Kolose 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Inini, ovwan vwẹ omamọ rẹ obọ yọnre eviẹn rẹ ovwan, rere we ru obo ri fori kẹ ayen; ovwan je karohọ nẹ ovwan ji vwo Onini ọvo vwẹ obo odjuvwu.

Uchebro

² Ovwan phi obọ phihọ ẹrhovwo ẹnẹ, rhẹrẹ rere ovwan kpẹvwẹ.

³ Ovwan je nẹ ẹrhovwo kẹ avwanre rhe, rere Ọghẹnẹ vwo rhie ẹchẹ rẹ ota rọye phihọ kẹ avwanre, rere avwanre vwo gbe ikun rẹ igbunu ri Kristi na, ra vwi fiki rọye mu vwe kanre na.

⁴ Rere mi vwo ghwoghwo ota na kirobo rẹ udu mẹ ghare.

⁵ Vwẹ aghwanre nene ihwo rẹ obada yeri we kuẹ ọke fia-a.

⁶ We jẹ ota rẹ ovwan dia dẹndẹn rere ota avwerhe nẹ unu rẹ ovwan rhe, re ovwan riẹn obo rẹ ovwan kpahe ota kẹ ohwohwo.

Uyere rọ ka Oba

⁷ Taekikọs, omoni ọghaghare na, kugbe usun mẹ vwẹ iruo rẹ Ọrovwohwo na, ko che gbe ikun rẹ obo rẹ avwanre yerẹ te ejobi kẹ ovwan.

⁸ Fiki rẹ ọtiọna, mi vwo jo bru ovwan rhe, rere o de gbe ikun na kẹ ovwan nu, udu rẹ ovwan mrasan te otọ.

⁹ Mi ji ji Ọnismọs kugbe, omoni rẹ avwanre ọghaghare rẹ uyota, ọke rha je dia ohwo rẹ ovwan. Ayen ihwo ivẹ na ki che gbe ikun rẹ obo rẹ avwanre yere te vwẹ obonẹ kẹ ovwan.

¹⁰ Aristakọs re me vẹ ọye gba hẹ uwodi na nẹ eyere ovwan, eriyin ji ti Mak, Ọmọ rẹ oniọvo ri Banabas, (mi ji gbe ikun rọye kẹ ovwan jovwo re, ọ da rhe ovwan reyọ),

¹¹ kugbe Jesu re se Jọstọs, o ji yere ovwan. Enana hẹ ihwo ri Ju ri kurhẹriẹ ayen nabo vwẹ oma kpotọ nene uvwe ru iruo rẹ uvie rẹ Ọghẹnẹ na gangan ayen ke rha je dia ivwiroro mẹ.

¹² Epafras, ohwo ọvo vwẹ usun rẹ ovwan na, odibo ri Jesu Kristi nẹ eyere ovwan; kẹdẹ kẹdẹ ọ vwọ nẹ ẹrhovwo kẹ ovwan, rere ovwan se vwo mudia gan vwẹ evun rẹ iruo rẹ Ọghẹnẹ na.

¹³ Kidie mi se se oseri kẹ, vẹ obo rọ wian owian kẹ ovwan te, kugbe ihwo ri Laodisha, kugbe ihwo ri Hirapolis.

¹⁴ Luk rẹ ọbo ọghaghare na, kugbe Dimas nẹ eyere ovwan.

¹⁵ Yere imoni rẹ avwanre ejobi re hẹ obi Laodisha, kugbe Nimfas, kugbe ishọshi rọ hẹ uwevwi rayen.

¹⁶ Ọke re de se ọbe nana kẹ ovwan nu, we je ji se kẹ ishọshi ri Laodisha, rere e rhe ji se ọ rẹ ishoshi ri Laodisha kẹ ovwan.

¹⁷ Ovwan ta kẹ Akipọs, rọ vwẹ ẹro te iruo rẹ Ọrovwohwo sanerọ phihọ na, rere o ru ayen gba.

¹⁸ Ọnana uyere rẹ obọ me, re mẹvwẹ ri Pọl yere ovwan; ovwan karohọ uwodi re me epha. Ẹserọphẹ nene ovwan dia.