Livitikọs 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹgha rẹ Oti

¹ Ọrovwohwo da ta kẹ Mosis vẹ Erọn,

² Ọke rẹ ohọroma rẹ ohwo da vwọ eyẹ kẹ okorhieri eyẹrẹ o vwo oka, re ọna de hirhe phihọ emiavwe rẹ oti vwẹ oma rọye, ka vwẹ ohwo yena rhe Erọn orherẹn na eyẹ ọvo vwẹ emọ rẹ Erọn rẹ irherẹn na,

³ Orherẹn na Me nabọ ni asan na sẹ ẹto rọye hirhe phihọ ọfuanfon, o mi ji no sẹ Etiyin rẹ oma na vwo ọkpan nọ ohọroma ro chekọ, ọ da dia ọtiọye yẹ emiavwe rẹ oti, rẹ orherẹn na da mrẹ ọtiọye nure ko ghwoghwo odẹ rọye nẹ ohwo ro jẹfuọn.

⁴ Ẹkẹvuọvo oka na rọ hẹ oma rọye na da fon, rọ gbi rhe vwo ọkpan nẹ ohọroma ro chekọ-ọ, ẹto rẹ asan na rha rhẹriẹ phihọ efuanfo-on, Orherẹn na mi huhu ẹchẹ gbe ohwo na ẹdẹ ighwrẹn;

⁵ ẹdẹ rẹ ighwrẹn na orherẹn na kọ rhoma ni ohwo na oma, ọ da mrẹ nẹ oka na havwe phihọ ro gbe rho vrẹn etiọye-e, Orherẹn na mi ji huhu ẹchẹ gbe ohwo na ẹdẹ ighwrẹn ọfa;

⁶ Orherẹn na mi rhe ji no vwẹ ẹdẹ rẹ ighwrẹn na, ọ da mrẹ nẹ oka na iro biẹ rọ rha rho phihọ-ọ, Orherẹn na ko ghwoghwo odẹ rọye nẹ ohwo na vwo oma ọkpokpokpọ, ye asa na de ghwiẹ ghevweghe; ohwo na kọ fọnrhẹn emwa rọye, kọ fon.

⁷ Ẹkẹvuọvo asan rọ ghwiẹre na da rha hẹre phihọ, rẹ orherẹn na vwo ruo fon nu na, ko rhivwi ra vwẹ oma phia kẹ orherẹn na,

⁸ Orherẹn na Me rhoma no, o de ghine mrẹ nẹ asan na hẹre phihọ, orherẹn na ko ghwe ghwoghwo odẹ rọye nẹ ohwo rọ mwa ọga; nẹ emiavwe na oti.

⁹ O da dianẹ emiavwe rẹ oti mu ohwo, a Me reyọ ohwo na vwo rhe orherẹn na,

¹⁰ orherẹn na kọ nabọ ni ohwo na oma, ọ da mrẹ oka rẹ ohọroma rọ vwọre ro pha fuanfon, rọ nẹrhẹ ẹto rẹ asan na hirhe phihọ ọfuanfon, ohọroma rọ vwọre na de rhe bru ora ọkpokpọ,

¹¹ yẹ ọye emiavwe rẹ oti ọ hẹ oma rẹ ohwo na krire, orherẹn na ko ghwoghwo odẹ rọye nẹ ohwo rọ mwa ọga, ọ rha laghoma huhu ẹchẹ gbe ohwo na-a, kidie ọ mwa ọga.

¹² Ọ da rha dianẹ oti na varhe vwẹ ohọroma rẹ ohwo na, ra da mrẹ ipe rẹ oti na vwẹ asan kasan vwẹ oma rọye te awọ te uyovwi ejobi, asan rẹ orherẹn na sa mrẹ te ejobi,

¹³ orherẹn na Me je nabọ ni oma rẹ ohwo na oti na da vọn oma rọye ejobi, orherẹn na mi ghwoghwo nẹ, emiavwe na kpori, ejobi hirhe phihọ ọfuanfon, ohwo na kẹ ohwo ọfuanfon.

¹⁴ Ẹkẹvuọvo siẹ rẹ ohọroma ọkpokpọ da rhe phia vwẹ oma rọye re, kẹsiẹna ọ ke dia ijẹfuọn.

¹⁵ Orherẹn na Me rha vwariẹ ohọroma ọkpokpọ na ni, o mi ghwoghwo odẹ rọye nẹ ọ mwa ọga, ohọroma ọkpokpọ yena ọ rẹ oga, fikiridie oti.

¹⁶ Ẹkẹvuọvo ohọroma ọkpokpọ na da rhẹriẹ oma phihọ ọfuanfon, ohwo na ko bru orherẹn na rhe,

¹⁷ orherẹn na Me nabọ ni oma rọye, emiavwe na de ghine rhẹriẹ ro ọfuanfon, orherẹn na ko ghwoghwo ohwo rọ mwa emiavwe na ọfuanfon, yẹ ọ fon nure.

¹⁸ Ọ da dianẹ ohwo vwo oka rẹ urubẹn ro kpo nure vwẹ ohọrọ ma rọye,

¹⁹ asan rọ vwọre na da vwọ kpenu yẹ ọ pha fuanfon eyẹrẹ oka ọvwavware fuanfon da herọ, e mi ghwe dje phia kẹ orherẹn na,

²⁰ orherẹn na Me nabọ no tavwe, asan na de vwo ọkpan nẹ ohọroma ro chekọ ẹto rọye da hirhe phihọ ọfuanfon, orherẹn na ko ghwoghwo nẹ ohwo na mwa; ọyena emiavwe rẹ oti, ọ vwẹ oma phia vwẹ idjerhe rẹ urubẹn.

²¹ Ẹkẹvuọvo orherẹn na de no nu, ẹto rẹ ohọroma na rha fo-on o rhe ji vwo ọkpan nọ oma ro chekọ-ọ ẹkẹvuọvo o de dino phoro, orherẹn na mi huhu ẹchẹ gbe ohwo na ẹdẹ ighwrẹn;

²² Upe na da rhoma rho phihọ, orherẹn na ko ghwoghwo nẹ ọ mwa ọga, ye emiavwe Etiyin.

²³ Ẹkẹvuọvo upe na rha rho phihọ-ọ ọ da hẹ abavo, yẹ upe rẹ urubẹn diodi; orherẹn na ko ghwoghwo odẹ rẹ ohwo na nẹ oma rọye ọkpokpọ.

²⁴ Eyẹrẹ ọ da dianẹ ohwo torhẹ oma asan rọ torhẹre na de vwo oka, rọ vwara yẹ ọfuan eyẹ oka ọfuanfon,

²⁵ orherẹn na Me nabọ no tavwe, ẹto rẹ asan na de hirhe phihọ ọfuanfon o ki ji vwo ọkpan nọ ohọroma ro chekọ, yẹ oti; ọ vwẹ oma phia vwẹ asan rọ torhẹre na, orherẹn na ko ghwoghwo nẹ ọ mwa ọga; emiavwe na oti.

²⁶ Ẹkẹvuọvo orherẹn na de no nu, ẹto rẹ asan na rha fo-on o rhe ji vwo ọkpan nọ ohọroma ro chekọ-ọ, ẹkẹvuọvo o de dino phoro, orherẹn na mi huhu ẹchẹ gbe ẹdẹ ighwrẹ,

²⁷ orherẹn na kọ rhoma no vwẹ ẹdẹ righwrẹ na; asan na da rhoma rho phihọ, orherẹn na ko ghwe ghwoghwo odẹ rọye nẹ ọ mwa ọga, yẹ emiavwe rẹ oti.

²⁸ Ẹkẹvuọvo oka na da hẹ abavo rọ rha rho phihọ-ọ, o de dino phoro yẹ asan na vwọre fiki rẹ ẹtorhẹ na, orherẹn na ko ghwoghwo nẹ oma rẹ ohwo na ọkpokpọ; kidie oka rọ hẹ oma rọye na oka rẹ asan rọ torhẹre.

²⁹ Ọ da dianẹ ọshare eyẹ aye vwo emiavwe vwẹ uyovwi eyẹ agbotọ,

³⁰ orherẹn na Me nabọ ni emiavwe na, asan na de vwo ọkpan wan ohọroma ro chekọ, ẹto rẹ asan na da họhọ odo phiẹphiẹphiẹ, orherẹn na ko ghwoghwo nẹ ohwo na mwa ọga; ọye ekpọmọsẹ, oti rẹ uyovwi eyẹ agbotọ.

³¹ Orherẹn na de ni ekpọmọsẹ na nu, asan na rhe vwọ ọkpan nọ ohọroma ro chekọ-ọ, ẹto ibiebi rha herọ-ọ, orherẹn na mi huhu ẹchẹ gbe ohwo na ẹdẹ ighwrẹn,

³² vwẹ ẹdẹ righwrẹ na orherẹn na Me rhoma ni ohwo na oma; ekpọmọsẹ na rha rho phihọ-ọ, ẹto rọye rha vware kerẹ odo-o, asan na gbi rhe vwo ọkpan nọ ohọroma ro chekọ-ọ,

³³ ohwo na Me wanre ẹto rọye ẹkẹvuọvo ọ wanre ekpọmọsẹ na-a; orherẹn na Me rhoma huhu ẹchẹ gbe ohwo na ẹdẹ ighwrẹn efa;

³⁴ vwẹ ẹdẹ rẹ ighwrẹn na orherẹn na mi rhivwi ni ekpọmọsẹ na, ekpọmọsẹ na rha rho phihọ-ọ ro rhe ji vwo ọkpan nẹ ohọroma ro chekọ-ọ, orherẹn na ko ghwoghwo nẹ oma rọye kpori; ohwo na kọ fọnrhọn emwa rọye yọ fon nure.

³⁵ Ẹkẹvuọvo ekpọmọsẹ na da rhoma rho phihọ re vwo se ohwo na ọfuanfon nure na,

³⁶ Orherẹn na kọ vwariẹ ohwo na ni, ọ da mrẹ nẹ ekpọmọsẹ na ghinẹ rho phihọ, orherẹn na rha laghoma guọnọ nẹ se ẹto na herọ vwara kere odo tavwe-e, ohwo yena yọ mwa ọga.

³⁷ Ẹkẹvuọvo ọ da mrẹ nẹ ekpọmọsẹ na hanvwe phihọ, nẹ ẹto ibiebi djẹ phihọ yẹ ekpọmọsẹ na kpo re, ohwo na yẹ oma rọye kpore, orherẹn na ko ghwoghwo nẹ oma rọye kpori.

³⁸ Ọ da dianẹ ọshare eyẹ aye vwo oka vwẹ ohọroma rọye ọ da dia oka ọfuanfon,

³⁹ Orherẹn na mi no tavwe, eka rẹ oma rọye na da epha fuanfon moriẹ moriẹ, yẹ ohọroma diodi, yẹ ohwo na vẹ oma ọkpokpọ.

⁴⁰ Ọ da dianẹ ẹto rẹ uyovwi rẹ ohwo kpare nu, yẹ ohwo na gbe akpan ẹkẹvuọvo ohwo ọfuanfon o ruẹ.

⁴¹ O da rha dianẹ ẹto rẹ arhare vẹ ẹto rẹ ovie rẹ uyovwi rọye kpare nu, yẹ ohwo na gbe akpan re arhare ẹkẹvuọvo ohwo ọfuanfon o ruẹ.

⁴² Ẹkẹvuọvo uyovwi ro gbe akpan na eyẹ arhare ro gbe akpan na da hẹ asan re emiavwe muru yọ vwara yọ fuan, yẹ oti re guọnọ vwẹ oma phia.

⁴³ Etiyin orherẹn na Me nabọ davwọ ni, asan re emiavwe na epha na vwọre ọ vware yẹ ọfuan vwẹ arhare eye obu uyovwi ro gbe akpan eyẹ arhare ro gbe akpan, ọ da họhọ upe rẹ oti rọ ohọroma diodi,

⁴⁴ yẹ ohwo na ọ mwa oti, yẹ oma rọye ganre-e; orherẹn na mi ghwe ghwoghwo phia ne ọ mwa oga ye emiavwe, na hẹ uyovwi rọye.

⁴⁵ Ohwo rọ mwa oti kọ ghwa erharhe rẹ emwa o mi ru ẹto rẹ uyovwi rọye zubu zubu, Ọ mia vwẹ obọ rhurhu ẹbẹrunu rẹ obenu rọye o mie kperẹ nẹ, Ọhọnvwoti, ọhọnvwoti.

⁴⁶ Ọmwo kọye ọ dia bẹsiẹ rẹ emiavwe rọye vwo kpo, rọ vwọ mwa ọga na, ko sioma nẹ otu ọ Me rha dia ọko rẹ obọ rọye ọ gbe dia evun rẹ erhọn na eyẹ orere na-a.

⁴⁷ A da mrẹ oka re oti vwẹ ewun, owene ọ dia ẹton rẹ ogegede eyẹ ewun rẹ esada,

⁴⁸ ọ rẹ okpan eyẹ amwa re rhuori ọ rẹ esada eyẹ ẹton rẹ ogegede, eyẹ ophiẹn vẹ emu ra vwẹ ophiẹn ru ejobi.

⁴⁹ Oka na da họhọ ọgiọgiọ eyẹ ko dino vwara vwẹ oma rẹ ewun na, re rhuori eyẹ ọ rẹ ophiẹn eyẹ emu ra vwẹ ophiẹn ru ejobi, ye oghẹre rẹ emiavwe re oti ka vwọ nẹ orherẹn.

⁵⁰ Orherẹn na Me nabọ ni emiavwe na, o mi rhurhu ewun na phihọ uwevwi ẹdẹ ighwrẹn;

⁵¹ Ẹdẹ rẹ ighwrẹn o mi rhi no. Ọ da mrẹ nẹ oka na hẹre phihọ vwẹ oma rẹ ewun na, ọ rẹ okpan eyẹ amwa re rhuori eyẹ ọ rẹ ophiẹn, kemu kemu ra vwẹ ophiẹn na ru ejobi, yẹ oghẹre rẹ emiavwe rẹ oti omiomiovwi, ọ rha fo-on

⁵² Ọ Me torhẹ ewun na, owenẹ emiavwe muro owenẹ ẹton rẹ ogegede, eyẹ esada eyẹ okpan eyẹ ophiẹn e vwo ruo, kidie oti yena omiomiovwi, ka vwẹ erhanre torhẹ kufia.

⁵³ Ọ da dianẹ rẹ orherẹn na vwo no nu, re emiavwe na rha hẹre phihọ-ọ, ọ rẹ okpan eyẹ emwa re rhuori eyẹ emu ra vwẹ ophiẹn ru ejobi na,

⁵⁴ orherẹn na kọ tanẹ a fọnrhọn ewun na re emiavwe na epha na, o Me rhoma rhurhu ewun na ẹdẹ ighwrẹn efa;

⁵⁵ Orherẹn na Me rhoma ni emu rẹ emiavwe na muru na ra fọnrhọnre na. Oka re emiavwe na rha rhẹriẹ ophioma-a, dede nẹ oka na rha hẹre phihọ-ọ na, yẹ ijẹfuọn ọ epha, wọ Me torhẹ, owenẹ oka rẹ oti obaro eyẹ obuko rẹ ewun na.

⁵⁶ Ẹkẹvuọvo orherẹn na de no nu, oka rẹ emiavwe na de dino phoro siẹ ra da fọnrhọn ewun na nu, ọ Me bẹrẹ oka na nẹ ewun na eyẹ ophiẹn na eyẹ okpan na eyẹ amwa re rhuori na,

⁵⁷ oka na da rhoma phia vwẹ ewun na, ọ re rhuori eyẹ okpan eye ọ ra vwẹ ophiẹn ru ejobi na, rọ da rho phihọ, wọ Me torhẹ ewun yena re emiavwe na epha na.

⁵⁸ Ẹkẹvuọvo ewun na, okpan eyẹ amwa re rhuori emu ra vwẹ ophiẹn ru ejobi, ọ da dianẹ emiavwe na nuro siẹ ra da fọnrhọn nu a Me rhoma fọnrhọn obọ rivẹ, ko dia fuanfon.

⁵⁹ Ọnana urhi rẹ oti vwẹ ewun ri ẹton rẹ ogegede, yẹrẹ esada, okpan yẹrẹ amwa re rhuori, yẹrẹ emu ra vwẹ ophiẹn ru, ra vwọ riẹn sẹ ọ fonro yẹ ọ fonro-o.