Livitikọs 19 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Urhi rẹ Ẹfuọn kugbe Ọsoso

¹ Ọrovwohwo na da ta kẹ Mosis nẹ,

² Ta kẹ ukoko rẹ ihwo rẹ Izrẹl ejobi, Ovwan dia fuanfon kidie Mẹvwẹ Ọrovwohwo rẹ Ọghẹnẹ rẹ ovwan na pha fuanfon.

³ Ovwan ejobi mu ọghọ kẹ Ọsẹ vẹ oni rẹ ovwan re wa yọnrọn urhi rẹ ẹdidjala mẹ na. Mẹvwẹ Ọrovwohwo rẹ Ọghẹnẹ rẹ ovwan.

⁴ Ovwan rhe hirhe bru ẹdjọ-ọ eyẹ ovwan je kare ẹdjọ kẹ oma rẹ ovwa-an: Mẹvwẹ Ọrovwohwo Ọghẹnẹ rẹ ovwan.

⁵ Ọke ru we de ze izobo rẹ ufuoma vwọ kẹ Ọrovwohwo, we mi ze vwẹ idjerhe ra vwọ reyọ ovwan.

⁶ Ẹdẹdẹ re ze izobo na kọye a vwọ riọ nu, eyẹ ọkirhieri rọye, uche ri chekọ re te ẹdẹ rerha ejobi ka torhẹ kufia.

⁷ Ọ da dianẹ a rerọ vwẹ ẹdẹ rerha na, ye e gbe ẹgua; a rha reyọ-ọ,

⁸ ohwo rọ rerọ na kọye ọvo ghwa orukuruku rọye, kidie ọ vwẹ ẹgua mu emu ọfuanfon rẹ Ọrovwohwo na; ohwo yena ke bro nẹ ohri rẹ ihwo rọye.

⁹ Ọke we de che vun emu rẹ orho rẹ aghwa rẹ ovwan, ovwan rhe vuẹn te orhogba rẹ udju na-a, ovwan de ji vun nu ovwan rhe rhivwi yanran re gbugbo vwọ-ọ.

¹⁰ Ovwan rha je hiẹn ọgbọ ri vain rẹ ovwan muotọ-ọ, ovwan je tọrọ otiẹ ri she teye otọ rẹ udju rẹ ovwa-an; ovwan Me yan jẹn ayen vwọ kẹ otu rigbere vẹ erhorha; Mẹvwẹ Ọrovwohwo Ọghẹnẹ rẹ ovwan.

¹¹ We cho uji-i, ovwan je phiẹn ohwo-o, ovwan vwọrọ efian kohwo ohwo-o

¹² Ovwan vwẹ odẹ mẹ duvwu iyori rẹ efia-an, re e vwo miovwo odẹ rẹ Ọghẹnẹ re ovwa-an. Mẹvwẹ Ọrovwohwo na.

¹³ Ovwan shenyẹ ọrivẹ rẹ ovwa-an eyẹ wo cho-o. E jẹn osa rẹ ohwo rẹ ovwan durhie iruo dia ovwan obọ re te urhiọke-e.

¹⁴ Ovwan harha odierhọ-ọ, ovwan she urhe gbere idjerhe rẹ Orhuẹro-o, ẹkẹvuọvo ovwan Me djẹ oshọ rẹ Ọghẹnẹ rẹ ovwan. Mẹvwẹ Ọrovwohwo na.

¹⁵ Ovwan bru orhiẹn rẹ eku vwẹ ẹdjọeguo rẹ ovwa-an; We phi oma phihọ ẹbẹre ọvo kẹ igbere na-a eyẹ kẹ ẹguọnọ rẹ ihwo ride eruo-o, ẹkẹvuọvo ovwan vwẹ evun esiri guẹdjọ re irivẹ re ovwan.

¹⁶ Wọ rha dia oguguegu vwẹ ohri rẹ ihwo wẹ-ẹn, wo ji mudia kẹ ehwe rẹ arhọ rẹ ọrivẹ wẹ-ẹn. Mẹvwẹ Ọrovwohwo na.

¹⁷ Wo tuoma rẹ omoni wẹn vwẹ udu wẹ-ẹn, ẹkẹvuọvo wa vẹ ọrivẹ rẹ ovwan jẹ iroro kugbe, o rha dia ọtiọye-e ku wo che ru umwemwu fiki rọye.

¹⁸ Wa reihri-i eyẹ we phi ota rẹ emọ rẹ ihwo rẹ owwan phihọ evu-un, ẹkẹvuọvo ovwan guọnọ erivẹ rẹ ovwan kere omaobọ rẹ ovwan. Mẹvwẹ Ọrovwohwo na.

¹⁹ Ovwan Me yọnrọn irhi Me. Ovwan jẹn oghẹre rẹ eranvwe ọfa gba eranvwe rẹ ovwa-an; ovwan je vwẹ oghẹre rẹ ekankọn ivẹ hworo udju rẹ ovwa-an, ovwan je ghwa ewun rẹ umugini-i.

²⁰ Ọshare de re nene ọviẹn rẹ aye vwerhẹ, ọ da dianẹ a san ọviẹn na phihọ otọ jovwo ra je tan hirhe ne ọviẹn na-a, ka nabọ guọnọ otọ rọye. Fikirobo rẹ aye na vwọ dia ọviẹn na, e rhe hwe aye-en;

²¹ ẹkẹvuọvo ọshare na ko ze izobo rẹ umwemwu kẹ Ọrovwohwo na vwẹ unurhoro rẹ utughẹ ra da vwa oma na, ọ Me vwẹ egbo vwo ze izobo ri umwemwu kẹ oma rọye.

²² Orherẹn na Me vwẹ egbo na ze vwọ gọ ẹgua no oma vwẹ obaro rẹ Ọrovwohwo fiki rẹ umwemwu ro ruru na, kẹsiẹye a ke vwẹ umwemwu ro ruru na vwo ghovwo.

²³ Ovwan de rhi te otọ na re ovwan da rhe kọn eghẹre rẹ irhe ra ria ejobi nu, ke ovwan gha emamọ re irhe na ejobi; ikpe erha kọye ovwan cha gha ayen, ovwan ria aye-en.

²⁴ Ukpe rẹ ẹne emamọ na ejobi ke dia efuanfon, ẹkpẹvwẹ rẹ ejiro vwọ kẹ Ọrovwohwo na.

²⁵ Ẹkẹvuọvo ukpe rẹ iyori de te re kẹ ovwan rẹ emamọ rẹ irhe na, kẹ ayen cha mọ buebu kẹ ovwan: Mẹvwẹ Ọrovwohwo Ọghẹnẹ rẹ ovwan.

²⁶ Ovwan rha cha re eranvwe rẹ ọbara evun rọye-e. Ovwan rhe yono epha ẹbọ-ọ eyẹ orhan ẹvwarọ-ọ.

²⁷ Ovwan hroro uyovwi rẹ ovwan muotọ-ọ, ovwan je wanra ẹtoegba rẹ ovwa-an.

²⁸ Ovwan bru ibrebru ọvuọvo phihọ oma rẹ ovwa-an, fiki rẹ ohwo ro ghwruru-u eyẹ we si iwu phihọ oma rẹ ovwa-an: Mẹvwẹ Ọrovwohwo na.

²⁹ Wo miovwo ọmọtẹ wẹn re ọ vwọ dia igberadja-a. Otọ na da rha vọn vẹ igberadja vẹ orukuruku.

³⁰ Ovwan yọnrọn ẹdidjala na rere ovwan mu ọghọ kẹ ẹshẹ mẹ na. Mẹvwẹ Ọrovwohwo na.

³¹ We rhivwi bru otu re eboepha-a, eyẹ erieda-a; wọ guọnọ ayen phia-a, ayen de gbe we ẹgua: Mẹvwẹ Ọrovwohwo Ọghẹnẹ wẹn.

³² Ovwan mi vrẹn mudia kẹ ohwo rẹ uyovwi rọye fonro, rere we mu ọghọ kẹ opharo rẹ ọmọmare, wọ Me rha djẹ oshọ rẹ Ọghẹnẹ wẹn: Mẹvwẹ Ọrovwohwo na.

³³ Ọrhorha da kua bru we rhe otọ wẹn, wo ruo emu omiomiovwi-i.

³⁴ Ọrhorha rọ kua bru we rhe kọ dia kerẹ ọmotọ vwẹ obaro wẹn, wọ Me guọnọ kirobo wọ guọnọ oma wẹn; kidie ovwan je dia erhorha vwẹ otọ rẹ Ijipt. Mẹvwẹ Ọrovwohwo rẹ Ọghẹnẹ wẹn .

³⁵ We ru oruchọ vwẹ ẹdjọeguo-o, vwẹ ovwanvwọn rẹ ugrogro eyẹ ọhọhọhọ eyẹ ebuo.

³⁶ Ovwan vwo ovwanvwọn rẹ ọsoso, ovwanvwọn rẹ ẹhọhọ, iputusẹ rẹ oze, kugbe ovwanvwọn rẹ ukoko. Mẹvwẹ Ọrovwohwo rẹ Ọghẹnẹ wẹn, rọ reyọ wẹ nẹ otọ rẹ Ijipt rhe.

³⁷ Ovwan Me nabọ yọnrọn irhi mẹ ejobi vẹ iji mẹ re we ru ayen. Mẹvwẹ Ọrovwohwo na.