Livitikọs 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Umwemwu ri Nadab kugbe Abihu

¹ Asakiephana Nadab vẹ Abihu, emọ rẹ Erọn ayen ọvuọvo da reyọ ẹphẹnre ayen da wan erhanre phihọ ayen da ghwẹ ugboduma na phihọ, ayen da vwẹ erhanre ro jẹfuọn vwo ze izobo vwẹ obaro rẹ Ọrovwohwo, ọtiẹ oghẹre rọ ta kẹ aye-en.

² Kọye erhanre de nẹ obaro rẹ Ọrovwohwo na rhe ọ da torhẹ ayen, ayen de ghwu vwẹ obaro rẹ Ọrovwohwo.

³ Etiyin Mosis da ta kẹ Erọn nẹ, Ọnana obo rẹ Ọrovwohwo tare, Mi dje oma mẹ phia fuanfon vwẹ ohri rẹ ihwo ri si kẹrẹ ovwẹ, kugbe obaro rẹ ihwo ejobi a da vwẹ urinrin kẹ vwẹ. Erọn de fotovwi gbiẹi.

⁴ Etiyin Mosis de se Mishael kugbe Elzafan emọ rẹ Uzziẹl oniọvo rẹ ọsẹ rẹ Erọn, ọ da ta kẹ ayen nẹ Ovwan si kerẹ obonẹ rere we mu imoni rẹ ovwan nẹ obaro rẹ ẹshẹ na nẹ evun rẹ erhọn na.

⁵ Kọye ayen de si kẹrẹ, ayen da vwẹ ewun rẹ ayen mu ayen nẹ evun rẹ erhọn na, kirobo ri Mosis tare.

Ẹkẹn Ute rẹ Orherẹn kugbe Iruo Rọye

⁶ Mosis da ta kẹ Erọn vẹ Eleazar kugbe Itamar, emọ rọye nẹ, Ovwan ru ẹto rẹ ovwan zubuzubu ovwan je bẹrẹ iwun rẹ ovwa-an ovwan de rhe ghwu, ophu da rhe tua kpahe ukoko na ejobi, ẹkẹvuọvo imoni rẹ ovwan, uwevwi rẹ Izrẹl ejobi sa viẹ fiki rẹ erhanre na rẹ Ọrovwohwo koko phihọ na.

⁷ Wa shariẹ unurhoro rẹ utughẹ ra da vwa oma na-a, ovwan de rhe ghwu; kidie a vwẹ evwri rẹ Ọrovwohwo na ghworo ovwan uyovwi nure. Kọye ayen de ru kirobo ri Mosis tare na.

⁸ Ọrovwohwo ke ta kẹ Erọn nẹ,

⁹ Wọ da udi-i eyẹ udi oganga-an, wọwẹ te emọ wẹn na ejobi, siẹ re ovwan da ro evun re utughẹ ra da vwa oma na, ovwan de rhe ghwu, Ọnana urhi rẹ ovwan yọnre bẹdẹ nẹ edje re te edje.

¹⁰ Ovwan vwo ofẹnẹ kẹ obo re fonro vẹ emu gheghe, kugbe ijẹfuọn vẹ ọfuanfon.

¹¹ Ovwan mi rhe yono kirobo rẹ Ọrovwohwo wan oma ri Mosis ta vwọ kẹ ayen.

¹² Mosis ke ta kẹ Erọn vẹ Eleazar kugbe Itamar emọ rọye ri chekọ, nẹ Ovwan reyọ izobo rẹ ọka ro chekọ vwẹ oma rẹ izobo ra vwẹ erhanre torhẹ kẹ Ọrovwohwo na, re ovwan riọ vwẹ ijiphuo vwẹ orhoma rẹ agbada na, kidie ọ pha fuanfon gangan;

¹³ vwẹ asan rọ fonro ovwan da riọ, kidie ọye ẹkẹn ro te we vẹ emọ wẹn vwẹ oma rẹ Izobo ra vwẹ erhanre torhẹ kẹ Ọrovwohwo na; ọtiọye e ji vwe.

¹⁴ Ẹkẹvuọvo ivie rẹ eranvwe na re djuru na kugbe ekpoghowọ re vwo ze izobo na, kẹ ovwan re ayen vwo asan kasan rọ fonro ejobi, wọwẹ vẹ emọ wẹn kugbe emetẹ wẹn ejobi; kidie a vwẹ enana kẹ wẹ vẹ emọ wẹn vwẹ oma rẹ izobo rẹ ufuoma rẹ ihwo rẹ Izrẹl ejobi.

¹⁵ Ekpoghowọ re vwo ze izobo na kugbe ivie na re djuru na kẹ ayen vwẹ ayen ba izobo rẹ erhanre rẹ ivwri rẹ eranvwe na, re dju ayen vwo ze izobo rẹ edjuo vwẹ obaro rẹ Ọrovwohwo, enana kẹ ewẹn vẹ emọ wẹn bẹdẹ bẹdẹ kirobo rẹ Ọrovwohwo tare.

¹⁶ Kọye Mosis da vwẹ oma te otọ nọ ekpẹn rẹ ẹvwe re vwo ze izobo fiki rẹ izobo rẹ umwemwu na, e vwo ni, a torhẹre nure! Ophu de muo kpahe Eleazar vẹ Itamar, emọ re Erọn ri chekọ nẹ,

¹⁷ Kidie jabọ ovwan rha re izobo rẹ umwemwu na vwẹ asan ẹshẹ na-a, ovwan vughire nẹ emu rọ ma fon oruẹ ra vwọ kẹ ovwan nẹ ovwan ghwa orukuruku rẹ ukoko na ejobi, rere ovwan vwọ gọ ẹgua nẹ ayen oma vwẹ obaro rẹ Ọrovwohwo na?

¹⁸ Nighe, a reyọ ọbara rọye rhe evun rẹ uvun rẹ ẹshẹ na-a Mane evun rẹ ẹshẹ na ovwan a da nọ, kirobo re Me ta kẹ ovwan jovwo.

¹⁹ Erọn da ta kẹ Mosis, nighe, nonẹ na ọye ayen ze izobo rẹ umwemwu rayen kugbe izobo rẹ ẹtorhẹ vwẹ obaro rẹ Ọrovwohwo, ọye emu ọtiọnana da phia kẹ vwẹ na. Ọ dianẹ ke Me re eranvwe re vwo ze izobo fiki rẹ izobo rẹ umwemwu na nonẹ na, ko ji she phihọ vwẹ obaro rẹ Ọrovwohwo?

²⁰ Ri Mosis vwo nyo evun da vọn.