Joshua 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Umwemwu rẹ Ekan

¹ Ẹkẹvuọvo ihwo rẹ Izrẹl de gbe oma rayen ẹgua vwẹ oma rẹ ẹravwo re vwo ze na; kidie Ekan rẹ ọmọ ri Karmi, ọmọ ri Zabdi, ọmọ ri Zerah, ohwo rẹ orua ri Juda, da reyọ evo vwẹ eravwọ re vwo ze na; ophu rẹ Ọrovwohwo da tua kpahe ihwo rẹ Izrẹl.

² Joshua de ji ihwo nẹ Jeriko kpo Ai, rọ kẹrẹ Betavẹn, vwẹ obaro ọnre ri Bẹtẹl, ọ da ta kẹ ayen, Wan yanran re dorhẹ rẹ otọ na. Ihwo na da yanran ra dorhẹ rẹ Ai.

³ Ayen de rhivwi bru Joshua rhe, rhe ta kẹ nẹ, E jẹn ihwo na ejobi ra-a, ẹkẹvuọvo e jẹn ihwo uriori ivẹ eyẹ erha re phi Ai; e jẹn ihwo na ejobi ra laghoma vwẹ oboyi-i, kidie ayen epha hahavwe.

⁴ Ọtiọye ihwo uriori erha de nẹ usun rayen ra; ayen da mrẹ ihwo rẹ Ai djẹ.

⁵ Ihwo rẹ Ai de hwe oma rẹ ihwo ọgban gbe esan mie ayen, a da djẹ ayen nẹ asan anurhoro na rhiri rhi te Shebarim, e de hwe ayen ghwu vwẹ asan ọghwrọrọ na. Udu rẹ ihwo na da wran, kere ame.

⁶ Etiyin Joshua da bẹrẹ emwa rọye, o de she bọvwọ opharo rhuotọ vwẹ obaro rẹ ekpeti rẹ Ọrovwohwo na rhiri re te ovwọnvwọn, te ọye te ekpako rẹ Izrẹl ejobi; ayen da ghwẹ ekpẹn ku uyovwi rayen.

⁷ Joshua da ta, Eghwo, E Ọrovwohwo Ọghẹnẹ, die wọ vwọ tobọ reyọ ihwo nana rhe ovrẹn ri Jọdan na vwo, wo rhi vwo phi avwanre phihọ obọ rẹ ihwo rẹ Amọr, re e rhe guọghọ avwanre? Yẹ manẹ ofori rere avwanre daji abọ oboyi ri Jọdan vwo!

⁸ E Ọrovwohwo, kidie me ta, rẹ ihwo rẹ Izrẹl de chuko ku ivwighrẹ rayen.

⁹ Ihwo ri Kenan vẹ ihwo re dia otọ na ejobi ki che nyo, ke cha gba riariẹ avwanre, ki che phoro odẹ rẹ avwanre nẹ akpọ na; kidie wo ru fiki rẹ odẹ wẹn rode na?

¹⁰ Ọrovwohwo na da ta kẹ Joshua, Vrẹn, die wo vwo she bọvwọ opharo rhuotọ?

¹¹ Izrẹl ru umwemwu; ayen chọ urhi rẹ ọphọ re me vẹ ayen rere; ayen reyọ usun rẹ emu ẹvo re vwo ze izobo na; ayen cho uji, ayen vwọrọ efian, ayen si ayen nu vwẹ ohri rẹ ekuakua rayen.

¹² Fiki rẹ ọtiọye na ihwo rẹ Izrẹl na gbi se mudia hirhe opharo ku ivwighrẹn raye-en, kọye ayen vwo chuko ku ivwighrẹn rayen na, kidie ayen hirhe phihọ obo ra cha ghwọrọ kufia. Me vẹ ovwan gbe cha dia ọfa-a, jokpa nẹ ovwan guọghọ ekuakua rẹ izobo na nẹ ohri rẹ ovwan.

¹³ Vrẹn, phorho ihwo na oma, re wọ ta, phorho oma rẹ ovwan kpahe hẹrhẹ odẹ rọ cha na, kidie enẹ Ọrovwohwo tare, Ọghẹnẹ rẹ Izrẹl, Obo re vwo ze izobo hẹ ohri rẹ ovwan, E Izrẹl, we gbi se hirhe opharo ku ivwighrẹn rẹ ovwa-an, bẹsiẹ we vwo si ekuakua re vwo ze izobo na nẹ ohri rẹ ovwan.

¹⁴ Vwẹ irhiọke oruorua kọ cha karedje, ekru rẹ Ọrovwohwo muru kọ cha karedje evwrevwruwevwi; evwruwevwi rẹ Ọrovwohwo muru kọ cha karedje ohwo ọvuọvo.

¹⁵ Ohwo re muru vẹ obo re vwo ze izobo na ka torhẹ te ọye te obo ro vwori ejobi, fikiridie ọ chọ urhi rẹ ọphọ rẹ Ọrovwohwo na, kidie o ru emu rẹ omaẹvuọ vwẹ Izrẹl.

¹⁶ Etiyin Joshua de vrẹn vwẹ irhiọke ride, ọ de se Izrẹl koko oruorua, e de mu orua ri Juda;

¹⁷ o de se ekrekru ri Juda rhe, e de mu ekru ri Zerah; ọ da reyọ evwruwevwi rọye rhe ohwo ọvuọvo, o de mu Zabdi;

¹⁸ ọ da reyọ evwruwevwi rọye rhe ohwo ọvuọvo, o de mu Ekan rẹ ọmọ ri Karmi, ọmọ ri Zabdi, ọmọ ri Zerah, rẹ orua ri Juda.

¹⁹ Etiyin Joshua da ta kẹ Ekan, Ọmọ mẹ, vwẹ urinrin kẹ Ọrovwohwo Ọghẹnẹ rẹ Izrẹl, rere wo jiro; gba ta kẹ vwẹ asakiephana obo wo ruru; wo sionẹ kẹ vwẹ-ẹ.

²⁰ Ekan da ta kẹ Joshua, Vwẹ ọ rẹ uyota mi ghinẹ ru umwemwu kpahe Ọrovwohwo Ọghẹnẹ rẹ Izrẹl, ọnana kọye obo ri mi ruru;

²¹ ọke me vwọ mrẹ adagba ri Shinar oyoyovwi vwẹ ohri rẹ ekuakua na, kugbe shekẹl ujori ivẹ rẹ idọnọ, kugbe ubrogba rẹ oro rọ họhọ te shekẹl ujuvẹ gbẹ ihwe, etiyin urhuru rẹ ayen de si vwe, me da reyọ ayen; nighere, a tọn ayen phihọ otọ vwẹ evun rẹ utughẹ mẹ, vẹ idọnọ na ra vwọ ka obotọ.

²² Etiyin Joshua de ji ikọn, ayen da djẹ kpo obo utughẹ na; nighere, e ghine tọn phihọ otọ a vwẹ idọnọ na ka obotọ kẹ.

²³ Ayen da reyọ ayen nẹ evun rẹ utughẹ na rhe a da vwẹ ayen rhe Joshua kugbe ihwo rẹ Izrẹl ejobi, ayen da ghwẹ ayen phihọ otọ vwẹ obaro rẹ Ọrovwohwo na.

²⁴ Te Joshua te ihwo rẹ Izrẹl ejobi da reyọ Ekan rẹ ọmọ ri Zerah, kugbe idọnọ na vẹ adagba na kugbe ubrogba rẹ oro na, kugbe emeshare rọye vẹ emetẹ rọye, irhuẹn rọye vẹ ekẹtẹkẹtẹ rọye vẹ igegede rọye, utughẹ rọye, kugbe obo ro vwori ejobi; a da ghwẹ ayen ejobi rhe iyara rẹ Akọr.

²⁵ Etiyin Joshua da ta, Die wọ vwọ so okpetu kẹ avwanre? Ọrovwohwo na je so okpetu kẹ wẹ nonẹ na. Izrẹl ejobi da vwẹ ikpokpo phio hwe, ayen da vwẹ erhanre torhẹ ayen, ayen da vwẹ ikpokpo phi ayen hwe.

²⁶ Ayen da kua etu rẹ eragha nyẹ rọ je herọ rhi te nonẹ na, etiyin Ọrovwohwo da kpare ophu ro muo na kufia. Kọye ji rhi te ẹdẹ ri nonẹ na e ji se odẹ rẹ asan na, Iyara rẹ Akọr.