Maika 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ekan kẹ Otu ri Shenyẹ Ivwiogbere

¹ Ekan ke otu re jẹ iroro umwemwu ri ruẹ ivumwemwu vwẹ enu re ehwa rayen! Ọke rẹ ọke dẹ rhiere, ayen mi ruọ, fikiridie ọgangan na rhe ayen vwẹ obọ.

² Udju re ohwo ọfa da ayen ẹro, ayen mi gborho ayen, iwevwi re ayen, ayen Me ghwẹ ayen reyọ; ayen shenyẹ ohwo vẹ uwevwi rọye, ohwo vẹ uku rọye.

³ Eriyin na, enẹ Ọrovwohwo na tare: nighe Me herọ jẹ iroro umwemwu vwọ kpahe orua nana, we se si ọhọre rẹ ovwan no-o; ovwan sa yan phuoma-a fikiridie ọke yena cha dia ọke ọbrabra .

⁴ Vwẹ ọke yena ka cha vwẹ une rẹ ehwẹjẹ vwọ so owẹ, kẹ ayen cha viẹ beroma gangan, tanẹ, Avwanre ghwruru tototo, o ku ẹkẹn rẹ ihwo mẹ rhẹriẹ, nighe obo ro siro nẹ uvwe obọ! O da ghare etọ rẹ avwanre kẹ otu ri mu avwanre.

⁵ Fiki rẹ ọtiọye na wọ gbe cha mrẹ ohwo rọ vwẹ usli na duvwu itẹ-ẹ vwẹ evun rẹ ọghwẹgbe rẹ Ọrovwohwo na.

⁶ Wọ gbe ta ota-a–enẹ ayen ta– ohwo ọvuọvo gbe ta ota re emu etiọye-e; omaẹphọphọ che te avwanre oma-a.

⁷ Ka sa ta ọnana, E uwevwi ri Jekọp? Ke erhi rẹ Ọrovwohwo je odiri evwo? Enana na uruemu rọye? Eta mẹ rhe ru obo ri yovwiri kẹ ohwo rọ kpọvi-i?

⁸ Ẹkẹvuọvo wọ da vwọ so ihwo Me kerẹ ọvweghrẹ; wọ da ban adagba miẹ ohwo rẹ ufuoma, nẹ ihwo re yan oyan obọ rayen wan ri vwo iroro rẹ ofovwi ọvuọvo-o.

⁹ Eya rẹ ihwo mẹ wọ djẹ ayen kufia nẹ iwevwi iyoyovwi rayen; wo de mu ayen jẹ emọboba rayen vwo nẹ urinrin mẹ bẹdẹ.

¹⁰ Vrẹn wọ yanran, kidie ọna dia asan re de rovwoma-a; fiki rẹ emu ogbeghbe rọ guọghọ rọ guọghọ vẹ ivuemiovwo rode.

¹¹ Ohwo de vrẹn kpo otafe ra ta eta ifefe vẹ efian, tanẹ, me ta ota rẹ udi vẹ udi ọgangan kẹ ovwan, kọye re cha ta ota kẹ ihwo nana.

¹² Mi che si ovwan ejobi koko, E Jekọp, Me cha ghwe umuku ri Izrẹl ri chekọ koko; Ki mi si ayen koko kerẹ igegede vwẹ evun rẹ ogba, kerẹ ekru rẹ igodẹ vwẹ asan re da ria odi, urogho rẹ ihwo ri muẹ do.

¹³ Ohwo ro bru unu phihọ kọ ruọ bru ayen ra; kẹ ayen guọghọ anurhoro na wanvrẹn, ọye ayen cha wan. Ovie rayen kọ ka obaro kẹ ayen, Ọrovwohwo na kọ dia obo uyovwi rayen.