Biblia Todo Logo
Bìoball air-loidhne

- Sanasan -

Livitikọs 25 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ


Ẹdidjala rẹ Ẹgbukpe kugbe Ukpe rẹ Orẹ Rode

1 Ọrovwohwo na da ta kẹ Mosis vwẹ ugbenu ri Sinai,

2 Ta kẹ ihwo rẹ Izrẹl, Ovwan de rhi te otọ re Me vwọ kẹ ovwan na, otọ na ejobi Me yọnre ẹdidjala ọvo vwọ ke Ọrovwohwo na

3 Ovwan Me kọn ekankọn re ovwan ikpe esan gbagba, ovwan Me rha rhuẹrẹ irhe rẹ vain rẹ ovwan, wa Me kọrọ ibi rayen ikpe esan gba,

4 ẹkẹvuọvo ikpe ighwrẹn de te kẹ omaerovwo dia, kọye ẹdidjala re omaerovwo vwọ kẹ otọ na, ẹdidjala ra yọnre vwọ ke Ọrovwohwo na, ovwan rha kọn ekakọ-ọn eyẹ ke ọgbọ ri vain ẹrhuẹrẹ-ẹ

5 Emu kemu rọye ọvo dje phia vwẹ udju re ovwan, ovwan vuẹn aye-en, otiẹ re ovwan re wa rhuẹrẹ-ẹ na ovwan je kọrọ aye-en; re ọye na dia ukpe re omaerovwo vwọ kẹ otọ na.

6 Ẹdidjala rẹ otọ kọ nẹrhẹ ovwan mrẹ emu re, te ovwan vẹ eviẹn re eya ve eshare rẹ ovwan kugbe ihwo rẹ ovwan durhie iruo vẹ erhorha ri ohri rẹ ovwan;

7 te uchuru rẹ ovwan ejobi vẹ eranvwe rẹ aghwa rẹ ovwan ejobi ke dia emuọre.

8 Ovwan mi kere ẹdidjala ighwrẹn rẹ ukpe, ikpe ighwrẹn aku ighwrẹn, rere ẹdidjala ighwrẹn rẹ ukpe na kọye ẹgbukpe ujuvẹ gbe irhiri kọye ọ dia kẹ ovwan.

9 Vwẹ ẹdẹ rihwe vwe evun re emeranvwe righwrẹn na we mi hworo owanre rọ mra gangan wan asan na ejobi, vwẹ ẹdẹ ra gọ ẹgua na ovwan mi hworo owanre na wan otọ na ejobi re.

10 Ikpe ujuvẹ gbẹ ihwe na de te re ovwan mi mu ọghọ kẹ, we mi ghwoghwo obọesiono vwọ kẹ ihwo rẹ ikpe ujuvẹ gbe ihwe kẹ ovwan ri kohwo kohwo ejobi vwo rhivwi kpo ughwẹ rọye, ri kohwo kohwo ejobi de rhivwi kpo orua rọye.

11 Ọke rẹ aghọghọ rẹ ukpe yena dia ke ovwan, vwẹ evun rẹ ukpe yena ovwan kọn emu ọvuọvo-o, emu re ọye ọvo djẹre ovwan ji vuo-o, ibi ri vain re ovwan ra rhuẹrẹ phihọ na wa je kọrọ aye-en.

12 Kidie ọye ukpe rẹ aghọghọ; kọ dia ọke ọfuanfon kẹ ovwan; obo re djẹre vwẹ otọ kọye ovwan re.

13 Evun rẹ ukpe rẹ Aghọghọ na ohwo kohwo rẹ ovwan ejobi ko rhivwi kpo ughwẹ rọye.

14 Ọ da dianẹ wọ she emu kẹ ọrivẹ wẹn eye wọ de mie, ovwan ohwo ruẹ ohwo chọ-ọ.

15 Kirobo rẹ unu rẹ ikpe epha ra da ghọghọ nu na, eriyin ovwan dẹ emu mie ọrivẹ re ovwan te, je vwẹ unu rẹ ikpe tiọye na ọ je she emamọ kẹ ovwan bu te.

16 Ikpe na de bu ovwan ki phihọ unu rẹ eki na, ikpe na da rha hanvwe ovwan mi sinu unu rẹ eki, kidie obo re ekankọn na bu te ọye ọ shẹ kẹ ovwan.

17 Ovwan ruẹ ohwohwo chọ-ọ ẹkẹvuọvo ovwan djẹ oshọ rẹ Ọghẹnẹ rẹ ovwan; kidie Mẹvwẹ Ọrovwohwo Ọghẹnẹ rẹ ovwan,

18 Fiki rẹ ọtiọye na ovwan gba vwẹ irhi mẹ vwo yeri, rere vwa yọnrọn iji mẹ re we ru ayen, rere ovwan vwọ sa dia otọ na vẹ ufuoma.

19 Otọ na ko yovwi emu, ovwan ke re evun vọn, ovwan ke dia vẹ ufuoma

20 Ovwan da tanẹ, Kidie avwanre re vwẹ ukpe rẹ ighwrẹn na, ra vwọ ta nẹ avwanre kọ emamọ-ọ eyẹ e vuẹn ekankọ-ọn?

21 Me cha vwẹ ebruphihọ vwọ vọn otọ na kẹ ovwan vwẹ ukpe rẹ esan na, rere o vwo yovwi emu buebu re te ikpe erha vwọ kẹ ovwan.

22 Ovwan da cha kọn ekankọn rẹ ovwan vwẹ ukpe rẹ ẹrenren na, ye ovwan rọ ria emu rẹ uhuhun bẹsiẹ re te ukpe rẹ irhirin, re che vwo vuẹn emu rẹ ovwan kọnre na, re ovwan mrẹ emu re uhunhun re.

23 A sa shẹ otọ na bẹdẹ-ẹ, kidie otọ na ọ mẹ, kidie ovwan erhorha mẹ ve ihwo ri nene uvwe dia.

24 Korho korho rẹ ovwan vwori ejobi, ku wa rhọwwe ne a tan otọ na.

25 Oniọvo wẹn da ogbere, rọ da she emu ro vwori, omoni rọ ma kẹrẹ oma Me ra tan emu rẹ omoni rọye shẹre na,

26 Ohwo rhe vwo omoni rọ tan emu na rhivwi-i, ẹkẹvuọvo ekpuyovwi rọye de rhe rhi vwo igho ri te vwọ tan emu rọye na,

27 gbe jo kere unu ikpe re wanre rọ vwọ shẹ orọvwọ na rere ọ hwa osa rọye kpahe kẹ ohwo rọ shẹrẹ kẹ na; emu na ko rhivwi dia ọrọye.

28 Ẹkẹvuọvo o rhe vwo igho te obo rọ sa vwọ tan reyọ-ọ, orọvwọ na kọ dia obọ rẹ ohwo rọ dẹrẹ na bẹsiẹ rẹ ukpe rẹ orẹ rẹ aghọghọ na vwọ gba; vwẹ evun rẹ orẹ na ke siobọ no, ko rhivwi bru ohwo ro vworo jovwo na ra.

29 Ohwo da she uwevwi rọ dia vwẹ evun rẹ orho ra gba ogba yariẹ, O sa tan reyọ siẹ rẹ ẹgbukpe ọvo da wan nu, kidie ọsoso rẹ ẹgbukpe ọye o vwo vwo ogangan rẹ etantan

30 A gbe sa tan reyọ vwe ẹgbukpe ọvo-o, uwevwi rọ orho ra gba ogba yariẹ na kọ dia ọ rẹ ohwo ro dẹre na bẹdẹ, vwọ ke unurhoro rọye, e gbi rhe siobọ no vwẹ ọke rẹ orẹ rẹ ukpe rẹ aghọghọ na-a

31 Ẹkẹvuọvo iwevwi rẹ erhọn ra gba ogba yariẹ-ẹ ke kere ayen kugbe idju rẹ orere yena ejobi, a sa tan ayen, ke siobọ nẹ ayen vwẹ ukpe rẹ aghọghọ na.

32 Odẹ irere re ihwo ri Livae na, iwevwi re evun rẹ irere rẹ ẹkẹn ughwẹ rayen na, ihwo ri Livae na sa tan otiọye reyọ vwẹ ọke kọke ejobi.

33 Ẹkẹvuọvo ohwo ri Livae na ọvo rha sa vwi fiki rẹ urhi na vwọ tan reyọ-ọ, uwevwi ra shẹre vwe evun re orere re ughwẹ rayen na ke siobọ no vwẹ ukpe rẹ orẹ re aghọghọ na; kidie iwevwi rẹ irere re ihwo ri Livae na yẹ ẹkẹn ughwẹ rayen vwe ohri re ihwo re Izrẹl.

34 Ẹkẹvuọvo idju re otọ rẹ ihwo ejobi re dia e re irere rayen a sa she aye-en, kidie ọyena ọye ughwẹ rayen ejobi bẹdẹ.

35 Oniọvo wẹn de rhi hirhe phihọ ogbere, rọ rha sa ghere oma rọye vẹ owẹ-ẹ, ko wọ ghẹrẹ, ko nene uwe dia kerẹ ọrhorha vẹ ohwo ro nene ohwo dia.

36 Wo jo suẹn emu ro mie we-e, ẹkẹvuọvo djẹ oshọ rẹ Ọghẹnẹ wẹn; rere oniọvo wẹn vwọ sa dia kẹrẹ owẹ

37 Wo momo igho wo de suo kẹ-ẹ, wọ je vwẹ emuọre kẹ rere wọ vwọ mrẹ asan vwo erere-e.

38 Mẹvwẹ Ọrovwohwo Ọghẹnẹ re ovwan, rọ reyọ ovwan vwo nẹ otọ re Ijipt rhe re Me vwẹ otọ ri Kenan kẹ ovwan, re Me rha je dia Ọghẹnẹ rẹ ovwan.

39 Oniọvo wẹn da rhoma re dia oghẹre vwẹ asan re wọ dia rọ da she oma rọye kẹ wẹ, wo jo gan wẹ kerẹ ọviẹn wẹ-ẹn

40 jọ dia kugbe uwe kerẹ ohwo re durhie iruo vẹ ọrhorha ro nene uwe dia. Kọ ga wẹ bẹsiẹ rẹ Orẹ re aghọghọ na vwo te

41 kẹsiẹye o ki nẹ uwevwi wẹn yanran, te ọye te emọ rọye, ki rhivwi kpo unuwevwi rọye, ra ro ughwẹ rẹ esẹ rọye.

42 Kidie ayen ejobi idibo mẹ iruẹ, e re Me reyọ nẹ otọ re Ijipt rhe, asan she ayen kerẹ eviẹ-ẹn

43 Wọ vwẹ obọ ogangan vwo suẹn aye-en, ẹkẹvuọvo wọ Me djẹ oshọ rẹ Ọghẹnẹ wẹn.

44 Ọ da dianẹ we vwo eviẹn rẹ eya eyẹ e re eshare ihwo rẹ ẹgborho efa re yariẹ ovwan phihọ na ke eye ovwan dia da dẹ eviẹn e re eya eyẹ e re eshare.

45 Ovwan je sa dẹ vwẹ ohri rẹ erhorha vẹ ihwo re kua bru ovwan rhe dia na vẹ ekru rayen, re vwiẹri vwẹ otọ rẹ ovwan, kẹ ayen sa dia ekuakua rẹ ovwan.

46 Wọ sa vwẹ ayen ghare uku kẹ emọ wẹn re cha vwe obuko, rọ dia ughwẹ rẹ ayen vwọ riuku bẹdẹ; eyena ọvo we se vwo ru eviẹn ẹkẹvuọvo imoni rẹ ovwan emọ re Izrẹl na, ovwan sa vwẹ obọ ọgangan sun ohwohwo-o.

47 Ọrhorha eye ohwo ro kua bru ovwan rhe re dia de rhi fe vwẹ ohri rẹ ovwan, ọvo vwẹ usun rẹ ovwan na da rha dia ogbere rọ da she oma rọye kẹ ọrhorha na, eyẹ ohwo rẹ orua rẹ ọrhorha na,

48 ọke ra da shẹ nu a sa tan hirhe, ọvo vwe usun rẹ imoni rọye na sa tan,

49 oniọvo rẹ ọsẹ rọye eyẹ ohwo rọ vọye gba ivwrọmọ sa tan hirhe, eyẹ ohwo ọfa rọ ma kẹrẹ vwẹ orua rọye na sa tan hirhe, ọ da dianẹ ọ rhoma rhi fe kọye ọvo re tan oma rọye hirhe.

50 Ko kere ọke rọye nẹ ukpe rẹsosuọ rọ vwọ she oma ke na re te Orẹ rẹ aghọghọ na, ọtiobo rẹ ikpe na bu te ke eriyin ọ hwa osa na kẹ ohwo rọ dẹre na, Ọke ro nene ohwo ro vworo dia na ejobi ke kere phihọ unu rẹ osa ra hwa kẹ ohwo re durhie iruo.

51 O da dianẹ ikpe na ji bu, kọ dia unu rẹ ikpe na rha osa ra hwa phihọ uyovwi na rere ọ vwọ hwa osa rẹ ẹtan hirhe rọye.

52 Ikpe ri chekọ re ki ru orẹ re aghọghọ na rhe bu-u, o mi nene kere ayen, ọtiẹ unu rẹ ikpe ri chekọ re vwo ru iruo kẹ ọga rọye jo vwo na, ke eriyin ọ je rhan ọgbọ na vwọ kẹ.

53 Kirobo ra hwa osa kẹ ohwo re durhie iruo kukpe kukpe ke eriyin ọ vọye dia, we jọ vwe obo ọgangan suo vwẹ irharo rẹ ovwa-an.

54 A rha sa tan hirhe vwẹ idjerhe tiọnana-a, ọke rẹ orẹ rẹ aghọghọ na de te ke siobọ no, te ọye te emọ rọye.

55 Kidie ihwo rẹ Izrẹl na ejobi idibo mẹ re Me reyọ nẹ otọ rẹ Ijipt rhe. Mẹvwẹ Ọrovwohwo Ọghẹnẹ rẹ ovwan na.

Bible in Urhobo © United Bible Societies, 1977.

Bible Society of Nigeria
Lean sinn:



Sanasan