Joshua 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọphiẹvwe rẹ ihwo ri Gibeọn

¹ Ọke rẹ ivie na ejobi ri obo ovrẹn ri Jọdan vwe obo orho rẹ igbenu na kugbe e re obo oghwrọrọ na vwẹ obo erhuru ro oma rẹ Abadi Rode na rọ hẹ obi Lebanọn na, ihwo ri Hẹt, ihwo rẹ Amọr, ihwo ri Kenan, ihwo ri Periz, ihwo ri Hiv, kugbe ihwo ri Jebu, vwo nyo ọnana,

² ayen da rhe ghwẹ oma koko vẹ iroro ọvo rhe vwọ họnre Joshua kugbe Izrẹl.

³ Ẹkẹvuọvo ọke rẹ ihwo re dia Gibeọn vwo nyo obo ri Joshua ru kẹ Jeriko vẹ Ai,

⁴ ayen da vwẹ aghwaghwanre ru ona, ayen da yanran re chere emuọre vẹrhe, ayen da yanran ra reyọ erharhe rẹ esiso gba mu ekẹtẹkẹtẹ rayen, kugbe etoto gbegbe, ghweghwu,

⁵ vẹ erharhe rẹ isabato rẹ ayen ku phihọ awọ rayen, vẹ erharhe rẹ emwa, emu rayen cheri ejobi ke eyaya i si itutu ku.

⁶ Ayen de bru Joshua kpo obo erhọn na vwi Gilgal, ayen da ta kẹ vẹ ihwo rẹ Izrẹl. Avwanre nẹ orho oshesheri rhe, vwẹ ọtiọye na gbe nene avwanre re ọphọ.

⁷ Ẹkẹvuọvo ihwo rẹ Izrẹl da ta kẹ ihwo ri Hiv na, ọkeọvo yẹ ohri rẹ avwanre na wa dia; komavo avwanre vẹ ovwan vwọ re ọphọ?

⁸ Etiyin ayen da ta kẹ Joshua, Avwanre idibo wẹn. Joshua da ta kẹ ayen, Ovwan ono? Tivọ ovwan nurhe?

⁹ Ayen da ta kẹ, Orho oshesheri ọye idibo wẹn nurhe, fiki rẹ odẹ rẹ Ọrovwohwo Ọghẹnẹ wẹn; kidie avwanre nyo usi rọye, kugbe obo ro ruru vwẹ Ijipt,

¹⁰ kugbe obo ro ru kẹ ivie rẹ Amọr ivẹ re hẹ obo ovrẹn ri Jọdan, Sihọn ovie ri Hẹshbọn, kugbe Ọg ovie rẹ Bashan, rọ dia Ashtarọt.

¹¹ Kọye ekpako rẹ avwanre da ta kẹ avwanre, Wa ghwa emuọre nene oma kpo oyan na, rere wa ra vwa ayen, re wa ta kẹ ayen nẹ, Avwanre idibo wẹn, Mọ, rere a re ọphọ.

¹² Ikara rẹ avwanre na je rhorha vwẹ ọke re avwanre vwọ reyọ nẹ iwevwi rẹ avwanre rhe nẹ ọnana kẹ emuọre rẹ avwanre vwẹ oyan na, vwẹ ẹdẹ yena ọvo na avwanre mu oyan bru ovwan rhe na, ẹkẹvuọvo asakiephana, nighere, ọ yare o si itutu,

¹³ emetoto nana ekpokpọ vwẹ ọke re vwo ku ayen vọn, gbe nighe, i ghwu re, te iwun nana te isabato nana e ghworo vwẹ oyan ogrogro nana.

¹⁴ Ọtiọye na ihwo na da re emu rayen, ayen rha nọ miẹ Ọrovwohwo-o.

¹⁵ Joshua vẹ ayen da rhuẹrẹ kugbe, ọ vẹ ayen da re ọphọ rere o je ayen dia; isun rẹ ihwo rẹ ukoko na de duvwu iyori kẹ ayen.

¹⁶ Vwẹ oba rẹ ẹdẹ erha rẹ ayen vwọ re ọphọ nu ayen de nyo nẹ ihwo re dia kẹrẹ ayen, nẹ ohri rẹ ayen ayen dia na.

¹⁷ Ihwo rẹ Izrẹl de mu oyan ayen de re te irere rayen vwẹ ẹdẹ rerha. Irere rayen kẹ Gibeọn, Kefirah, Beerọt, kugbe Kiriatjearim.

¹⁸ Ẹkẹvuọvo ihwo rẹ Izrẹl rhe hwe aye-en, fikiridie isun rẹ ukoko na vwẹ odẹ rẹ Ọrovwohwo Ọghẹnẹ rẹ Izrẹl na duvwu iyori kẹ ayen. Etiyin ukoko na ejobi de gu otu rẹ isun na.

¹⁹ Ẹkẹvuọvo otu rẹ isun na da ta kẹ ukoko na ejobi nẹ, Avwanre vwẹ odẹ rẹ Ọrovwohwo Ọghẹnẹ rẹ Izrẹl na duvwu iyori kẹ ayen, asakiephana avwanre sa vwẹ obọ te aye-en.

²⁰ Ọnana avwanre ru kẹ ayen, rere ayen vwọ rhọ, ọ rha dia eriyi-in ophu kọ dia uyovwi rẹ avwanre, fiki rẹ iyori rẹ avwanre vẹ ayen duvwu kẹ oma.

²¹ Isun na da ta kẹ ayen, Jẹn ayen vwo re ayen dia. Ayen de rhi hirhe phihọ otu ri du irhe kugbe otu ri vo ame kẹ ukoko na, kirobo re isun na ta kẹ ayen.

²² Joshua de se ayen, ọ da ta kẹ ayen, Die nẹrhẹ ovwan phiẹn avwanre, tanẹ, Avwanre pha shesheri kẹ ovwan, da ye ohri rẹ avwanre ovwan dia?

²³ Asakiephana ekan dia kẹ ovwan, evo vwẹ usun rẹ ovwan ke dia eviẹn bẹdẹ, iduirhe kugbe ivoame rẹ uwevwi rẹ Ọghẹnẹ mẹ.

²⁴ Ayen da kpahe kẹ Joshua, Fikiridie a tarọ kẹ idibo wẹn gbagba nẹ Ọrovwohwo Ọghẹnẹ wẹn ji urhi kẹ Mosis odibo rọye nẹ ọye vwẹ otọ na ejobi kẹ, nẹ ọ rha ghwọrọ ihwo re dia otọ na ejobi no kakare, oshọ rẹ arhọ rẹ avwanre kọye ri mu avwanre, vwọ ru emu nana.

²⁵ Asakiephana, nighere, avwanre obọ wẹn, ru obo ri yovwiri vẹ ọ ro fori vwẹ evun wẹn kẹ avwanre.

²⁶ Kẹ ọtiọye o ru kẹ ayen, o de sivwi ayen nẹ obọ rẹ ihwo rẹ Izrẹl; ayen gbi hwe aye-en.

²⁷ Ẹkẹvuọvo Joshua de ru ayen vwẹ ẹdẹ yena vwọ dia iduirhe vẹ ivoame rẹ ukoko na fiki rẹ agbada rẹ Ọrovwohwo na, rhiri rhi te ẹdẹ ri nonẹ, vwẹ asan ejobi rọ jereyọ.