Livitikọs 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Izobo re Umwemwu

¹ Ọrovwohwo da ta kẹ Mosis nẹ,

² Ta ke ihwo te Izrẹl, O da dianẹ ohwo vwẹ ugheghẹ ru umwemwu vwẹ emu kemu ejobi rẹ Ọrovwohwo vwo ji urhi nẹ erue-e, na, O rha riẹ-ẹn o de ru ayen,

³ Ọ da dianẹ orherẹn re vwo mu kọye ru umwemwu na, re ihwo ejobi vwọ reabe na, gbe jẹn o ze izobo fiki rẹ urhi ro miovwiri na, kọ reyọ upene rẹ erhuẹn ọshare ro je ekan evwo vwo ze izobo ke Ọrovwohwo fiki rẹ izobo rẹ umwemwu rọye.

⁴ O Me reyọ erhuẹn ọshare na rhe anurhoro rẹ utughẹ ra da vwa oma na vwẹ obaro rẹ Ọrovwohwo, kọ ghwẹ obọ rọye kpahe uyovwi rọye, ko hwe vwọ kẹ Ọrovwohwo.

⁵ Orherẹn re vwo mu na Me reyọ vwọ ọbara rẹ erhuẹn ọshare na vwọ rhe evun rẹ utughẹ ra da vwa oma na,

⁶ Orherẹn na mi duvwu urhiabọ rọye phihọ evun re ọbara na ọ Me fẹnrẹ ọbara na abọ ighwrẹn ku obaro rẹ aphiana ro rhurhu ẹshẹ ọfuanfon rẹ Ọrovwohwo na.

⁷ Orherẹn na mi phi ọbara na phihọ ighoro rẹ agbada rẹ ugboduma ro gbo ọnrhe ororo vwẹ obaro rẹ Ọrovwohwo na, rọ hẹ evun rẹ utughẹ ra da vwa oma na, ọbara ro chekọ ejobi ke kuo phihọ awọ re agbada re izobo re ẹtorhẹ na rọ unurhoro re utughẹ ra da vwa oma na.

⁸ O Me reyọ ivwri rẹ erhuẹn ọshare na re vwo ze fiki rẹ izobo rẹ umwemwu na, te ivwri rẹ ivun vẹ i ri rhurhu ayen ejobi,

⁹ kugbe ibiehu ivẹ rọye vẹ ivwri re tamu ayen re fi obo ikpoghoawọ, vwọ ba ekuakua rẹ irhue ro che bru kugbe ibiehu na

¹⁰ (kere ọtiobo ra reyọ ekuakua na re vwo ze izobo rẹ ufuoma na rhe), Orherẹn na Me torhẹ ayen ejobi vwẹ enu rẹ agbada ra da torhẹ izobo na.

¹¹ Ẹkẹvuọvo ophiẹn rẹ eranvwe na vẹ uvwo rọye ejobi, kugbe uyovwi rọye, te awọ rọye, vẹ ivun rọye te isọn rọye,

¹² kọye ekru re eranvwe na ejobi ko muo kpo asan rọ fonro vwẹ obo otafe, asan re de ku iwurhie Kuefia, ọ Me vwẹ erhanre torhẹ vwẹ asan re de ku iwurhie fia na.

¹³ Ọ da dianẹ ukoko rẹ Izrẹl na ejobi da vwẹ ugheghẹ ru umwemwu rẹ oruchọ na da djahe kẹ ukoko na, ayen da chọ urhi ọvo rẹ Ọrovwohwo tanẹ erue-e ye ayen reabe:

¹⁴ Ọke ra da rhe mrẹ Umwemwu rẹ ayen ruru na vughe re, ukoko na ejobi Me vwẹ upene rẹ erhuẹn ọshare re vwo ze izobo rẹ umwemwu na vwọ rhe obaro rẹ utughẹ ra da vwa oma na,

¹⁵ ekpako rẹ ukoko Me ghwẹ abọ rayen kpahe uyovwi rẹ erhuẹn ọshare na vwẹ obaro rẹ Ọrovwohwo na, e mi hwe vwẹ obaro rẹ Ọrovwohwo.

¹⁶ Orherẹn re vwo mu na Me reyọ vwẹ ọbara rẹ eranvwe na ro hẹ evun rẹ utughẹ ra da vwa oma na,

¹⁷ Orherẹn na mi duvwu urhiabọ phihọ ọbara na ọ Me fẹnrẹ ku aphiana rẹ Ọrovwohwo na abọ ighwrẹn.

¹⁸ O mi rhe phi ọbara na phihọ ighoro rẹ agbada na rọ hẹ evun rẹ utughẹ ra da vwa oma na vwẹ obaro rẹ Ọrovwohwo na; ọbara ro chekọ ejobi o mi kuo phihọ awọ rẹ agbada rẹ izobo rẹ ẹtorhẹ na rọ unurhoro rẹ utughẹ ra da vwa oma na

¹⁹ Ọ Me rha reyọ ivwri rọye ejobi ọ Me torhẹ ayen vwẹ enu rẹ agbada na.

²⁰ Ọtiọye o ji ru erhuẹn rẹ ọshare na; kirobo ro ruẹ erhuẹn rẹ izobo rẹ umwemwu na ọtiọye o ji ru Ọnana rhe; Orherẹn na kọ gọ ẹgua na nẹ ayen ejobi oma, kẹ ayen vwo evworhovwo.

²¹ O mi mu erhuẹn ọshare na phihọ otafe nẹ evun rẹ erhọn na, ọ Me torhẹ kerẹ ọ rẹsosuọ na, Ọnana izobo fiki rẹ izobo rẹ umwemwu rẹ otu ejobi.

²² Ọ da dianẹ osun kọye ru umwemwu, ọ da vwẹ ugheghẹ gbe urhi rẹ Ọrovwohwo Ọghẹnẹ rọye ku, rọ da reabe,

²³ ọke re de dje umwemwu rọye phia kẹ re, kọ reyọ ẹvwe vwo ze izobo rọye, okri ro je ekan evwo,

²⁴ ọ Me ghwa obọ rọye kpahe uyovwi rẹ ẹvwe na, o mi hwe vwẹ asan re de hwe eranvwe ra vwọ torhẹ izobo kẹ Ọrovwohwo na; ona izobo re ze fiki rẹ izobo rẹ umwemwu.

²⁵ Orherẹn na Me vwẹ urhiabọ reyọ ọbara re eranvwe na phihọ ighoro rẹ agbada na rẹ izobo ẹtorhẹ na, o mi ku ọbara ro chekọ phihọ awọ rẹ agbada ra da torhẹ izobo na.

²⁶ Ọ Me torhẹ ivwri rọye ejobi vwẹ enu rẹ agbada na, kirobo re ruẹ ivwri re vwo ze izobo rẹ ufuoma; ọtiọye na orherẹn na Me rhuẹrẹ arhuẹrẹ fiki rẹ imwemwu rọye, ke vwo ghovwo.

²⁷ Ọ da dianẹ usun rẹ ihwo ghevweghe na kọye ọvo da vwẹ ugheghẹ ru umwemwu rẹ Ọrovwohwo tanẹ eruẹ-ẹ; rọ da re abe,

²⁸ a da vwẹ imwemwu rọye phia kẹ, kọ vwẹ ẹvwe ze izobo fiki rẹ umwemwu rọye, ẹvwe aye ro je ekan evwo kọye ọ vwọ rhe.

²⁹ Ọ Me ghwe obọ rọye kpahe uyovwi rẹ eranvwe na o mi hwe vwẹ asan ra da torhẹ izobo na.

³⁰ Orherẹn na Me vwẹ urhiabọ te ọbara vwo te ighoro rẹ agbada na rẹ izobo ẹtorhẹ na, o mi ku ọbara ro chekọ ku awọ rẹ agbada na.

³¹ O mi si ivwri rẹ eranvwe na ejobo no ọtiobo re ruẹ ọ rẹ izobo rẹ ufuoma na, Orherẹn na kọ torhẹ ayen vwẹ enu rẹ agbada na rere o gbo ọnrhen ororo kẹ Ọrovwohwo, Orherẹn na kọ gọ ẹgua rọye no oma, ke vwo ghovwo.

³² Ọ da dianẹ omogodẹ ọ vwọ rhe ẹkpẹvwẹ rẹ izobo fiki rẹ izobo rẹ umwemwu, o mi jọ dia ọ rẹ aye ro je ekan evwo,

³³ Ọ Me ghwe obọ rọye kpahe uyovwi rẹ izobo rẹ umwemwu na, o mi hwe vwo ze izobo fiki rẹ umwemwu vwẹ asan re de hwe eranvwe ra vwọ torhẹ izobo na.

³⁴ Orherẹn na Me reyọ urhiabọ vwọ reyọ ọbara na re eranvwe re vwo ze izobo rẹ umwemwu na vwo te ighoro rẹ agbada na rẹ izobo ẹtorhẹ na, o mi ku ọbara ro chekọ na ejobi phihọ awọ rẹ agbada na.

³⁵ Ivwri rẹ eranvwe na ejobi o mi si ayen no kirobo re siẹ ivwri nẹ omogodẹ re vwo ze izobo rẹ ufuoma na no, orherẹn na Me torhẹ vwẹ enu rẹ agbada na, vwọ ba izobo ra torhẹ na vwọ kẹ Ọrovwohwo; orherẹn na kọ gọ ẹgua no oma fiki rẹ imwemwu ro ruru na, ke vwo ghovwo.