Livitikọs 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Izobo Ẹtorhẹ

¹ Ọrovwohwo de se Mosis, Ọ da ta kẹ nẹ evun rẹ utughẹ ra da vwa oma na rhe nẹ,

² Ta kẹ ihwo rẹ Izrẹl nẹ, Ohwo kohwo vwẹ ohri rẹ ovwan na de vwẹ ẹkpẹvwẹ rhe Ọrovwohwo na, ẹkpẹvwẹ rẹ ovwan Me dia ọ rẹ erhuẹn re sinu ohri rẹ eranvwe tieye rhe eyẹ ọ Me dia ọ rẹ ogodẹ re sinu ohri rẹ eranvwe tieye rhe.

³ Ẹkpẹvwẹ na da dia erhuẹn re che vwo ze izobo rẹ ẹtorhẹ, gbe jọ dia ọ rẹ ọshare ro jẹn ekan evwo; asan unurhoro rẹ utughẹ ra da vwa oma na kọye e de ze izobo na, rere Ọrovwohwo vwọ mrẹ asan reyọ.

⁴ Ohwo na Me ghwẹ obọ rọye kpahe uyovwi rẹ eranvwe ra cha torhẹ na, ka reyọ fiki rọye re a vwọ ghwa imwemwu rọye nu.

⁵ Ko hwe erhuẹn ọshare na vwẹ obaro rẹ Ọrovwohwo na, emeshare re Erọn rẹ irherẹn na ke vwẹ ọbara rọye vwọ nẹ, ayen mi ku ọbara na riariẹ agbada rẹ izobo na ejobi rọ unu rẹ ẹchẹ rẹ utughẹ ra da vwa oma na.

⁶ Ọ Me jẹ ophiẹn rẹ eranvwe na, ọ Me nyavwọ ibribro;

⁷ emọ rẹ Erọn rẹ orherẹn na mi koko erhanre phihọ agbada rẹ izobo na, ayen Me nabọ rhuẹrẹ irhe phihọ erhanre na,

⁸ emọ rẹ Erọn rẹ irherẹn na Me nabọ rhuẹrẹ ibro rẹ eranvwe na, te uyovwi rọye, vẹ ivwri rọye phihọ enu rẹ irhe rẹ erhanre rọ hẹ enu rẹ agbada na,

⁹ ẹkẹvuọvo ivun rọye vẹ awọ rọye ọ Me vwẹ ame hworhẹ ayen Orherẹn na Me torhẹ ayen ejobi tototo vwẹ enu rẹ agbada na, kọye izobo rẹ ẹtorhẹ, izobo rẹ erhanre, ro gbo ọnrhen ororo kẹ Ọrovwohwo na.

¹⁰ Ẹkpẹvwẹ rọye da rha dia ogodẹ kọye e che vwo ze izobo ra torhẹre na, eye ẹvwe dede, kọ je dia ọ rẹ ọshare ro vwo ekan ọvuọvo-o;

¹¹ O mi hwe vwẹ ẹbẹre rẹ obọrhe rẹ agbada re de ze izobo na vwẹ obaro rẹ Ọrovwohwo, emọ rẹ Erọn rẹ irherẹn na ki ku ọbara rọye ku agbada na ejobi riariẹ.

¹² Ọ Me nyavwọ keghekeghe, te uyovwi rọye vẹ ivwri rọye, orherẹn na kọ nabọ rhuẹrẹ ayen phihọ enu rẹ ituerhanre rẹ agbada rẹ izobo na,

¹³ ẹkẹvuọvo a Me vwẹ ame hworhẹ ivun rọye ve awọ rọye. Orherẹn na Me vwẹ ayen ejobi ze izobo, ọ Me torhẹ ejobi tototo vwẹ enu rẹ agbada na, ona izobo rẹ ẹtorhẹ, izobo rẹ erhanre, ro gbo ọnrhen ororo kẹ Ọrovwohwo.

¹⁴ Izobo rọye da rha dia ọ rẹ ephran kọye o che ze kẹ Ọrovwohwo, Ọ Me reyọ erurẹ eyẹ upene rẹ inekuku.

¹⁵ Orherẹn na Me reyọ rhe asan agbada rẹ izobo na ọ Me chahe ohọre rọye bru, ọ Me torhẹ vwẹ enu rẹ agbada na; e mi ku ọbara rọye phihọ akakọ rẹ agbada na,

¹⁶ Ọ mi si ekpo ohọre rọye vẹ iphoro rọye no, ọ Me ghwe ayen phihọ orhoma rẹ agbada na vwẹ obaro ọnre vwẹ asan ra ghwe iwurhie phihọ,

¹⁷ Ọ Me bẹrẹ vwẹ asan ibekpe rọye, ẹkẹvuọvo ọ bẹre vwre-e. Kẹsiẹye orherẹn na ke torhẹ vwe agbada na vwẹ enu rẹ ituerhanre na, Ọnana je he izobo rẹ erhanre ro gbo ọnrhen ororo kẹ Ọrovwohwo.