Maika 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọrovwohwo vẹ Izrẹl vwo Aphro

¹ Nyo obo rẹ Ọrovwohwo tare: Vrẹn, re gu ẹkẹn unu wẹn kẹ igbenu na, re igbenu rẹ itete na nyo urhuru wẹn.

² Nyo, ovwan igbenu na, ẹghwọ rẹ Ọrovwohwo na, kugbe ovwan ichivwo ri bẹdẹ rẹ otọ na; kidie Ọrovwohwo vẹ ihwo rọye vwo ẹghwọ, ọ vẹ Izrẹl ke cha phro aphro.

³ E ihwo mẹ, die mi ru ovwan? Didi emu mi vwo gbe ovwan ku? Wa kpahe kẹ vwẹ!

⁴ Kidie Me reyọ ovwan nẹ otọ rẹ Ijipt rhe, Me da tan ovwan nẹ uwevwi rẹ eviẹn rhe; Me da vwẹ ovwan kẹ Mosis, Erọn, kugbe Miriam.

⁵ E ihwo mẹ, karohọ iroro ri Balak ovie ri Moab jẹre, kugbe obo ri Balam ọmọ ri Biọ kpahe kẹ, kugbe obo re phiare nẹ Shitim re te Gilgal, rere wọ vwọ riẹn ona rẹ esivwo rẹ Ọrovwohwo na.

Obo rẹ Ọrovwohwo Guọnọre

⁶ Ki didi emu me ghwa bru Ọrovwohwo rhe, re mi rhi diguẹ vwẹ obaro rẹ Ọghẹnẹ rọ he obenu? Ke izobo rẹ ẹtorhẹ me ghwa bro rhe, vẹ upene rẹ erhuẹn rẹ ẹgbukpe?

⁷ Kẹ ivun rẹ egbo uriori sa vwerhe Ọrovwohwo, kugbe uriori ihwe rẹ urhie rẹ evwri? Ke Me vwẹ ọmọ ọkpako mẹ ze izobo fiki rẹ ogbeku mẹ, omamọ rẹ oma mẹ fiki rẹ umwemwu re erhi mẹ?

⁸ O dje kẹ wẹ nure, E ohwo na, obo ri yoma; kidie Ọrovwohwo tobọ guọnọ vwẹ obọ wẹ ru emu rọ dia ọsoso, guọnọ aruẹdọn, kugbe rere wọ rha vwẹ oma kpotọ yan nene Ọghẹnẹ wẹn?

⁹ Urhuru rẹ Ọrovwohwo re kpere kẹ orere na ọye omamọ rẹ aghwanre ra vwọ djẹ oshọ kẹ odẹ rọye: Nyo, E uvwiẹ na kugbe ọghwẹgbe rẹ orere na!

¹⁰ Kẹ uvumwemwu rọ he evun rẹ uwevwi rọye sa chọrọ ovwẹ ẹro kugbe ovwanvwọn rẹ umwemwu ra harhere na?

¹¹ Ki mi siobọ nẹ ohwo ro vwo ovwanvwọn rẹ umwemwu na kugbe ohwo ro vwo ekpo rẹ ophiẹvwe na?

¹² Edafe rẹ ovwan vọnre vẹ ozighi; ihwo rẹ dia evun rẹ orere na vwọrọ efian, ẹrenvwe rẹ unu rayen vọnre vẹ ophiẹvwe.

¹³ Fiki rẹ ọtiọye na mi mu ovwan phihọ ẹteyọ re, ka kua ovwan fiotọ fiki rẹ umwemwu rẹ ovwan.

¹⁴ Wọ cha re emu, ẹkẹvuọvo yẹ evun cha vọn wẹ-ẹ, yẹ owẹvwe re hwe obo evun wẹn. wo che si nẹ obọ, ẹkẹvuọvo wo che koko-o, obo wo rhe koko ke Me vwẹ ayen kẹ ọlọkọ ghwọrọ.

¹⁵ Wọ cha kọn, ẹkẹvuọvo wọ che vu-un, wo che chiyi oliv ẹkẹvuọvo wọ cha vwẹ evwri rọye ghworo oma-a; wo che chiyi grep, ẹkẹvuọvo wọ cha da udi rọye-e.

¹⁶ Kidie wọ je sẹro rẹ irhi rẹ Omri, kugbe iruo rẹ uwevwi rẹ Ehab; wọ da yan nene iroro rayen; rere mi vwo ru we dia ofefe, ihwo re dia evun wẹn ke fiọn unu yan; ọtiọye na ku wọ ghwa oghwa rẹ ehwẹjẹ rẹ ihwo na.