Livitikọs 23 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Orẹ re vwo Mu

¹ Ọrovwohwo na da ta kẹ Mosis nẹ,

² Ta kẹ ihwo rẹ Izrẹl, Oghoghẹre rẹ orẹ rẹ Ọrovwohwo re vwo mu ena, enana orẹ mẹ ri mi vwo mu, keye we ghwoghwo kẹ ọghwẹgbe ọfuanfon na.

³ Ẹdẹ esan e vwo ru iruo; ẹkẹvuọvo ẹdẹ ighwrẹn ọye ẹdidjala re vwo rovwo oma, ẹdẹ ọfuanfon, we ruẹ iruo vwọ-ọ; ọye ẹdidjala rẹ Ọrovwohwo na vwẹ ẹdia rẹ ovwan ejobi.

⁴ Enana keye ọke re orẹ rẹ Ọrovwohwo na, ẹdẹ efuanfon, ru wo che ghwoghwo kẹ ayen vwẹ ọke rọye.

⁵ Vwẹ evun rẹ emeranvwe rẹ ẹsosuọ, vwẹ ovwọnvwọn rẹ ẹdẹ rihwẹne rọye. Ọye ẹdẹ rẹ Ọwanvrẹn rẹ Ọrovwohwo na.

⁶ Ẹdẹ rihwiori re emeranvwe na ọye orẹ rẹ ikara ro jephuo vwọ kẹ Ọrovwohwo na, ẹdẹ ighwrẹn kọye ovwan re ikara ri jephuo.

⁷ Ẹdẹ rẹ ẹsosuọ na ovwan mi vwo ọghwẹgbe ọfuanfon; ovwan rhe ruẹ iruo ọganga-an.

⁸ Ẹkẹvuọvo wẹ mi ze izobo rẹ ẹtorhẹ vwọ ke Ọrovwohwo na ẹdẹ ighwrẹn, Ọ rẹ ẹdẹ ighwrẹn na we mi rhe vwo ọghwẹgbe ọfuanfon, ovwan ji ruọ iruo ọganga-an.

⁹ Ọrovwohwo na da ta kẹ Mosis nẹ,

¹⁰ Ta kẹ ihwo rẹ Izrẹl ne, Ọke re ovwan de rhi te otọ re Me vwọ kẹ ovwan na rẹ ovwan de che vun emu rẹ ovwan kọnre, wa Me reyọ erheghe rẹ emamọ rẹ ẹsosuọ rẹ ovwan kọnre na vwo rhe orherẹn na,

¹¹ Orherẹn na mi kpogho ayen vwẹ obaro rẹ Ọrovwohwo na, rere ovwan vwo fo ẹreyọ vwẹ obaro rẹ Ọrovwohwo na; Vwẹ irhiọke rivẹ rọye rẹ ẹdidjala da wan nu, Orherẹn na Me rha vwariẹn kpogho.

¹² Nighe ẹdẹ rẹ ovwan kpogho ayen na, wa Me vwẹ omogodẹ ọshare ro vwo oka-a rẹ ẹgbukpe ọvo vwo ze izobo rẹ ẹtorhẹ vwọ kẹ Ọrovwohwo na

¹³ Kugbe izobo rẹ ọka ra cha vwọ ba na ra nabọ vwẹ ẹkẹn ivẹ rẹ iputusẹ rẹ ọka ra nabọ no ra vwe evwri gua, ke vwo ze izobo re erhanre kẹ Ọrovwohwo, ro gbo ọnrhe oraoro; izobo rẹ udi na ra vwọ ba na dia wain, ẹkẹn ẹne re ukoko

¹⁴ Bẹsiẹ rẹ ẹdẹ yena vwo te ovwan rha ria ikara eye eka ra kakare-e, bẹsiẹ re ovwan vwọ reyọ izobo re Ọrovwohwo vwọ rhe: Ọnana urhi rẹ ovwan yọnre vwe edia rẹ ovwan bẹdẹ ne edje ra ro edje.

¹⁵ Siẹ re de ru ẹdidjala nu, ovwan mi kere ọsoso rẹ ẹdidjala ighwrẹn we muo phihọ nẹ ẹdẹ re ovwan vwo ze izobo re emu re kpogho kẹ Ọrovwohwo na,

¹⁶ Ovwan mi kere ẹdẹ ujuvẹ gbe ihwe re te achuẹ ẹdidjala rẹ ighwrẹn na nu, kẹsiẹye ovwan ke reyọ izobo re ọka re orhọ vwo ke Ọrovwohwo na.

¹⁷ Ovwan Me reyọ ne edia re ovwan rhe ikara ivivẹ re che kpogho, ra vwẹ ẹbẹre ivẹ rẹ ovwanvwọn ihwe vwo ru, ọ Me nabọ dia omamọ rẹ usi rẹ ọka e vwo ruo, a Me kakọ kugbe lẹvin, rere o vwo dia emamọ re ẹsosuọ ke Ọrovwohwo na

¹⁸ Ovwan Me rha vwẹ imigodẹ ighwrẹn re ẹgbukpe ọvo ri vwo oka-a ba ikara na, kugbe upene re erhuẹn ọshare, kugbe egbo ivẹ; ke ayen dia izobo ra torhẹre kẹ Ọrovwohwo na, enana kugbe izobo rẹ ọka na vẹ izobo rẹ udi, keye a vwẹ erhanre torhẹ rere i vwo gbo ọnrhen ororo kẹ Ọrovwohwo na

¹⁹ Wa Me rha vwẹ okri ọvo ze izobo fiki rẹ izobo rẹ umwemwu, kugbe imigodẹ re eshare ivẹ rẹ ẹgbukpe ọvo vwo ze izobo rẹ ufuoma.

²⁰ Orherẹn na mi kpogho ayen kugbe ikara rẹ emamọ re ẹsosuọ na vwo ze izobo re kpogho kẹ Ọrovwohwo na, kugbe imigodẹ ivẹ na; ke ayen dia fuanfon kẹ Ọrovwohwo na vwẹ obọ re Orherẹn na.

²¹ We mi ghwoghwo urhi vwẹ ẹdẹ re ovwan che vwo ọghwẹgbe ọfuanfon na, ovwan rhe ruẹ iruo ọganga-an Ọnana urhi vwọ kẹ ovwan vwe ejobi vwẹ edia re ovwan ejobi ne edje ra ro edje.

²² Ovwan de che vuẹn orhọ rẹ otọ rẹ ovwan, ovwan vuẹn te orhogba-a, ovwan ji gbo ugbo rẹ orhọ na-a, ovwan mi ji ayen vwo vwọ kẹ igbere na vẹ erhorha: Mẹvwẹ Ọrovwohwo Ọghẹnẹ re ovwan.

²³ Ọrovwohwo da ta kẹ Mosis nẹ,

²⁴ Ta kẹ ihwo re Izrẹl, Vwẹ emeranvwe righwrẹ, vwẹ ẹdẹ rẹsosuọ rọye na, we mi vwo ẹdẹ rẹ omaerovwo ofuefu, ẹkarophihọ ra vwẹ egban ghwoghwo, ọghwẹgbe ọfuanfon na

²⁵ Ovwan rhe ruẹ iruo ọgangan vwo ẹdẹ yena-a, we mi ze izobo ra torhẹre ke Ọrovwohwo na.

²⁶ Ọrovwohwo na da rha ta kẹ Mosis nẹ,

²⁷ Ẹdẹ rihwe vwẹ emeranvwe rẹ ighwrẹn na ọye ẹdẹ ra vwọ gọ ẹgua, ẹdẹ yena kọ dia ẹdẹ rẹ ọghwẹgbe ọfuanfon vwọ kẹ ovwan, ovwan ke vwẹ oja re oma rẹ ovwan we mi rhe ze izobo rẹ ẹtorhẹ kẹ Ọrovwohwo na.

²⁸ Vwe evun rẹ ẹdẹ yena ovwan rhe ruẹ iruo-o; kidie ọye ẹdẹ ra vwọ gọ ẹgua, ra vwọ gọ ẹgua nẹ ovwan oma vwẹ obaro rẹ Ọrovwohwo Ọghẹnẹ rẹ ovwan.

²⁹ Ohwo rọ rha vwẹ oja re oma rọye vwẹ ẹdẹ nana-a ke sio nẹ ohri re ihwo rọye.

³⁰ Ohwo ro rhe ru iruo vwẹ ẹdẹ nana, ohwo yena ke Me ghwọrọ nẹ ohri rẹ ihwo rọye.

³¹ Ovwan ruẹ iruo vuọvo-o, Ọnana urhi vwọ kẹ ovwan bẹdẹ vwẹ ẹdia re ovwan ejobi

³² Ẹdẹ na kọ dia ẹdidjala rẹ urovwoma vẹ udindin vwọ ke ovwan, ovwan Me vwẹ oja re oma rẹ ovwan ovwọnvwọn rẹ ẹdẹ rirhiri re emeranvwe na kọye ovwan vwo muo phihọ ẹyọnrọn, nẹ ovwọnvwọn re te ovwọnvwọn ọfa kọye ovwan yọnre ẹdidjala rẹ ovwan na.

³³ Ọrovwohwo na da ta kẹ Mosis nẹ,

³⁴ Ta kẹ ihwo re Izrẹl, Ẹdẹ ihwiori re emeranvwe righwrẹ nana, ẹdẹ ighwrẹ ọye ovwan re orẹ rẹ egarivi kẹ Ọrovwohwo na.

³⁵ Ẹdẹ re ẹsosuọ ovwan mi vwo ọghwẹgbe ọfuanfọn, ovwan ruẹ iruo oganga-an.

³⁶ Ẹdẹ ighwrẹ ọye ovwan vwo ze izobo ra torhẹre kẹ Ọrovwohwo na; ẹdẹ rẹ ẹrenre we mi rhe vwo ọghwẹgbe ọ fuanfon we mi ze izobo ra torhẹre kẹ Ọrovwohwo na, Ọnana ọghwẹgbe vẹ udindin; ovwan ruẹ iruo ọgangan vwọ-ọ

³⁷ Enana eye oghẹre rẹ Orẹ rẹ Ọrovwohwo na vwo mu, nẹ eghwoghwo ayen vwẹ ọke rẹ ọghwẹgbe ọfuanfon, ra vwọ reyọ izobo rẹ erhanre rhe Ọrovwohwo na, izobo rẹ ẹtorhẹ kugbe izobo rẹ ọka, izobo kugbe izobo rẹ udi, ọvuọvo vwe omamọ ẹdẹ rọye;

³⁸ vwọ ba ẹdidjala rẹ Ọrovwohwo na, je vwọ ba ọke rẹ ovwan, je vwọ ba ẹkpẹvwẹ rẹ ive re veri kẹ Ọghẹnẹ kugbe ẹkpẹvwẹ ro nẹ udu rhe ru we vwo rhe Ọrovwohwo na ejobi.

³⁹ Vwẹ ẹdẹ ihwiori re emeranvwe righwrẹn na, rẹ ovwan de vun orhọ re odju rẹ ovwan koko nu, ovwan Me re orẹ Ọrovwohwo na ẹdẹ ighwrẹn; ẹdẹ rẹ ẹsosuọ na ọye ẹdẹ rẹ urovwoma re udindin, ẹdẹ rẹ ẹrenren na Me rha dia ẹdẹ rẹ urovwoma vẹ udindin

⁴⁰ Ẹdẹ re ẹsosuọ na wa Me reyọ emamọ re irhe ri yovwiri, kugbe ewanvwe rẹ iriẹ, ve eghọn rẹ irhe ri vwo ẹbe buebu, kugbe irhe rẹ asan rẹ ame epha, ovwan Me ghọghọ kẹ Ọrovwohwo Ọghẹnẹ rẹ ovwan ẹdẹ ighwrẹn gbagba.

⁴¹ Ovwan ke re orẹ nana kẹ Ọrovwohwo na ẹdẹ ighwrẹn vwẹ evun rẹ ẹgbukpe; Ọnana urhi vwọ kẹ ovwan bẹdẹ ne edje ra ro edje; emeranvwe righwrẹn ọye ovwan vwo ruo.

⁴² Itughẹ keye ovwan dia ẹdẹ ighwrẹn gba; ohwo kohwo rọ dia ọmotọ rẹ Izrẹl ejobi kọ dia evun rẹ utughẹ,

⁴³ rere uvwiẹ rẹ ovwan ejobi vwọ riẹn nẹ mi ru ihwo rẹ Izrẹl ejobi dia evun rẹ itughẹ vwẹ ọke re Me vwọ reyọ ayen nẹ otọ re Ijipt rhe: Mẹvwẹ Ọrovwohwo Ọghẹnẹ re ovwan.

⁴⁴ Ke eriyin Mosis vwo dje oghoghẹre rẹ orẹ rẹ Ọrovwohwo na vwọ kẹ ihwo rẹ Izrẹl.