Joshua 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oyanvwe vẹ Orẹ rẹ Ewanvrẹn vwi Gilgal

¹ Ọke rẹ ivie rẹ ihwo rẹ Amọr ejobi re hẹ obo ovrẹn ri Jọdan vwẹ abọ rẹ obuko ọnre, kugbe ivie rẹ ihwo ri Kenan re dia kẹrẹ oma rẹ Abadi na, vwo nyo nẹ Ọrovwohwo ri ru ame ri Jọdan kpọ yamu rere ihwo rẹ Izrẹl yan wan otọ ọyaya vrẹn, udu rayen da wran, udu gbi rhe ayen awọ-ọ, fiki rẹ ihwo rẹ Izrẹl.

² Vwẹ ọke yena Ọrovwohwo da ta kẹ Joshua, Duvwu ephia rẹ utehru rere wọ yanvwe ihwo rẹ Izrẹl obọ rive.

³ Etiyin Joshua de duvwu ephia rẹ utehru, ọ da yanvwe ihwo rẹ Izrẹl vwi Gibeat-haaralọt.

⁴ Ọnana kọye obo re sorọ ri Joshua vwọ yanvwe ayen: eshare ejobi vwẹ usun rẹ ihwo ri nẹ Ijipt rhe na, eshare ri te ofovwi ejobi, ghwuru vwẹ idjerhe vwẹ evun rẹ aghwa re ayen vwo nẹ Ijipt cha.

⁵ Yẹ ihwo ri nẹ otọ rẹ Ijipt rhe jovwo na yanvwere, ekẹvuọvọ otu re vwiẹri vwẹ idjerhe vwẹ evun rẹ aghwa na rẹ ayen vwo nẹ Ijipt nu a gbe yanvwe aye-en.

⁶ Kidie ihwo rẹ Izrẹl yan oyan na ikpe ujuvẹ soso vwẹ evun rẹ aghwa, bẹsiẹ rẹ ẹgborho na ejobi, ihwo ri te ofovwi ri ne otọ rẹ Ijipt rhe ejobi, vwo ghwu re, fikiridie ayen nyo urhuru rẹ Ọrovwohwo-o, ayen kọye Ọrovwohwo duvwu iyori kẹ nẹ e cha mrẹ otọ rẹ Ọrovwohwo ve kẹ esẹ rayen nẹ ọye vwọ kẹ avwanre, otọ rọ djẹ ọkẹre rẹ ameivie vẹ ọnyọn.

⁷ Ọtioye na emọ rayen re vwieri vwẹ oyan na, keye Joshua yanvwere; kidie a yanvwẹ ayen vwẹ idjerhe jovwo-o.

⁸ Ọke ra vwọ yanvwe ẹgborho na ejobi nu, ayen da dia evun rẹ erhọn na bẹsiẹ rẹ oyanvwe rayen vwo kpo.

⁹ Ọrovwohwo da ta kẹ Joshua, Nonẹ na mi vwo si ehwejẹ rẹ Ijipt nẹ ovwan oma. Kọye e de se odẹ rẹ asan na Gilgal rhiri rhi te nonẹ na.

¹⁰ Ọke rẹ ihwo rẹ Izrẹl vwo mu erhọn vwi Gilgal ayen da re orẹ rẹ ẹwanvrẹn na vwẹ ẹdẹ ihwẹne rẹ emeranvwe na vwẹ ovwọnvwọn vwẹ uphẹphẹ ri Jeriko.

¹¹ Vwẹ irhiọke rivẹ rẹ ayen vwọ re ọre rẹ ẹwanvrẹn na nu, vwẹ ẹdẹ yena ọvuọvo na, ayen da re emamọ rẹ otọ na, ikara ro jephuo kugbe eka ra kakare.

¹² Imana na da ka vwẹ irhiọke yena; ihwo rẹ Izrẹl gbe mrẹ imana na ọfa-a, ekẹvuọvọ ayen da re emamọ rẹ otọ ri Kenan vwẹ ukpe yena.

Joshua vẹ Ọshare rẹ ọ Yọnre Ọlọkọ

¹³ Ọke ri Joshua vwọ orhoma ri Jeriko, ọ da kpare opharo rọye vwo ni, nighere, ohwo ọvo mudia vwẹ obaro rọye vẹ ọlọkọ vwẹ obọ rọye; Joshua da yan bro ra ọ da ta kẹ nẹ, Wọ vẹ avwanre obọ vwo, gbenẹ wẹ ọvweghre rẹ avwanre?

¹⁴ Ọ da ta, Ẹjo, ẹkẹvuọvo kerẹ onotu rẹ ofovwi rẹ Ọrovwohwo me vwo rhe na. Joshua de she bọvwọ opharo rọye rhuotọ, ọ da ga, ọ da ta kẹ, Kidie Ọrovwohwo guọnọre nẹ odibo rọye ru?

¹⁵ Etiyin onotu rẹ ofovwi rẹ Ọrovwohwo na da ta kẹ Joshua nẹ, Ku isabato wẹn nẹ awọ wẹn, kidie asan ri wo mudia na ọfuanfon Joshua de ru ọtiọye.