹ enẹ ayen rhuo koko.

⁴ Ọ ro me yovwi vwẹ usun rẹ ayen họhọ ebẹn, ọ rọ ma dia ọvwata vwẹ ohri rẹ ayen họhọ ogba rẹ inwe. Ẹdẹ rẹ ọrhẹrotọ rayen, ẹdẹ rẹ ehwe rayen, o te nure; Asakiephana ozighi rayen kẹrẹ otọ re.

⁵ Wọ vwẹ ẹro so ọrivẹ-ẹ, wọ vwẹ udu kpahe ugbeya-an; sẹro rẹ ẹchẹ rẹ ugbunu wẹn kẹ aye rọ vwẹ uyovwi kpahe owẹ udu;

⁶ Kidie ọmọshare na ni ọsẹ rọye saka, ọmọtẹ na ghwe mukpahe oni rọye, aye-orọvwe mukpahe oniorọvwe rọye; uwevwi rẹ obọ rẹ ohwo ọye ọvweghre epha.

Ọrovwohwo re vwẹ Urhukpẹ vẹ Esivwo Cha

⁷ Ẹkẹvuọvo vwọ kẹ vwẹ Ọrovwohwo mi che ni, me hẹrhẹ Ọghẹnẹ rẹ esivwo mẹ; Ọghẹnẹ mẹ che nyo vwẹ.

⁸ Wọ ghọghọ ovwẹ-ẹ, E ọvweghrẹ mẹ. mi de she, mi ji che vrẹn; ọke mi de tidia vwẹ evun rẹ ebri, Ọrovwohwo cha dia urhukpẹ kẹ vwẹ

⁹ Ki mi chiri ophu rẹ Ọrovwohwo na fikiridie mi ru umwemwu kpahọ, bẹsiẹ ro vwo mie vwẹ unu vwo gu ro de brorhiẹ kẹ vwẹ. kọ vwẹ ovwẹ kpo asan rẹ urhukpẹ epha; ke me mrẹ esivwo rọye vughe.

¹⁰ Etiyin ọvweghrẹ mẹ kọ mrẹ, oma kọ vo ohwo rọ ta kẹ vwẹ Tivọ Ọrovwohwo re Ọghẹnẹ wẹn epha? Ki mi ghorie ẹro no, asakiephana ke chiyo te otọ kerẹ ibehre rẹ urhuvwu.

¹¹ Ẹdẹ ọvo cha ra cha vwọ ma igbẹhẹ wẹn! Vwẹ ẹdẹ yena ke bi ughwru na shesheri

¹² Vwe ẹdẹ yena ayen ki che bru we rhe, nẹ Asiria re te Ijipt, nẹ Ijipt rhe re te Urhie na, nẹ abadi re te abadi nẹ ugbenu re te ugbenu.

¹³ Ẹkẹvuọvo ọto na kọ cha dia ofefe fiki re ihwo re dia, fiki rẹ emamọ rẹ uruemu rayen .

Ọrovwohwo re Ehrọre rẹ Izrẹl

¹⁴ Vwẹ ọkpọ wẹn sun ihwo wẹn, igegede re wọ vwọ reuku, rẹ ayen ọvo dia evun rẹ egbo ọvo sogolo vwẹ ohri rẹ okogbe; jẹn ayen ghẹrẹ oma vwo Bashan vi Gilẹad kerẹ ọke rẹ awanre.

¹⁵ Kẹrẹ ọke rẹ ovwan vwo nẹ otọ rẹ Ijipt rhe na ke Me vwẹ emu rẹ igbunu buebu nẹ ayen.

¹⁶ Ẹgborho na ke mrẹ oma rẹ ẹgba rayen, ayen ke vwẹ abọ rayen rhurhu unu rayen; erhọn rayen ki che di;

¹⁷ ayen ke cha rare ekpẹn kerẹ ọrọdekọ, kerẹ erọvwọ ri kpono vwẹ otọ na; ayen ki yoro nẹ asan ọgangan rayen rhe vẹ oma ẹpharie, ayen ki che rhivwi bru Ọrovwohwo Ọghẹnẹ rayen rhe vẹ udidi, oshọ kọ mu ayen fiki wẹ.

¹⁸ Ono Ọghẹnẹ rọ họhọ owẹ, rọ vwẹ orukuruku vwọ ghovwo ro mi gbobọnye ogbeku vwi fiki rẹ umuku rẹ ihwo rọye ri chekọ? O phiẹ ophu rọye phihọ evun bẹdẹ-ẹ fikiridie ẹguọnọ ro jẹrhẹriẹ ri je.

¹⁹ Ọ je rhoma re ehrọre rẹ avwanre, o che chiyi orukuruku rẹ avwanre muotọ. We re cha kpare imwemwu rẹ avwanre ejobi phihọ evun rẹ abadi.

²⁰ Wọ vwẹ evun esiri nẹ Jekọp ẹguọnọ esiri wẹn na kẹ Ebraham, kirobo wo ruru kẹ esẹ rẹ avwanre nẹ ọke awanre rhe.