Livitikọs 18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Gha Igberadja

¹ Kọye Ọrovwohwo da ta kẹ Mosis nẹ,

² Ta kẹ ukoko rẹ ihwo ri Izrẹl nẹ, Mẹvwẹ Ọrovwohwo Ọghẹnẹ rẹ ovwan.

³ Ovwan rhe ruẹ kirobo rayen ruẹ vwẹ otọ rẹ Ijipti-i, rẹ ovwan diare jovwo na, ovwan rhe ji ruẹ kirobo rayen ruẹ vwẹ otọ ri Kena-an, asan re Me vwẹ ovwan ra na. Ovwan rha yan nene iji raye-en.

⁴ Ovwan ru obo ri mi vwo ji urhi rere ovwan yọnre iji mẹ rere ovwan yan vwẹ evun rayen. Mẹvwẹ Ọrovwohwo Ọghẹnẹ rẹ ovwan.

⁵ Vwẹ ọtiọye na ovwan gba yọnre irhi mẹ vẹ iji mẹ, e re vwẹ arhọ kẹ ohwo rọ yọnrọn ayen ejobi. Mẹvwẹ Ọrovwohwo na.

⁶ E jẹn ohwo ọvuọvo vwẹ ohri rẹ ovwan na mrẹ ẹban rẹ omoni rọye-e. Mẹvwẹ Ọrovwohwo na.

⁷ Wọ ban Ọsẹ wẹn phihọ-ọ kọye ẹban rẹ oni wẹn kidie ọye oni wẹn, wọ sa mrẹ ẹban rọye phiephie-e.

⁸ Wọ ra mrẹ ẹban rẹ aye rẹ Ọsẹ wẹ-ẹn; kidie ọye ẹban rẹ ọsẹ wẹn.

⁹ Wọ mrẹ ẹban rẹ oniọvo rẹ ọmọtẹ wẹ-ẹn, Ọmọtẹ rẹ ọsẹ wẹn eyẹ ọmọtẹ rẹ oni wẹn, re vwiẹri vwẹ uwevwi eyẹ ọ re vwiẹri vwẹ isiorho

¹⁰ Wọ mrẹ ẹban rẹ ovwrọmọ rẹ ọmọshare wẹn eyẹ ovwrọmọ rẹ ọmọtẹ wẹ-ẹn, kidie ẹban rayen yẹ ẹban wẹn.

¹¹ Wọ mrẹ ẹban rẹ ọmọsẹ wẹn rẹ ọmọtẹ-ẹ, ọ rẹ Ọsẹ wẹn vwiẹri, kidie ọmọsẹ wẹn o ruẹ.

¹² Wọ mrẹ ẹban rẹ oniọvo rẹ ọmọtẹ rẹ ọsẹ wẹ-ẹn, kidie ọ vẹ ọsẹ wẹn oniọvo.

¹³ Wọ mrẹ ẹban rẹ oniọvo rẹ ọmọtẹ rẹ oni wẹ-ẹn, kidie oniọvo rẹ oni wẹn o ruẹ.

¹⁴ Wọ mrẹ ẹban rẹ oniọvo rẹ ọshare rẹ ọsẹ wẹ-ẹn, kọye a vwe rọ ta nẹ, wo bru aye rọye-e; aye na kọ dia oniọvo rẹ ọsẹ wẹn vwọ kẹ wẹ.

¹⁵ Wọ mrẹ ẹban rẹ aye rẹ ọmọ wẹ-ẹn; rọ vwọ dia aye rẹ ọmọ wẹn na wọ rha mrẹ ẹban rọye-e.

¹⁶ Wọ mrẹ ẹban rẹ aye rẹ oniọvo wẹ-ẹn; ọye ẹban rẹ oniọvo wẹn.

¹⁷ Wọ mrẹ ẹban rẹ aye nẹ wọ rha je mrẹ ẹban rẹ ọmọtẹ rọye-e, wọ je reyọ ọmọtẹ rẹ ọmọshare rọye eyẹ ọmọtẹ rẹ ọmọtẹ rọye-e, kidie ayen hirhe phihọ imoni rẹ emetẹ wẹn nure; ọye umwemwu.

¹⁸ Wọ rọvwọ iniọvo ivẹ-ẹ re wọ vẹ ọye rọvwọ yẹ iniọvo rọye na je akpọ.

¹⁹ Ovwan bru aye rọ dia afe re we nene vwerhẹ-ẹ.

²⁰ We ji nene aye rẹ ọrivẹ rẹ ovwan vwerhẹ re we gbe ẹgua-a.

²¹ Ovwan siobọ nẹ emọ ovwan rere a torhẹ ayen ki Moleki-i, e de rhe miovwo odẹ rẹ Ọghẹnẹ rẹ ovwan: Mẹvwẹ Ọrovwohwo na.

²² We nene ọshare vwerhe kerẹsiẹ re de nene aye vwẹrhẹ-ẹ, ọye ẹgua.

²³ E jẹn ohwo du eranvwe rere o gbe oma rọye ẹgua-a, aye rha je vwẹ oma kẹ eranvwe duẹ-ẹ ọyena umwemwu ra vwọ rhẹriẹ erhuvwu phihọ umiovwo.

²⁴ Ovwan gbe ẹgua vwẹ imu nana ejobi-i, fikiridie irere re Me guọghọ vwẹ irharo rẹ ovwan na, imu nana ayen vwo gbe ẹgua vwẹ oma rayen,

²⁵ kọye otọ na de rhi gbe ẹgua, kọye mi vwo ruo gangan fiki rẹ orukuruku rọye, otọ na da kpa ihwo rọye kufia.

²⁶ Ẹkẹvuọvo ovwan gba yọnre irhi mẹ vẹ iji mẹ, rere ovwan vwo jẹ ẹgua ọtiọnana eruo, te ovwan te erhorha ri nene ovwan dia ejobi

²⁷ (kidie ihwo re dia otọ na jovwo ẹgua etiọnana ayen ruru, kọye otọ na vwo gbe ẹgua);

²⁸ rere otọ na vwo jẹ ovwan e geri kufia, rẹ ovwan de gbe ẹgua, kirobo ro geri ihwo re ka dia jovwo kufia na.

²⁹ Ohwo kohwo ro ru ọvo vwẹ ẹgua nana ejobi na, ihwo etiọye na ke hwe ayen vwo nẹ otu rẹ ihwo rayen.

³⁰ Vwẹ ọtiọye ovwan gba yọnrọn iji mẹ na rere ovwan vwo jẹ imu nana eruo e re ruẹ jovwo tavwe rẹ ovwan ke rhe na, rere ovwan vwo jẹ ẹgua e gbe vwẹ oma rayen ejobi. Mẹvwẹ Ọrovwohwo Ọghẹnẹ rẹ ovwan.