Livitikọs 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ O da dianẹ ohwo ọvo ru umwemwu, ohwo re seri rhe asan otu rere o rhi se iseri kpahe uyota re emu rọ mrẹre eyẹ ọ ro nyori, ọ rha rhọvwe ta-a, ke ọye ọvo re ghwa orukuruku rọye.

² Eyẹ ọ da dianẹ ohwo vwẹ obọ te emu ro jẹfuọn, owenẹ ọ dia eranvwe ro jẹfuọn ro ghwuru, erhuẹn eyẹ eranvwe ri kpono ri jẹfuọn ri ghwu nure, yọ riẹnre-e ro de gbe ẹgua, kọ cha re abe.

³ Eye ohwo da vwẹ oma te ijẹfuọn ro nẹ oma rẹ ohwo rẹ akpọ rhe idjerhe ki idjerhe ejobi rẹ ijẹfuọn na wan rhe, o rha riẹn jovwo-o ukuko rọye ọ da rhe riẹn yọ reabe nure.

⁴ Eyẹ ohwo da vwẹ okpokpakpa vwẹ unu rọye ve ive ro vwo ru imwemwu eyẹ vwo ru ọresiri, ive kive rọ vwẹ okpakpa ve ejobi, ọ rha riẹn jovwo-o ukuko rọye ọ da rhe riẹn yọ re abe rayen ejobi.

⁵ Ohwo da mrẹ nẹ ọye re abe re emu ọvo vwẹ enana ejobi, gbe jẹn ọ rhọvwe imwemwu ro ruru.

⁶ Kọ vwẹ izobo rẹ abe rọye vwọ rhe Ọrovwohwo fiki rẹ imwemwu ro ruru, ẹvwe aye eyẹ omogodẹ aye, kẹ ọye o vwo ze izobo rẹ umwemwu; orherẹn na kọ gọ ẹgua rẹ umwemwu rọye na no oma rọye.

⁷ Ẹkẹvuọvo ohwo na rha sa dẹ omogodẹ-ẹ, gbe jọ reyọ inekuku ivẹ eyẹ erurẹ ivẹ vwo ze izobo kẹ Ọrovwohwo fiki rẹ imwemwu rọye ro ruru, ivẹ na, ọvo izobo rẹ umwemwu, ọ ro chekọ kẹ izobo rẹ ẹtorhẹ

⁸ Kọ vwẹ ayen rhe orherẹn na, kẹ ọye vwẹ ayen ze, ẹsosuọ izobo rẹ umwemwu o ke ze; ọ Me chahe uyovwi rọye vwrẹ nẹ ohọre rọye, ẹkẹvuọvo o savwọ no-o,

⁹ ọ Me fẹnrẹ ọbara rọye ku akakọ rẹ agbada na emerha, o mi jẹn ọbara ro chekọ ejobi sun no ku hẹ awọ rẹ agbada na, Ọnana izobo rẹ umwemwu;

¹⁰ kẹsiẹye o ki rhi ze izobo rẹ ivẹ rọ dia izobo rẹ ẹtorhẹ na kirobo rẹ urhi na epha; orherẹn na Me rhe gọ ẹgua rẹ umwemwu ro ruru na no oma rọye, ko vwo ghovwo.

¹¹ Ẹkẹvuọvo ohwo rha sa dẹ inekuku ivẹ eyẹ erurẹ ivẹ-ẹ, gbe jọ reyọ abọ ọvo rẹ ẹko ihwe rẹ iputusẹ rẹ eka re duvwu nure vwọ rhe rere o vwo ze izobo rẹ umwemwu fiki rẹ umwemwu rọye ro ruru, o ku evwri phihọ-ọ, eyẹ adjija dede-e, kidie Ọnana izobo rẹ umwemwu.

¹² Kọ reyọ rhe orherẹn na, orherẹn na Me ghwe ẹkuobọ vọn no rọ dia ẹkẹn rẹ ẹkarohọ rọye, ọ Me torhẹ Ọnana vwẹ enu rẹ agbada na, ra da torhẹ izobo kẹ Ọrovwohwo na, Ọnana izobo rẹ umwemwu,

¹³ enẹ orherẹn na vwọ gọ ẹgua rẹ umwemwu na ro ruru na no oma rọye, ko vwo ghovwo. Obo ri chekọ vwẹ Etiyin ejobi orherẹn na kọye re reyọ, kirobo re ruẹ vwẹ izobo rẹ ọka jovwo na.

Izobo rẹ Abe

¹⁴ Ọrovwohwo na da ta kẹ Mosis nẹ,

¹⁵ Ọ da dianẹ ohwo miovwo urhi rẹ esegbuyota rọ da vwẹ ugheghẹ ru umwemwu vwo gbe ẹgua vwẹ oma rẹ emu ọfuanfọn rẹ Ọrovwohwo na, gbe jo rhi ze izobo kẹ Ọrovwohwo na fiki rẹ oruchọ rọye, egbo ro vwo eka-an, wọ Me nabọ vwanvwọn vwẹ shẹkẹl rẹ idọnọ ọfuanfon, ọtiobo rẹ shekẹl rẹ ẹshẹ rẹ Ọrovwohwo na epha, kidie Ọnana izobo fiki rẹ oruchọ.

¹⁶ Orọvwọ ọfuanfon ro miovwiri na, ọ Me rha hwa osa rọye, o Me rha hwa abo ọvo rẹ ẹbẹre iyori kpahọ, ọ Me vwẹ ayen rhe orherẹn na, Orherẹn na Me vwẹ egbo na phorho ẹgua rẹ oruchọ rọye fia, rere e vwo ghovwo.

¹⁷ Ohwo de rhe ru umwemwu, o de ru emu re Ọrovwohwo vwo jiji nẹ eruẹ-ẹ na, o de ruo vwẹ ijẹriẹn dede, yo ruchọ ghene ọ je ghwa reabe nure, kọ ghwa orukuruku rọye.

¹⁸ Kọ reyọ egbo ro vwo eka-an vwo rhe orherẹn na, egbo ro mu uwan ra hwa osa rẹ izobo rẹ abe na, orherẹn na kọ gọ ẹgua rọye nu vwọ kẹ fiki rẹ oruchọ ro ruru vwe ijẹriẹn na, ke vwo ghovwo.

¹⁹ Ọnana izobo rẹ abe, kidie ọ reabe vwẹ obaro rẹ Ọrovwohwo.